1
اونموقع خداوند موسی یَ بفرماست:«هَسَه دینی کی فرعونِ مرَه چی کونم، چِنان فرعونَ در فیشار بنم کی نه فقط می قؤمَ آزادَ کونه، بلکی اوشَأنَ به زور جی مصر بیرون تَأوَأده.»
2
و باز خداوند موسی یَ خطاب بوکود و بفرماست:«من یهوَه یم،
3
وختی کی ابراهیم و اِسحاق و یعقوب رِه آشکارَ بوستم، خودمَ خدایِ قادرِ مُطلق معرفی بوکودم، یعنی می نام یَهوَه مرَه، اوشَأنِ ورجَه معروف نوبوستم.
4
من اوشَأنِ مرَه عهد دوَستم و وَعده بدَم کی کنعانِ سرزمینَ کی غریبانِ مَأنستَأن اویَ زندگی کودد دَه اوشَأنَ فَأدم.
5
من بنی اسرائیلِ آه و ناله یَ کی مصریان اوشَأنَ اَسیر، و خوشَأنِ برده چَأکوده دَأردَه بیشتَأوستم و می عهدَ بخاطر بأوردم.
6
پس بنی اسرائیلَ بوگو؛ من یَهوَه ایسم، و شمرَه جی مصریانِ بندگی و اَ مُصیبت آزادَ کونم، و می بازویِ پور قوّتِ اَمرَه اوشَأنَ سخت مُجازات کونم و شمرَه نجات دِهم.
7
و می قؤم چَأکونم و شیمی خدا بم. وختی کی شمرَه جی مصریانِ بردگی جَه نجات بدَم شومَأن فَهمیدی کی من یَهوَه، شیمی خدایم.
8
و شمرَه بورم و به او سرزمینی فَأرسَأنم کی وَعده بدَم و قسم بوخوردم کی اونَ شیمی اَجداد، ابراهیم و اسحاق و یعقوبَ فَأدم. من او سرزمینَ تا اَبد شمرَه فَأدم. من یَهوَه یم.»
9
و موسی اونچی یَ کی خدا بفرماسته بو، همه یَ بنی اسرائیلِ رِه بوگوفت، ولی اوشَأن موسی گبَأنَ گوش نوکودد، چره کی بردگی کودَأن و کارایِ سخت و دوشوارِ وَسی، اوشَأنِ روح خوردَ بوسته بو.
10
و خداوند موسی دِخَأد و بوگوفت:
11
«بوشو و فرعونَ بوگو کی بنی اسرائیلَ خو سرزمینِ جَه آزادَ کونه و وَألِه کی بوشود.»
12
موسی خداوندِ حضورَ عرض بوکود:«بنی اسرائیل می گبَأنَ گوش نوکوند، پس چوطو انتظار بِدَأرم فرعون می گبَ گوش بوکونه؟ من نِتَأنم خُب گب بزنم»
13
و اَطو خداوند موسی و هارونَ اَمر بوکود و اوشَأنَ اوسِه کود، بنی اسرائیل و فرعونِ ورجَه تا بنی اسرائیلَ مصرِ جَه بیرون بأورد.
14
و اَن بنی اسرائیلِ طایفه یانِ سرانِ نامه: رِئوبین، کی یعقوبِ پیله زَأی بو چهار تَه پسر دَأشته؛ حَنوک، فَلّو، حَصرون و کَرمی، اَشَأن هر کودام ایتَه طایفه پئر بُد، کی اوشَأنِ طایفه هم به اوشَأنِ نام دِخَأده بوسته.
15
شمعون شیش تَه پسر دَأشته؛ یِموئیل، یامین، اُوهَد، یاکین، صوحَر، و شائول کی اونِ کنعانی زنِ پسر بو، اَشَأن شمعونِ طایفه یان بود.
16
لاوی صد و سی و هفت سال عُمر بوکود و سه پسر دَأشته؛ جِرشون، قُهات و مِراری. اَشَأن طایفه یانی پئر بُد کی به هَشَنِ نام دِخَأدِه بوستد.
17
جِرشون لاوی پسر، دو تَه پسر دَأشته کی لِبِنی و شِمعی نام دَأشتِد کی هر کودام خوشَأنِ رِه طایفه بوبُستد.
18
قُهات لاوی پسر هم صد و سی و سه سال عُمر بوکود و چهار تَه پسر دَأشتِه؛ عَمرام، یِصهار، حَبرون و عُزّیئیل.
19
و مِراری لاوی پسر، دو پسر دَأشتِه؛ مَحلی و موشی. همۀ اَشَأنی کی اَشَأنِ نام بأمو لاوی قبیله طایفه یان بُد.
20
و عَمرام، قُهاتِ پسر و لاوی نوه، صد و سی و هفت سال زندگی بوکود و خو عَمجأن «یوکابد» مرَه ازدواج بوکود. یوکابد عَمرامِ رِه هارون و موسی بأورد.
21
و یِصهار پسرَأن اَشَأند؛ قورَح، نافِج و زِکری.
22
و عُزّیئیل پسرَأن اَشَأند؛ میشائیل، ایلصافأن و سِتری.
23
هارون، عَمینادابِ دختر و نَحشونِ خأخور، «اِلیشابَع» مرَه ازدواج بوکود، و اِلیشابَع هارونِ رِه؛ ناداب و اَبیهو و اِلعازر و ایتامارَ بودونیا بأورد.
24
و قورَح پسرَأنِ نام؛ اَسّیر، اِلقانَه و اَبیاساف بو. اَشَأن قورَح طایفه، خاندانانِ سراند.
25
اِلعازر هارونِ پسر، ایتَه جی فوتیئیلِ دخترانِ مرَه ازدواج بوکود کی اون اِلعازر رِه فینِحاسَ بودونیا بأورد. اَشَأن لاوی قبیله، و طایفه یان و اوشَأنِ خاندانانِ سرانِ نام بو.
26
هارون و موسی یَ کی نام بوبوردیم، هو کسانی بُد کی خداوند اوشَأنَ بوگوفت:«بنی اسرائیلَ همۀ اونِ طایفه یانِ مرَه جی مصر بیرون بأورید»
27
و هارون و موسی بوشود فرعونِ ورجَه و اونِ مرَه گب بزَد و بوگوفتد:«بنی اسرائیلَ مصرِ جَه آزادَ کون.»
28
ایروز خداوند موسی مرَه مصرِ سرزمینِ دورون گب بزَه
29
و بفرماست:«من یَهوَه یم، و هر چی کی ترَه گوفتَأن درم، اونَ فرعونَ بوگو»
30
و موسی خداوندِ حضورَ عرض بوکود:«من جودم و نِتَأنم خُب گب بزنم، چوطو انتظار بِدَأرم کی فرعون می گبَأنَ گوش بوکونه؟»