1
جی نخای آبی و بنفش و سرخ، و خُرمه کتانِ ریزبافت، قُدسِ خدمت کودَأنِ رِه رختانیِ بِبافتد، هارونِ کاهنِ رِه هم رختایِ مُقدسی کی خدا موسی یَ اَمر بوکوده بو بودوختد.
2
و ایفودَ جی طلا و نخای آبی و بنفش و سرخ، و کتانِ ریزبافت چَأکودد.
3
و طلا جَه نازک رشته چَأکودد، و رشته یانَ نخای آبی و بنفش و سرخِ اَمرَه بِبافتد.
4
ایفودِ رِه دو تَه سرشانه چَأکودد کی ایفودِ دو تَه تیکه یَ، یعنی اونِ پوشت و جولویَ به هم وصلَ کوده، و اَطو ایفود یک تیکه بوبُست.
5
و ایفودِ کمرشال هونِ جِنسِ جَه بو، و جی طلا، و خُرمه نخایِ آبی و بنفش و سُرخ، و نازک کتان بِبافته بوبُسته بو
6
و دو تَه سنگِ عقیقَ، قابِ طلایی میأن بِنَأد و بنی اسرائیلِ طایفه یانِ نامَأنَ اوشَأنِ رو حَک بوکودد، هوطویی کی مُهرِ رو حَک کوند.
7
بازن اوشَأنَ ایفودِ سرشانه یانِ رو نصب بوکودد، تا سنگهای یادآوری بیبِه بنی اسرائیلِ قؤمِ رِه، همه یَ او جوری چَأکودد کی خدا موسی یَ فرمان بدَه بو.
8
و سینه بند هم خیلی ماهرانه ایفودِ مَأنستَأن، جی نخای آبی و بنفش و سرخ و کتانِ ریزبافت بودوختد.
9
سینه بندَ چهارگوش و دولا چَأکودد، و اونِ هر گوش بیست و دو سانتی متر درازا دَأشته.
10
و چهار ردیف سنگِ گرانقیمت اونِ رو نصب بوکودد. ردیفِ اولِ سنگان، سُرخ عقیق و زردِ یاقوت و لَعل بو.
11
و دومی ردیفِ سنگان زُمُرد و سرخِ یاقوت و اَلماس،
12
و سومی ردیفِ رو فیروزه و سفید عَقیق و بنفشِ یاقوت،
13
و چهارمی ردیفِ رِه یاقوتِ کبود و عَقیقِ جگری و یَشم نصب بوکودد.
14
سنگان دوازدَه تَه بود، هوطو کی بنی اسرائیل دوازدَه تَه قبیله دَأشتِه، و هر کودامِ رو ایتَه جی یعقوبِ پسرانِ نام، مُهرِ مَأنستَأن حَک بوبُسته بو.
15
و سینه بندِ رِه جی طلایِ خالص زنجیرانی چَأکودد کی لافندِ مَأنستَأن بتابانِه بود.
16
دو تَه قابِ طلا و دو تَه حلقه جی طلا چَأکودد و دو تَه حلقه یَ سینه بندِ دو تَه گوشِ جَه دوَستد.
17
و دو تَه طلایی زنجیرَ، اون دو تَه حلقه کی سینه بندَ وصلَ بوسته بو میَأنِ جَه ردَ کودد.
18
و زنجیرِ او سرَانَ دو تَه طلایی قابَ دوَستد، و ایفودِ جولو سرشانه یانِ رو وصلَ کودد.
19
و دو تَه طلایی حلقه دیگر بسَأختد و سینه بندِ بیجیری گوشه داخلی لبه رو، یعنی ایفودِ طرف وصلَ کودد.
20
و دو تَه طلایی حلقۀ دیگرم چَأکودد و ایفودِ جولو و کمی بوجُرتر جی کمرشال نصب بوکودد.
21
و سینه بندِ حلقه یانَ نخِ آبی اَمرَه ایفودِ حلقه یانَ دوَستد، تا سینه بند خُب ایفودَ وصلَ بِه. دقیقاً هوطویی کی خداوند موسیَ اَمر بوکوده بو.
22
و ایفودِ عَبایَ جی آبی رنگه پارچه و خُرمه چی بِبافتد.
23
و سرِ ردِ بوستَأنِ وَسی عَبا وسطِ جَه، ایتَه شِکاف اوسَأدد کی زِره مَأنستَأن بو، و ایتَه حاشیه اونِ دؤرَ بودوختد تا درز، پارَه نیبِه.
24
نخایِ آبی و بنفش و سُرخ، و کتانِ ریزبافتِ اَمرَه، مَأنگوله عَبا دامنِ دؤر بودوختد.
25
و زنگوله یانی جی طلایِ خالص چَأکودد، و دامنِ دؤرِ جَه، اون مَأنگولِه میَأن وَألاخَأند.
26
زنگوله یان و مَأنگوله یَأنَ ایتَه درمیَأن دامنِ دؤر بودوختد. اَ دامنَ خدمت کودَأنِ موقع دوکودد. هوطویی کی خدا موسیَ اَمر بوکوده بو.
27
بافنده یان، هارون و اونِ پسرأنِ پیرهَنانَ ، جی کتانِ نازک بودوختد.
28
و اوشَأنِ عَمامه و کُلاهَ جی کتانِ نازک و تونوکه یانَ جی خُرمه کتانِ نازک بودوختد.
29
و خُرمه کتانِ نازکِ جَه کمرشال هم بِبافتد و اونِ رویَ نخای آبی و بنفش و سُرخَ اَمرَه گولدوزی بوکودد. دقیقاً هوطو کی خداوند موسیَ فرمان بدَه بو.
30
ایتَه نیم تاج هم جی طلایِ خالص چَأکودد و اَ کلماتَ هوطویی کی مُهرِ رو حَک کوند، اونِ رو حَک بوکودد:«وقف بوبُسته خدا رِه»
31
و ایتَه آبی نخ اونَ دوَستد تا بِتَأند اونَ عَمامه یَ دوَدد، هوطو کی خدا موسی یَ بفرماسته بو.
موسی جی خیمه دیدن کونه
32
پس خیمه کار تومامَ بوست، و بنی اسرائیل، خیمه یَ دقیقاً هوطویی چَأکودد کی خدا موسی یَ بفرماسته بو.
33
بازن خیمه یَ بأوردد موسی ورجَه، خیمه و همۀ اونِ لوازمَ، قُلابان و دکمه یَأنَ، تخته یان و پوشت بندان و ستونان و اوشَأنِ پایه ئَان،
34
پوششی کی قوچِ پوستِ جَه چَأکوده بوبُسته و سرخ رنگ بوبُسته بو، و پوششی کی جی خَز چَأکوده بود، و قُدس و قُدس اَلاقداسِ مابینِ پرده یَ،
35
و صندوقِ عهد و اونِ عَصایان و اونِ سرپوشَه یا تختِ رحمتَ، کی کفاره جایگاه بو،
36
میز و همۀ اونِ وسایل، و مقدسِ نان،
37
چراغدانی کی طلایِ خالصِ اَمرَه چَأکوده بوبُسته بو و اونِ چراغانِ اَمرَه، و روغنی کی چراغِ شین بو.
38
مذبح طلایی، مسح کودَأنِ روغن و بوخور خوش عَطر و خیمه دروازه پرده.
39
و بُرنزی مذبح و اونِ منقل و عَصایان و همۀ اونِ وسایل، حوض و اونِ پایه ئَن.
40
و حیاطِ پرده یان، و ستونان، و پایه ئَن، و حیاطِ دروازه پرده، و لافندَأن، و میخَأن، و همۀ ظرفایی کی خیمۀ عبادتِ دورون ایستفاده بوسته.
41
و رختایی کی خدمتِ قُدسِ رِه بِبافته بوبُسته بو، یعنی هارونِ کاهنِ مُقدسِ رخت، و رختایی اونِ پسرانِ رِه تا کهانت بوکوند.
42
همۀ اَشَأنَ بنی اسرائیل دقیقاً هوطویی چَأکودد کی خداوند موسی یَ فرمان بدَه بو.
43
موسی همه چیَه فَأندرست و بیده کی همه چی دقیقاً هوطویی یِه کی خداوند بفرماسته بو، و هَنه وَسی موسی همۀ اوشَأنَ برکت بدَه.