8

¹ و خداوند موسی یَ بفرماست: «بوشو فرعونِ ورجَه، و اونَ بوگو خداوند اَطو گویه؛ می قؤمَ آزادَ کون تا بوشود مرَه عبادت بوکوند. ² و اگر تو اوشَأنَ آزادَ نوکونی من تمامِ تی سرزمینَ وزغ مرَه پورَ کونم. ³ و نیلِ رودخانه بقدری جی وزغ پورَ بِه کی اونِ جَه بیرون اَیِد و فوتورکد اَیِد تی کاخ و تی اُتاق خواب و تی رختخوابِ دورون، و تی درباریان و تی مردمِ خانه دورن پورَه بود، حتی شیمی خمیر گیفتنِ تشتَأنِ دورون و شیمی تنورانِ دورون پور جی وزغ بِهِه. ⁴ و وزغَأن تو و تی نوکران و تی قؤمِ سروکله جَه بوجُر شُد.» ⁵ و خداوند موسیَ بوگوفت:«هارونَ بوگو؛ تی عَصایَ اوسَأن و تی دسَ نیلِ رودخانه طرف، و دغَنَأن و دریاچه یانِ طرف درازَ کون، تا وزغَأنَ بیرون بَأید و همۀ مصرِ سرزمینَ پورَه کوند.» ⁶ وختی هارون خو دسَ مصرِ آبانِ طرف درازَ کود، وزغَأن بیرون بأمود و همۀ مصرَ پورَه کودد. ⁷ و مصرِ جادوگرانم هَ کارَه بوکودد و خوشَأنِ جادو مرَه زمینِ جَه وزغ پدیدارَ کودد. ⁸ بازن فرعون موسی و هارونَ خو ورجَه دِخَأد و بوگوفت:«خدا درگاه دوعا بوکونید تا وزغَأنَ می جَه و می مردمِ جَه دورَ کونه، منم قؤل دهم کی قؤمَ آزادَ کونم تا بیشِه خدا رِه قربانی بوکونه.» ⁹ موسی فرعونَ بوگوفت:«ایتَه وختَ آزادی رِه تعیین بوکون تا من ترِه و تی نوکران و تی مردمِ رِه دوعا بوکونم، کی وزغَأن شیمی جَه دورَ بُد و همه تَه جی میَأن بوشود، و فقط اوشَأنی کی نیلِ رودخانه دورون ایسَأد زنده بِماند.» ¹⁰ فرعون بوگوفت:«فردا». موسی بوگوفت:«اَ کارَ کی بخَأستی کونم، تا تو بدَأنی کی اَمی خدا یَهوَه مَأنستَأن، هیچ خدایی نِئسَه، ¹¹ همۀ وزغَأن جی میَأن شُد، و فقط اوشَأنی کی نیلِ رودخانه میَأن ایسَأد زنده مَأند.» ¹² و موسی و هارون فرعونِ ورجَه بیرون بأمود، و موسی وزغَأنی وَسی کی فرعونِ رِه اوسِه بوبُستِه بو خدا درگاهَ دوعا بوکود. ¹³ خداوند هم موسی دوعایَ اجابت بوکود و وزغَأنی کی خانه و شهرَأن و دهاتَأنِ دورون ایسَه بُد بِمردد. ¹⁴ و مردم بِمرده وزغَأنَ ایتِه جا همدیگرِ رو جمعَ کودد، جوری کی همه جایَ بُو بیگیفته بو. ¹⁵ فرعون وختی بیدِه وزغَأن بِمردد و همه جا آرامش بیگیفت، خو دیلَ سختَ کود و هوطو کی خدا بفرماسته بو راضی نوبوست قؤمَ آزادَ کونه.

پونیشِ بلا

¹⁶ و خداوند موسیَ بوگوفت:«هارونَ بوگو؛ تی عَصایَ زمینِ گَرد و غُبارَ بزن، تا گَرد و غُبار پونیشَ تبدیل بیبِه و همۀ مصر، پور جی پونیش بیبِه.» ¹⁷ موسی و هارون اونچی کی خداوند اوشَأنَ بوگوفته بویَ عمل بوکودد. هارون خو دسَ درازَ کود و خو عصا اَمرَه زمینِ گرد و غُبارَ بزَه، و پونیشَأن مردم و حیوانانَ فوتورکستد، چره کی همۀ گرد و غُبار مصرِ دورون، پونیش تبدیل بوبُسته بو. ¹⁸ فرعونِ جادوگران بخَأستد کی جادو مرَه اَ کارَه بوکوند و پونیش چَأکوند ولی نِتَأنستد، همه جا پونیش جَه پورَه بوسته بو. ¹⁹ جادوگران فرعونَ بوگوفتد:«اَ کار خدا قدرتِ جَه یِه» اما فرعون اوشَأنِ گبَ گوش نوکود و دیل سخت بوبُست، هوطو کی خداوند بفرماسته بو.

مگسِ بلا

²⁰ و خداوند موسیَ بوگوفت:«فردا صبحِ زود ویریز و بوشو نیلِ رودخانه کنار و فرعونِ رَأفَأ بِئس، اون اَیِه رودخانه کنار، وختی بأمو اونَ بوگو؛ خداوند اَطو گویه؛ می قؤمَ آزادَ کون بدَه مرَه عبادت بوکوند، ²¹ اگر می قؤمَ آزادَ نوکونی، تی طرف و تی درباریان و تی مردمِ طرف همه جور مگس اوسه کونم، و تی کاخان و تی مردمِ خانه یَ، و همۀ تی سرزمینَ همه جور مگسِ جَه پورَه کونم. ²² ولی جوشنِ سرزمینِ دورون کی می قؤم اویَ زندگی کوند مگس نِئسَه، تا تو بدَأنی کی من یَهوَه، اَ زمینِ رو خدایم، ²³ و تی قؤم و می قؤمِ میَأن فرق نِهم، و فردا تو اَ نیشانه یَ دینی.» ²⁴ و خداوند هوطو کی بفرماسته بو اَ کارَ بوکود و همه جور مگس بأمو فرعونِ کاخ و اونِ درباریانِ خانه میَأن، و همۀ مصر، مگسِ جَه پورَه بوست و خیلی خرابی به بار بأورد. ²⁵ فرعون موسی و هارونَ دِخَأد و بوگوفت:«باشد، بیشید و شیمی خدا رِه قربانی بوکونید، ولی مصرِ جَه بیرون نیشید.» ²⁶ موسی بوگوفت:«اَ کار دوروست نییِه، چره کی حیوانانی کی اَمَأن یَهوَه، اَمی خدا رِه قربانی کونیم، مصریان اوشَأنَ پرستش کوند، و اگر اوشَأنِ چومِ جولو اَ حیوانانَ قربانی بوکنیم، آیا باعث نیبِه کی اَمرَه سنگسار بوکوند؟ ²⁷ وَأستی سه روز راه کودَأنِ اَقدر صحرا دورون سفر بوکونیم و مصرِ جَه دورَ بیم، و در اویَ اَمی خدا یَهوَه رِه قربانی بوکونیم، هوطویی کی اَمرَه دستور بدَه دَأره.» ²⁸ فرعون بوگوفت:«من شمرَه وَألم کی بیشید و یَهوَه شیمی خدا رِه صحرا دورون قربانی بوکونید، ولی زیاد دورَ نیبید، و هَسَه مرِم دوعا بوکونید.» ²⁹ موسی بوگوفت:«وختی جی اَیَ بوشوم بیرون، تی وَسی خداوندِ درگاهِ جَه دوعا کونم و فردا اَ بلا و مگسَأن جی فرعون و اونِ درباریان و اونِ قؤمِ جَه دورَ بود. ولی فرعون باز اَمرَه فریب نده؟ و قؤمَ آزادَ نوکونه و وَأنَألِه کی قؤم بیشِه خدا رِه قربانی بوکونه.» ³⁰ بازن موسی فرعونِ ورجَه بیرون بأمو و خدا درگاهَ دوعا بوکود، ³¹ و خداوند موسی دوعایَ اجابت بوکود و همۀ مگسَأنَ فرعون و اونِ درباریان و اونِ مردمِ جَه دورَ کود، و ایتَه مگس هم باقی نِمَأنست. ³² ولی بازم فرعون خو دیلَ سختَ کود و وَأنَأشت کی بنی اسرائیل، جی مصر بیرون بیشِه.