1
اون زمان عیسی روزِ سَبَتِ رِه گندمزارِ جَه ردَ بوستَأن دوبو، و چون اونِ شاگردانَ ویشتا بو شروع بوکودد گندمِ خوشه یانَ چِئِنْ و اوشَأنَ خوردَأن.
2
فریسیانْ اَنَ بیدد و اونَ بوگوفتد:«بیدین، تی شاگردان کاری کوند کی روزِ سَبَتِ رِه جایز نییه.»
3
اون جواب بدَه:«مگر اونچی کی داود و اونِ یاران انجام بدَدْ وختی کی ویشتا بودَ نخَأنده اید؟
4
کی چوطو بوشو خدا خانه دورون و نانهایی کی تقدیس بوبُسته بویَ بوخورد، در حالی کی اونْ و اونِ یارانِ رِه ممنوع بو و فقط کاهنان اجازه دَأشتد اون نانِ جَه بوخورد.
5
یا توراتِ دورون نخَأنده اید کی کاهنانْ با اَنکی روزِ سَبَتِ رِه مَعبدِ دورون سَبَتِ قانونَ ایشکندْ ولی مقصر نییِد؟
6
بدَأنید کسی اَیَ ایسَه کی معبدِ جَه پیله تره.
7
اگر شومَأن اَ گوفته معنی یَ درک بوکوده بید کی گویه؛ "رَحمت خَأیم نه قربانی" هَطو هَچین بی گوناهانَ محکوم نوکودید.
8
چون انسانِ پسرْ روزِ سَبَتِ صاحب اختیارم ایسه.»
مردِ علیلِ شفا
9
بعدْ عیسی از اویَ بوشو ایتَه شهرِ دیگرْ و بوشو ایتَه کنیسه دورون.
10
اویَ مردی یَ بیده کی اونِ دس خوشکَ بوسته بو. فریسیان عیسی جَه وَأورسد:«آیا روزِ سبَتِ رِه شفا دَئَن جایزه یا نه؟» اوشَأن اَ سوالَ وَأورسد تا اونِ جَه بهانه ایی بدس بأورد و اونَ دستگیر بوکوند.
11
ولی عیسی اوشَأنَ بوگوفت:«کَ ی تَه از شومأن ایتَه گوسفند بدَأره، و روزِ سَبتْ اون حیوان دکفه چاله دورون، اونَ نیگیره و بیرون نَأوره؟
12
مگر انسانِ اَرزشْ گوسفندِ جَه ویشتر نییه؟ پس روزِ سَبَتِ رِه خوبی کودَأنْ جایزه.»
13
بعدْ عیسی اون مردَأیَ بوگوفت:«تی دسَ درازَ کون.» اون خو دسَ درازَ کود و اونِ دسْ، اونِ اوی تَه دسِ مَأنستَأن سالم بوبُست.
14
فریسیان کنیسه جَه بیرون بوشود، و جلسه بیگیفتد کی چوطو عیسی یَ بیگیرد و بوکوشد.
خدا خادم
15
وختی عیسی خبردارَ بوست، از اویَ بوشو، و خیلی از مردم اونِ دونبال راه دکفتد. اونْ اوشَأنِ مریضانَ شفا دَئه،
16
و اوشَأنَ قدغن کوده کی دربارۀ اونِ معجزات کسی یَ چیزی نوگوید.
17
تا اَطو اِشعیایِ نبی پیشگویی انجام بیبه کی فرمَأیه:
18
«اَن می بنده یه کی اونَ انتخاب بوکودم، اون می مَحبوبه کی می جانْ اونِ جَه راضیه، می روحَ اونِ رو نهم و اونْ عدالتَ قؤمَأنَ اعلام کونه.
19
اون کسی مرَه جنگ نوکونه و فریاد نزنه، و کسی اونِ صدایَ کوچه یانِ دورون نیشتَأوه.
20
خمَ بوسته لوله یَ نیشکینه، و نیم سوزه فیتیله یَ خاموشَ نوکونه، تا عدالتَ پیروزَ کونه.
21
اونْ همۀ قؤمَأنِ رِه مایۀ اُمید بِهه.»
عیسی و بَعلزَبول
22
اَ موقع دیوانه ایی یَ بأوردد عیسی ورجَه، اون کور و لال بو، عیسی اونَ شفا بدَه، جوری کی هم بتَأنست بیدینه و هم بتَأنست حرف بزنه.
23
مردم همه تعجبِ اَمرَه گوفتد:«آیا اَن داودِ پسر نییه؟»
24
ولی وختی فریسیان اَن معجزه خبرَ بیشتَأوستد بوگوفتد:«اَ شخص، دیوانَ بَعلزَبولْ دیوانِ رئیسِ یاری اَمرَه بیرون تَأوَأده»
25
عیسی کی اوشَأنِ فکرَ خَأده اوشَأنَ بوگوفت:«هر مملکتی کی دسته یانِ مخالفَ تقسیم بیبه رو به خرابی شِه، و هر شهر و خانه ایی که دسته یانِ مخالفَ تقسیم بیبه برقرار نمَأنه.
26
هَسَه اگر شیطان، شیطانَ بیرون تَأوَأده و بر علیه خودش تقسیم بیبه، پس چوطو اونِ سلطنت برقرار بمَأنه؟
27
اگر من بَعلزبولِ یاری اَمرَه دیوانَ بیرون تَأوَأدم، شیمی شاگردان کیی یاری اَمرَه اوشَأنَ بیرونَ کوند؟ اَ حرفانِ وَسی اوشَأنْ شمرَه قضاوت کوند.
28
ولی اگر من خدا روحِ یاری اَمرَه دیوانَ بیرونَ کونم، اَنْ نشان دِهِه کی خدا ملکوتْ شیمی میَأن شروع بوبُسته.
29
چوطو کسی تَأنه اینفری کی قدرتمنده خانه اسباب اثاثیه یَ غارت بوکونه؟ مگر اَنکی اول اونَ دَوَده، و بعدْ اونِ خانه یَ غارت بوکونه.
30
هر کی می اَمرَه نییه بر ضدِ منه، و هر کی می مرَه جمعَ نوکونه، پراکندَه کونه.
31
پس بدَأنید، هر جور گوناه کی انسان انجام بده و هر جور کُفر کی بوگویه، آمرزیده بِهه، ولی کُفری کی علیه روح القدس بوگویه آمرزیده نیبه.
32
هر کس بر علیه انسانِ پسر حرفی بزنه، آمرزیده بِهه، ولی کسی کی بر علیه روح القدس حرفی بزنه، نه اَ دونیا میَأنْ نه اون دونیا میَأنْ، هیچموقع آمرزیده نیبه.
33
اگر میوۀ خوب خَأئید شیمی درخت وَأستی خوب بیبه، چون درختِ بد، میوۀ بد فَأده.
34
ای لانتی زاده یان، شومَأن کی آدمهایِ شریری ایسید، چوطو تَأنید حرفهایِ خوب بزنید؟ چون زبانْ اونچی جَه حرف زنه کی دیلْ اونِ جَه پوره.
35
آدمِ خوبِ حرفانِ جَه شَه فَهمستَأن کی اونِ باطنِ دورونْ خزانۀ خوبی نَهه، و آدمِ بدذاتِ حرفانِ جَه هم شَه فَهمستَأن کی اونِ دیلِ میَأنْ خزانۀ بدی وجود دَأره.
36
شمرَه گویم بدَأنیدْ، مردم هر حرفِ ناحقی کی گوید، وَأستی روزِ داوری اونِ رِه حساب پس بدد.
37
پس خودتانِ حرفانِ وَسی یا تبرئه بیهید یا محکوم.»
درخواستِ معجزه
38
اونموقع بعضی از یهودِ مُلایان و فریسیان اونَ بوگوفتد:«ای اُستاد، خَأئیم تی جَه مُعجزه ایی بیدینیم.»
39
عیسی اوشَأنَ جواب بدَه:«نسلِ شریر و زِناکار معجزه خَأید، ولی اوشَأنَ مُعجزه ایی فَأدَه نیبه مگر یونسِ نبی مُعجزه.
40
هوطو کی یونسْ سه روز و سه شب ماهی شکمِ میَأن بِئسَه، انسانِ پسرم سه شبانه روز زمینِ شکمِ میَأن ایسِه.
41
روزِ قیامتِ رِه نینوا مردمْ اَ طایفه مرَه ویریزد، و اوشَأنَ محکوم کوند، چون یونسِ موعظه وَسی توبه بوکودد، هَسَه کی یونسِ جَه پیله تر اَیَ ایسَه.
42
ملکۀ سَبا روزِ قیامتِ رِه اَ فرقه اَمرَه ویریزه و اوشَأنَ محکوم کونه، چون زمینِ دورترین نقطه جَه بأمو تا سلیمانِ حکمتَ بیشتَأوه، و هَسَه، سلیمانِ جَه پیله تر اَیَ ایسَه.
43
وختی ایتَه روحِ پلید اینفرِ جَه بیرون اَیه، اَنِ وَسی کی جایِ راحت تری پیدا کونه، جاهایِ خوشک و بی آب و علفَ گرده، ولی پیدا نوکونه.
44
پس خو مرَه گویه؛ "وَأگردم خودمِ خانه کی اونِ جَه بیرون بأموم" و وختی اَیِه، دینه خالی و مرتبه و جارو بوبُسته.
45
اونموقع شِه و هفتَ روحِ بدتر از خودشم اوسَأنه و خو مرَه اَوره و بودورون شُد و هویَ ساکن بود، و اونْ آدمِ آخرعاقبتْ اولِ جَه هم بدتر بِه. اَ نسلِ شریرِ آخرعاقبت همْ، هَطویه.»
عیسی مار و براران
46
عیسی مردمِ مرَه حرف زَئَن دوبو کی اونِ مار و اونِ برأرأنْ بیرون ایسَه بود و خَأستد اونِ اَمرَه گب بزند.
47
پس اینفرْ اونَ بوگوفت:«هَسَه تی مار و تی برأرأن بیرون ایسَأد و خَأید تی اَمرَه گب بزند.»
48
عیسی بوگوفت:«می مار کیسه؟ می برأرأن کییِد؟»
49
بعدْ خو دسَ درازَ کود و خو شاگردانَ اشاره بوکود و بوگوفت:«اَشَأن می مار و می برأرأند،
50
چون هر کی می پئرِ آسمانی اِراده یَ بجا بأوره، هونْ می برأر و می خَأخور و می ماره.»