7

¹ خداوند موسیَ بفرماست:«تو می اوسه بوبُسته فرعونِ ورجَه ایی، و تی برَأر هارون تی نبی یِه، ² هر چی کی ترَه گویم اونَ بوگو تا هارون اونَ فرعونَ بوگویِه، و اونِ جَه بخَأیِه کی بنی اسرائیلَ آزادَه کونه. ³ ولی اَنم بدَأن کی من فرعونِ دیلَه سختَه کونم، و مُعجزه یان و عجایبِ زیادی مصرِ دورون انجام دهم، ⁴ ولی بازم فرعون شیمی گبَ گوش نوکونه، و من می قدرتِ عظیمِ اَمرَه مصرَ جزا دهم و می قؤم بنی اسرائیلَ، مصرِ جَه بیرون اَورم. ⁵ وختی می قدرتَ نیشان بدَم و بنی اسرائیلَ مصرِ جَه بیرون بأوردم، اونموقع مصریان فَهمده کی من یَهوَه یم.» ⁶ و موسی و هارون اون کاری یَ بوکودد کی خدا اوشَأنَ اَمر بوکوده بو. ⁷ زمانی کی اوشَأن بوشود فرعونِ ورجَه، موسی هشتاد سال سِن دَأشته و اونِ برَأر هارون هشتاد و سه سال. ⁸ پس خداوند موسی و هارونَ بفرماست: ⁹ «اَی دفعَه فرعون شمرَه گویه؛ مره مُعجزه ای بوکونید، اونموقع هارونَ بوگو خو عصایَ فرعونِ پا جولو جَه تَأوَده زمین رو، تا عَصا لانتی بیبِه.» ¹⁰ بازن موسی و هارون فرعونِ ورجَه بوشود و اونچی کی خدا بفرماسته بویَ بوکودد. و هارون خو عَصایَ فرعون و اونِ درباریانِ ورجَه بِئگاد زمینِ رو و عَصا لانتی بوبُست. ¹¹ و فرعون هم خو حکیمان و خو جادوگرانَ به حضور دِخَأد و مصرِ جادوگرانم جادو مرَه هَ کارَه بوکودد، ¹² اوشَأن هر کودام خوشَأنِ عصایَ زمینِ رو بِئگَأدد و اوشَأنِ عَصا همه تَه لانتی بوبُست، ولی هارونِ لانتی، جادوگرانِ لانتیَأنَ بوخورد. ¹³ ولی هوطو کی خداوند بفرماسته بو فرعونِ دیل سختَ بوست و اوشَأنِ گبَأنَ گوش ندَه.

خونِ بلا

¹⁴ و خداوند موسیَ بوگوفت:«فرعونِ دیل سختَ بوسته دَأره، و قؤمَ آزادَ نوکونه. ¹⁵ فردا صُبح بوشو رودخانه کنار و فرعونِ رَأفَأ بِئس، اون اَیِه رودخانه کنار، اون عَصایی کی لانتی بوبُسته بویَ تی مرَه بوبور و تی دس بیگیر. ¹⁶ اونَ بوگو؛ یَهوَه، عِبرانیانِ خدا مرَه اوسِه کوده تی ورجَه و بوگوفته؛ می قؤمَ آزادَ کون تا مرَه صحرا دورون عبادت بوکوند، تا هَسَه خدا دستورِ جَه ایطاعت نوکوده دَأری. ¹⁷ ولی خداوند گویِه جی اَن پس فَهمی کی من یَهوَه، خدایم، هَسَه من عصایی اَمرَه کی می دسِ میَأن دَأرم رودخانه آبَ زنم، و آب، تبدیل به خون بِهه، ¹⁸ و ماهیانی کی رودخانه دورون ایسَأد میرد و رودخانه آب گندیده بِهه، جوری کی دِ مصریان نِتَأند رودخانه آبَ وَأخورد.» ¹⁹ و خداوند موسی یَ بوگوفت:«هارونَ بوگو خو عصایَ بیگیره و رو به همۀ رودخانه یَأن و چشمه یان و دریاچه یان و حوضَأن، حتی چوبی کاسه یان خو دسَ درازَ کونه، تا همۀ مصرِ آب تبدیل به خون بیبِه.» ²⁰ موسی و هارون هوطو کی خداوند بفرماسته بو بوکودد، و اون عصایَ راستَه کود و فرعون و اونِ درباریانِ چومِ جولو جَه رودخانه آبَ بزَه و همۀ نیلِ رودخانه آب، تبدیل به خون بوبُست، ²¹ و ماهیانی کی آبِ دورون ایسَه بود بِمردد و رودخانه آب گند بوبُست، و دِ مصریان نِتَأنستِد رودخانه آبِ جَه وَأخورد و همۀ مصرِ دورون به جای آب خون بو. ²² ولی مصرِ جادوگران بتَأنِستد جادو کودَأنِ اَمرَه آبَ به خون تبدیل بوکوند. و فرعونِ دیل سخت بِمَأنِست و هوطو کی خداوند بفرماسته بو موسی و هارونِ گبَأنَ اِعتنا نوکود. ²³ اون خوره نِنَه ئو اَ مُعجزه یَ توجهی نوکود و بوشو خو کاخِ دورون. ²⁴ و مصریان نیلِ رودخانه کنارِ جَه چاه کدد تا خوردَأنِ ره آب بدس بأورد، چره کی نِتَأنستد جی رودخانه آب بوخورد. ²⁵ و جی موقعی کی خداوند رودخانه آبَ به خون تبدیل بوکود هفت روز بوگوذشت.