1
«بِصَلئیل و اُهولیاب و همۀ کسانی کی خداوند اوشَأنَ مهارت و فهم عطا بوکوده، وَأستی خیمۀ عبادتِ چَأکودَأنِ رِه مُطابق اونِ دستورأت کار بوکوند.»
2
بازن موسی بِصَلئیل و اُهولیاب، و همۀ کسانی کی استعداد خدایی دَأشتِد و مایل بود اَ کارَ انجام بدد دَ دعوت بوکود.
3
اوشَأن همۀ اون چیزانی کی بنی اسرائیل، قُدسِ چَأکودَأنِ رِه بأورده بود، موسی جَه تحویل بیگیفتد، ولی مردم هر روز صبحِ رِه بازم هدیه اَوردد.
4
پس اوستاکاران کی قُدسَ چَأکودَأن دوبود خوشَأنِ کارَ ولَ کودد و بأمود موسی ورجَه،
5
و موسی یَ بوگوفتد:«قؤم ویشتر جی اونچی کی لازمه تا خدا فرمانَ انجام بدیم هدیه اَورد.»
6
پس موسی هم دستور بدَه اُردوگاه دورون اعلام بیبِه:«هیچ زن و مردی دِ ویشتر جی اَن قُدسِ رِه هدیه نَأوره.» و اَطو بنی اسرائیل دِ هدیه نَأوردد.
7
چره کی اونچی کی تا اونموقع بأورده بود، کارِ تومامَ کودَأنِ رِه کافی بو، بلکی زیادَم اَمویِه.
مسکنِ چَأکودَأن
8
همۀ اوستاکارانی کی مشغول بود، عبادتِ خیمۀ دَه تَه پرده یَ، جی خُرمه کتانِ نازک، و پشمی نخایِ آبی و بنفش و سُرخ بِبافتد، و اوشَأنِ رو فرشته یانِ نگهبانِ نقشَ، ماهرانه گولدوزی بوکودد.
9
هر پرده طول دوازده متر، و اونِ عرض دو متر بو، و همه تَه ایتَه اندازه بود.
10
بازن پنج تَه پرده یَ با هم بودوختد و پنج تَه دیگرم با هم، و دو تَه پیله پرده بوبُست.
11
و پنجاه تَه حلقه جی کتانِ آبی هر کودام جی پرده یانِ لبه سر بودوختد.
12
پنجاه تَه حلقه ایتَه پرده، و پنجاه تَه حلقه اوی تَه پرده لبه سر، و اَن حلقه یان همدیگرِ روبرو نَهَه بود.
13
و پنجاه تَه دکمه طلایی چَأکودد و دو تَه پرده یانَ اَ دکمه یَأنِ اَمرَه به هم وصلَ کودد.
14
و سقفِ جُر رِه یازده پردۀ دیگر جی بُزِ پشم بِبافتد.
15
اَ یازده پرده همه ایتَه اندازه بود، همه پونزده متر درازا، و دو متر پهنا دَأشتِد.
16
پنج تَه پرده یَ بهم وصلَ کودد و شیش تَه دیگرم با هم.
17
هر کودامِ دو تَه پرده کناره جَه، پنجاه تَه جا تکمه ای بودوختد.
18
و پنجاه دکمه بُرنزی چَأکودد و اوشَأنِ مرَه اَ دو تَه پرده یَ به هم وصلَ کودد.
19
بازن خیمه سقفِ رِه، جی قوچِ پوست کی سُرخ رنگ بوبُستِه بو ایتِه پوشش چَأکودد، و بازن اونِ رو رِه ایتَه پوشش، جی نازکِ خَز.
20
و خیمه رِه تخته یانی جی چوبِ اَقاقیا بساختد.
21
هر تخته درازا پنج متر و اونِ پَهنا هفتاد و پنج سانتی متر بو.
22
هر تخته دو تَه زبانه دَأشتِه کی همدیگرِ قرینه بود، و اَطو هر کودامَه به اوی تَه وصلَ کودد.
23
و همۀ خیمه تخته یانَ هَطو چَأکودد. خیمه جنوبِ طرف، بیست تَه تخته دَأشتِه.
24
و چهل تَه پایه نُقره ای بیست تَه تختِه رِه چَأکودد، و هر تخته خو پایه اَمرَه، زبانِه مرَه اوی تَه تخته یَ مُتصلَ بوسته.
25
و خیمه شمالِ طرفِ رِه، بیست تَه تخته چَأکودد.
26
و چهل تَه پایه جی نُقره بِساختد، یعنی دو پایه هر ایتَه تخته رِه.
27
و خیمه پوشتِ رِه کی مغربِ طرف نَهه بو، شیش تَه تخته بِساختد.
28
و خیمه پوشتِ گوشه یانِ رِه هم دو تَه تخته دیگر بِساختد.
29
اَ دو تَه تخته یانِ گوشه یان، جی بیجر تا بوجُر به هم مُتصل بو و ایتَه حلقه یَ دَوَسته بوسته.
30
پس مغربِ طرفِ رِه هشت تَه تخته و شونزدَه تَه نُقره ای پایه چَأکودد. یعنی هر تخته جیرِ وَسی دو تَه پایه.
31
بازن جی چوبِ اَقاقیا پوشت بند بِساختد. پنج تَه پوشت بند، خیمه ایطرفه تخته یانِ رِه.
32
و پنج تَه پوشت بندم اوطرفه تخته یانِ رِه، و پنج تَه پوشت بندم خیمه انتها رِه کی مغربِ طرف نَهَه بو.
33
و پوشت بندِ میَأنی یَ جوری چَأکودد کی تخته هانِ وسطِ جَه ردَ بوستِه، و جی اَسر تا اوسر درازا دَأشتِه.
34
تخته یان و پوشت بندانَ طلا اَمرَه روکش بیگیفتد، و حلقه یانِ طلایی چَأکودد تا پوشت بندَأنَ تخته یانِ رو بدَأرد.
35
پرده ای کی قُدس و قُدس اَلاقداسِ مابین نَهَه بویَ جی خُرمه کتانِ ریزبافت و نخای آبی و بنفش و سُرخ بِبافتد، و فرشته یانِ نگهبانِ نقشَ اونِ رو گولدوزی بوکودد.
36
و اَ پرده رِه چهار تَه ستون جی چوبِ اَقاقیا بِساختد و ستونانَ طلا اَمرَه روکش بیگیفتد. و اوشَأنِ رِه جی طلا قُلاب و جی نقره پایه چَأکودد.
37
و خیمه دروازه رِه جی نازکِ کتان و پشمای آبی و بنفش و سُرخ ایتَه پرده بِبافتد.
38
اَ پرده پنج قُلابِ اَمرَه، پنج تَه ستونَ دوَسته بوبُستِه، و ستونانِ پنج تَه پایه جی بُرنز بو، و سرستونان و قُلابان جی طلا بود.