1
و خداوند موسیَ بفرماست:
2
«اولین روز جی اولین ماه خیمۀ عبادتَ بپا بوکون.
3
صندوقِ عهدَ اونِ دورون بِنن و پردۀ مخصوصَ اونِ جولو وَألَأخَأن.
4
میز و اونِ ظرفَأنَ بأور و اونِ جا سر بنن. چراغدانم بأور و اونِ چراغانَ روشنَ کون.
5
مذبح طلایی یَ بوخورِ خوشبو سوزَأنِنِ رِه، صندوقِ عهدِ جولو جَه بِنن، و خیمه دروازه پرده یَ، خیمه درِ جولو جَه وَألأخَأن.
6
تمام سوزِ قربانی مذبحَ، خیمه درِ ورودی جولو جَه بِنن.
7
و حوضَ خیمه و مذبح مابینِ جَه بِنن و اونِ دورونَ آب دوکون.
8
خیمه حیاطِ پرده ای دیوارَ بپا بوکون و دروازه پرده یَ وَلأخأن.
9
مسح کودَأنِ روغنَ بیگیر و خیمه و هر اَسبابی کی اونِ درون نَهه رو فوکون، و اَطو همه چیَه خداوندِ رِه وقف بوکون تا پاک و مُقدس بیبِه.
10
بوخورِ خوشبو مذبح و اونِ ظروفِ رو هم مسحِ روغنَ فوکون تا اونم کاملاً تقدیس بیبِه.
11
حوض و اونِ پایه یَ مسح و تقدیس بوکون.
12
بازن هارون و اونِ پسرانَ بأور خیمۀ عبادتِ درِ ورجَه و اوشَأنَ غُسل بوکون.
13
مُقدسِ رختَ هارونَ دوکون و اونَ مَسح بوکون تا کهانتِ اَنجام دَئَنِ رِه پاک و مُقدس بیبِه.
14
بازن اونِ پسرأنَ جولو بأور و اوشَأنِ پیرهَنانَ اوشَأنَ دوکون.
15
و اوشَأنم مسح بوکون هوطویی کی اوشَأنِ پئرَ مسح بوکودی، تا بتَأند می کاهن بوبود و مرَه خدمت بوکوند. اوشَأنِ مَسح همیشگیه و تا اَبد اوشَأن، و اوشَأنِ نسل مرَه خدمت کوند و می کاهن بود.»
16
موسی همۀ اونچی کی خدا بفرماسته بویَ انجام بدَه.
17
در اولین روزِ اولین ماه، در دومین سالی کی جی مصر بیرون بأمود، خیمۀ عبادت بپا بوبُست.
18
و موسی خیمه یَ بپا بوکود، و اونِ پایه ئَنَ بنَه، بازن تخته یانَ پایه ئَنِ دورون بنَه و پوشت بندانَ وصلَ کود و ستونانَ بپا بدَأشت.
19
و خیمه پوششَ اونِ رو تَأوَأدَه و اوی تَه پوشش هم اونِ رو، هوطویی کی خدا موسی یَ بوگوفته بو.
20
و دو تَه لوحِ سنگی یَ کی دَه فرمان اوشأنِ رو بینیویشته بوبُسته بویَ بنَه صندوقِ عهدِ دورون، و عَصایانی کی صندوقِ جابجایی شین بویَ تَأوَأدَه حلقه یانِ دورون و صندوقِ سر پوشم کی تختِ رَحمت نام دَأشته یَ اونِ رو بنَه.
21
و صندوقَ بأورد خیمه دورون و پرده یَ اونِ جولو جَه وَألَأخَأنی، هوطویی کی خداوند بفرماسته بو.
22
بازن میزَ خیمه دورونِ شمالِ طرفِ جَه، پرده بیرون بنَه.
23
و نانِ مُقدسَ بنَه میزِ رو هوطویی کی خداوند موسی یَ بفرماسته بو.
24
و چراغدانَ بأورد خیمه دورون و بنَه میزِ روبرو خیمه جنوبِ طرفِ جَه.
25
و چراغانَ خدا حضورِ جَه روشنَ کود، هوطویی کی خدا موسیَ اَمر بوکوده بو.
26
و مذبحِ طلایی یَ خیمه دورون، پردۀ قُدسِ روبرو بنَه.
27
و بوخور خوشبو اونِ رو بوسوزَأنی هوطویی کی خدا موسی یَ اَمر بوکوده بو.
28
و خیمه دروازه پرده یَ وَألأخَأنی،
29
قربانی تمام سوزِ مذبحَ، خیمۀ دروازه روبرو بنَه، و اونِ رو سوختنی قربانی و هدیه آردی تقدیم بوکود.
30
بازن حوضَ، مذبح و خیمه مابینِ جَه بنَه و اونَ شوستَأنِ رِه آب پورَه کود.
31
و موسی و هارون، و هارونِ پسرأن، خوشَأنِ دس و پایَ اونِ دورون بوشوستد.
32
هر وخت اوشَأن شوده خیمۀ عبادتِ دورون و یا مذبح ورجَه شوده، مطابق اونچی کی خدا موسی یَ بفرماسته بو خوشَأنِ دس و پایَ حوضِ دورون شوستد.
33
بازن موسی خیمه و مذبحِ حیاطَ بپا بوکود، و حیاطِ دروازه پرده یَ وَألأخَأنی. و موسی همۀ کارانَ انجام بدَه.
34
اونموقع اَبری خیمۀ عبادتَ بوپوشَأنِه، و خداوندِ جلال خیمه یَ پورَه کود.
35
موسی نِتَأنِست خیمۀ عبادتَ بودورون بیشِه، چره کی اَبر اونِ رو ساکن بو و خداوندِ جلال خیمه یَ پورَه کوده بو.
36
هر موقع کی اَبر جی خیمه سرِ جُر ویریشته، بنی اسرائیلِ قؤم اونِ دونبال سر راه دکفتد و هَطو کوچ کودد.
37
و هر موقع اَبر تکان نوخورده، اوشَأنم حرکت نوکودد و خوشَأنِ جا سر ایسَده.
38
و همیشه روزِ رِه اَبر خیمۀ عبادتِ جُر قرار گیفته، و شبِ رِه، اَبرِ دورون آتش ظاهرَ بوسته، و اَطو اَبر، بنی اسرائیلَ اوشَأنِ سفرِ دورون هدایت کوده.