10

¹ اونموقع عیسی دوازدَه شاگردَ خو ورجَه دخَأد و اوشَأنَ اقتدار بدَه تا اَرواحِ پلیدَ بیرون تَأوَأدد، و هر درد و مرضی یَ شفا بدد. ² اونْ دوازدَه رسولِ نام اَنه؛ شمعونِ معروف به پطرس و اونِ برأر آندریاس، یعقوبْ زِبدی پسرْ و اونِ برأر یوحنا. ³ فیلیپُس و بَرتولما، توما و متایِ باجگیر، یعقوبْ حَلَفی پسر و تِدی، ⁴ شمعونِ غیور و یهودایِ اِسخَریوطی کی آخرسر عیسی یَ دوشمنِ دس تسلیم بوکود. ⁵ عیسی اَ دوازدَه نفرَ اوسَه کود مأموریت و اوشَأنَ بوگوفت:«سرزمینهایِ غیرِ یهودی جَه ردَ نیبید و سامریانِ شَهرانَ بودورون نیشید، ⁶ بلکی فقط قؤمِ اسرائیلِ ورجَه کی خدا گومَه بوسته گوسفنداند بیشید. ⁷ وختی شوئون دریدْ اَ پیغامَ اعلام بوکونید کی آسمانِ ملکوتْ نزدیکه. ⁸ مریضانَ شفا بدید، جُذامیانَ پاکَ کونید، مُرده یانَ زندَه کونید، دیوانَ بیرون تَأوَأدید، مُفت فأگیفته ایدْ مُفت فأدید. ⁹ طلا نُقره و یا سکۀ مِسی خودتانِ اَمرَه اونسَأنید. ¹⁰ حتی کوله بار یا پیرهنِ اضافی و کفش و عَصایِ اضافی هم اونسَأنید. چون کارگر خودشِ خوراکِ مُستَحقه. ¹¹ هر شهر و روستایی کی شید، وَأورسید کی اویَ آدمِ با لیاقت کیسه، اونِ خانه دورون بِئسید تا از اویَ بیشید. ¹² وختی خانه ایی یَ بودورون شید سلام بوگوئید. ¹³ اگر اونْ خانواده لیاقت بدَأرد شیمی سلامْ اوشَأنِ رو قرار گیره، و اگر لیاقت ندَأرد، شیمی سلام شمرَه وَأگرده. ¹⁴ هر کی شمرَه قبول نوکونه یا شیمی حرفانَ گوش نوکونه، وختی اون خانه یا اون شهرِ جَه شوئون درید شیمی پا خاکَ فلاشانید. ¹⁵ یقین بدَأنید روزِ قیامت، شهرایِ سَدوم و غَموره وضعْ اون شهرِ جَه بهتره. ¹⁶ من شمرَه گوسفندانِ مَأنستَأن اوسَه کونم گُرگانِ میَأن، پس لانتی مَأنستَأن شیمی حَواس جمع بیبه، و کبوترِ مَأنستَأنْ بی آزار بیبید. ¹⁷ ولی مراقب بیبید، چون مردم شمرَه گیرد و محاکمه کوند و کنیسه یانِ دورون شمرَه شلاق زند. ¹⁸ و شمرَه می وَسی بورد پادشاهان و فرمانروایانِ ورجَه، اَن فرصتی ایسه تا اوشَأنِ جولو و قؤمهایِ بیگانه جولو شهادت بدید. ¹⁹ وختی شمرَه گیرد پریشان نیبید کی چوطو، یا چی وَأستی بوگوئید، چون هون لحظه شمرَه عَطا بِه کی چی بوگوئید. ²⁰ چون اَن شومَأن نیئید کی گوئید، بلکی شیمی پئرِ آسمانی روحِه کی بواسطۀ شومَأنْ گب زنه. ²¹ برأر برأرَ و پئرْ زَأیَ مرگَ تسلیم کونه، و زَأکأن بر علیه خوشأنِ پئر و مار ویریزد و اوشَأنَ کوشد. ²² و می نامِ وَسی، همۀ مردمْ شیمی جَه نفرت پیدا کوند، ولی هر کی تا آخر صبر بوکونه نجات پیدا کونه. ²³ هر وخت شمرَه شهری دورون اذیت کوند، فرار بوکونید ایتَه شهرِ دیگر، شمرَه گویم یقین بدَأنید قبلِ اَنکی بتَأنید همۀ شهرایِ اسرائیلَ بیشید انسانِ پسر اَیه. ²⁴ اُستاد خو شاگردِ جَه پیله تر نییه و غلام خو اَربابِ جَه. ²⁵ شاگرد خَأیه خو اُستادِ مَأنستَأن بیبه و غلام خَأیه خو اَربابِ مقام فأرسه، پس اگر خانه رئیسَ "بَعْلْزَبول" دخَأدد، خانۀ باقیِ آدمانَ چی دخَأند؟ ²⁶ اوشَأنِ جَه نترسید، هیچ چیزِ مخفی نییه کی آشکارَ نیبه، و هیچ چیزِ پوشیده ایی کی معلوم نیبه. ²⁷ اونچی کی تاریکی میَأن شمرَه گویمْ روشنایی میَأن بوگوئید و اونچی کی خلوتی شیمی گوشِ دورون بوگوفته بوبُستَ، بامانِ جُر فریاد بزنید. ²⁸ کسانی جَه نترسید کی فقط تَأند جسمَ بوکوشدْ و روحَ نتَأند صدمه بزند، اونی جَه بترسید کی قادره هم جسمَ و هم روحَ جهنمِ دورون هلاکَ کونه. ²⁹ آیا دو تَه چیچینی یَ ایتَه پولِ سیاه اَمرَه نوفروشد؟ ولی ایتَه از اوشَأنم بدونِ شیمی پئرِ آسمانی حُکم به زمین نکفه. ³⁰ شیمی سرِ مو، همه تَه بیشمارده بوبُسته. ³¹ پس نترسید، چون شیمی ارزش خیلی ویشتر از هزاران چیچینی یه. ³² هر کس مردمِ ورجَه اعلام بوکونه کی مرَه ایمان دَأره، منم می پئرِ آسمانی ورجَه اعلام کونم کی اونْ می شینه. ³³ ولی هر کس مردمِ ورجَه بوگویه مرَه نشنَأسه، منم می پئرِ آسمانی ورجَه گویم کی اونَ نشنَأسم. ³⁴ گومان نوکونید بأموم زمینِ رو صلح و آرامش بأورم، نه، بلکی بأموم تا شمشیرَ برقرار بوکونم. ³⁵ من بأموم تا پسرَ اونِ پئرِ جَه، دخترَ اونِ مارِ جَه و عروسَ اونِ مردِمارِ جَه سیوایَ کونم، ³⁶ جوری کی هر کسِ دوشمنْ اونِ خانواده بوبود. ³⁷ هر کی خو پئرْ یا مارَ ویشتر از من دوس بدَأره می لایق نییه، و هر کسم خو پسرْ یا خو دخترَ می جَه ویشتر دوس بدَأره می لایق نییه. ³⁸ هر کی خو صلیبَ اونسَأنه و می دونبال نَأیه، می لایق نییه. ³⁹ هر کی بخَأیه خو جانَ حفظ بوکونه اونَ هلاکَ کونه و هر کسْ، خو جانَ می وَسی از دس بده، اونَ بدس اَوره. ⁴⁰ هر کی شمرَه قبول بوکونه مرَه قبول بوکوده، و کسی کی مرَه قبول بوکوده، کسی کی مرَه اوسَه کوده یَ قبول بوکوده. ⁴¹ هر کسْ ایتَه نبّی یَ اَنِ وَسی کی نبّی ایسه قبول بوکونه خودشم ایتَه نبّی اَجرَ بدس اَوره، و هر کس ایتَه دوروستکارَ اَنِ وَسی کی دوروستکاره قبول بوکونه، خودشم ایتَه دوروستکارِ اَجرَ فأگیره. ⁴² و هر کس اَن کوچی کانَ، اَن وَسی کی می شاگرددْ ایتَه کاسه آبِ سرد فَأده، شمرَه گویم یقین بدَأنید اونِ کار بی اَجر نمَأنه.