1
قربانی تمام سوزِ مذبحَ جی چوبِ اَقاقیا و چهار گوش بِساخت، کی هر گوشه دو نیم متر درازا دَأشتِه، و اونِ بُلندی هم یک و نیم متر بو.
2
مذبحِ چهار گوشه جَه چهار تَه شاخ چَأکود کی مذبحِ مرَه یکپارچه بو. و مذبحِ رویَ بُرنزِ اَمرَه روکش بیگیفت.
3
مذبحِ همۀ وسایلَ جی بُرنز چَأکود، یعنی دیگ و خاک انداز و کاسه و اَنبُر و آتشدانَ.
4
مذبحِ رِه ایتَه مَنقل مُشبک چَأکود و بیجیرتر جی اونِ لبه بنَه، یعنی تا نِصف مذبحِ بیجیر شوئِه.
5
و چهار تَه حلقه جی بُرنز چَأکود و مَنقلِ گوشه یانِ جَه وصلَ کود کی جابجا کودَأنِ رِه عصایانَ اونِ دورون بند.
6
عصایانم جی اَقاقیا چوب بِساخت و بُرنزِ اَمرَه روکش بیگیفت.
7
و جابجایی وَسی عصایانَ او حلقه یانِ میَأنِ جَه ردَ کود. مذبحِ دورون خالی بو و جی تخته چَأکوده بوبُستِه بو.
8
حوضَ جی بُرنز چَأکود، و اونِ بُرنزی پایه ئانَ، جی آینه یانی چَأکود کی زنانی کی خیمه درِ ورجَه خدمت کودد، هدیه فَأدَه بود.
9
بازن حیاطَ چَأکود، حیاطِ جنوبِ طرفِ پرده یان، جی کتانِ نازکِ ریزبافت چَأکوده بوبُسته بو و اونِ درازا پنجاه متر بو.
10
و بیستَ ستون دَأشتِه و بیستَ پایۀ بُرنزی، و اونِ دکمه یَأن و پوشت بندان جی نُقره بو.
11
و شمالِ طرف هم، پنجاه متر درازا دَأشتِه و بیستَ ستون جی بُرنز، و اونِ دکمه یَأن و پوشت بندان جی نُقره بود.
12
و غربِ طرفِ رِه بیست و پنج متر پرده و دَه تَه ستون و دَه تَه پایه بساخت، و هر کودام جی ستونانِ رِه قُلاب و پوشت بند جی نقره چَأکود.
13
و شرقِ طرفِ دیوارِ درازا بیست و پنج متر بو.
14
و دروازه ایطرفِ پرده هفت و نیم متر بو، و سه تَه ستون دَأشتِه و سه تَه پایه،
15
و حیاطِ اوطرفِ پرده هم هفت و نیم متر بو و اوطرفم سه تَه ستون دَأشتِه و سه تَه پایه.
16
همۀ حیاطِ پرده یان جی نازک کتانِ ریزبافت بِبافته بوبُسته بو.
17
و همۀ ستونانِ پایه یَأن جی بُرنز بود، ولی دکمه یَأن و پوشت بندان و سرستونانِ روکش، جی نقره بو.
18
دروازۀ ورودی پرده جی کتانِ ریزبافت بِبافته و نخای آبی و بنفش و سُرخِ اَمرَه گولدوزی بوبُست. اونِ درازا دَه متر و حیاطِ پرده مَأنستَأن دو و نیم متر بلندی دَأشته.
19
و چهار تَه ستون دَأشته و چهار تَه پایه جی بُرنز، و اونِ دکمه یَأن و سرستونان و پوشت بندان جی نُقره بو.
20
خیمه و حیاطِ پرده میخَأن همه جی بُرنز بود.
21
اَن صورتِ موادی ایسه کی خیمۀ مقدسِ چَأکودَأنِ رِه بکار بوشو: موسی دستور بدَه کی اَ صورتَ بینیوسد، و لاویانی کی هارونِ پسر، ایتامارِ زیرِنظرِ جَه کار کودد اونَ بینیویشتد.
22
و بِصَلئیل، اوری پسر، حورِ نوه، کی یَهودا قبیله جَه بو، اونچی کی خداوند موسیَ دستور بدَه بویَ چَأکود.
23
و اُهولیاب، اَخیسامَکِ پسر، جی دانِ قبیله کی حَکاک و طراح و کتان بافِ ماهر بو و تَأنِسته نخای آبی و بنفش و سرخِ اَمرَه خُرمه گولدوزی بوکونه، اونَ یاور بدَه.
24
مقدار طلایی کی قُدسِ چَأکودَأنِ رِه بکار بوشو و همۀ اونَ مردم هدیه بأورده بود، هزار کیلو بو.
25
و سه هزار و چهارصد و سی کیلو نُقره، مُطابق قُدسِ مِعیار.
26
اَ مقدار نُقره جی شیشصد و سه هزار و پونصد و پنجاه نفر مردانه فَأگیفته بوبُسته بو کی بوجُرتر جی بیست سال سن دَأشتد، و سرشوماری دورون اوشَأنِ نام بینیویشته بوبُسته بو.
27
و اَ نقره یانِ مرَه، خیمه و پرده یانِ رِه صد تَه پایه چَأکودد، یعنی هر پایه رِه سی و چهار کیلو نقره استفاده بوکودد.
28
باقی نقره یَ کی سی کیلو بوستِه، دکمه و پوشت بند چَأکودَأن، و سرستونانِ روکش گیفتنِ رِه استفاده بوکودد.
29
و بُرنزی کی مردم هدیه بأوردد، دو هزار و چهار صد و بیست و پنج کیلو بو.
30
اَ بُرنزَأنِ مرَه خیمۀ عبادتِ درِ پایه هانَ، و مذبحِ بُرنزی و اونِ منقلَ و باقی وسایلی کی مذبحِ شین بویَ بساختد،
31
و حیاط و دروازه ورودی پایه یان، و همۀ خیمه و حیاطِ میخَأنَ چَأکودد.