35

¹ موسی همۀ بنی اسرائیلِ مردمَ جمعَ کود و اوشَأنَ بوگوفت:«اَ قوانینی ایسِه کی خدا بفرماستِه و شومَأن وَأستی اَنجام بدید، ² شیش روز وَأستی کار بوکونید، و روزِ هفتم، روزِ مُقدس و مخصوصِ خداونده، اَ روزِ دورون استراحت بوکونید. هر کی اَ روزِ دورون کار بوکونه وَأستی بیمیره. ³ و روزِ سبَّتِ رِه شیمی خانه یانِ دورون آتش روشنَ نوکونید.» ^{4 5} موسی همۀ بنی اسرائیلِ جماعتَ بوگوفت:«اَن اَمری ایسِه کی خداوند فرمان بدَه دَأره و بفرماستِه؛ جی اونچی کی خودتَأن دَأرید هدیه ای خداوندَ تقدیم بوکونید. هر کی جی تَه دیل راضیه اَ چیزَأنَ خداوندِ رِه هدیه بأوره؛ طلا و نُقره و بُرنز، ⁶ نخِ پشمی ایی کی آبی و بنفش و سرخ بیبِه، ریزبافتِ کتان، بُزِ پَشم، ⁷ قوچِ پوست کی رنگِ سُرخ بوبُستِه بِه، خُرمه خَز، اَقاقیا دارِ چوب، ⁸ چراغانِ رِه روغن، اَدویه و بوخورِ خوشبو روغنِ مسح رِه، ⁹ سنگهایِ عقیق و قیمتی ایفود و سینه بندِ وَسی. ¹⁰ شیمی میَأن هر کسی مهارتی دَأره بَأیِه و اونچی کی خدا بفرماسته دَأره یَ چَأکونه. ¹¹ خیمه و اونِ پوشش و اونِ دکمه یَأن و اونِ تخته یَأن و اونِ پوشت بندَأن و اونِ ستونَأن و اونِ پایه یَأن، ¹² و صندوقِ عهد و اونِ عَصایان و تختِ رحمت، و قُدس و قُدس اَلاقداسِ مابین پرده، ¹³ میز و اونِ عَصایان و همۀ اونِ وسایلِ اَمرَه، نانِ مُقدس، ¹⁴ روشنایی رِه چراغدان همۀ اونِ وسایلِ اَمرَه، هو چراغان و روشنایی رِه روغن. ¹⁵ بوخورِ مذبح، اونِ عَصایانِ مرَه، بوخورِ خوشبو و مسح کودَأنِ روغن، خیمۀ دروازه رِه پرده، ¹⁶ و قربانی تمام سوزِ رِه مذبَح، و هونِ بُرنزی مَنقل، هونِ عَصایان و همۀ اونِ وسایل، و تشتِ بُرنزی اونِ پایِه هانِ اَمرَه. ¹⁷ خیمه حیاطِ پرده یان و اونِ ستونَأن، اونِ پایه اَن و حیاطِ دروازه رِه پرده. ¹⁸ خیمه میخَان و حیاطِ میخَان و هوشَأنِ لافندَأن. ¹⁹ و رختایِ بِبافته بوبُسته ای کی قُدسِ رِه بکار اَیَه، یعنی هارونِ کاهنِ مُقدسِ رَخت، و اونِ پسرأنِ رختَأن کی کهانتِ موقع وَأستی دوکوند.» ²⁰ بازن همۀ بنی اسرائیلِ مردم جی موسی ورجَه بوشُد. ²¹ و همۀ مردمی کی مایل بود وَأگردستد و خدا رِه هدیه بأوردد، تا رختای مُقدسِ دوختن و خیمۀ مُقدس، و اونِ لوازم چَأکودَأنِ رِه بکار بَأیِه. ²² همۀ مردمی کی جی دیل راضی بود، جی زن و مرد بأمود، و گوشواره و اَنگوشتر و دوماغ حَلقه و گردن بند و همه جور زیورآلاتِ طلا خوشَأنِ مرَه بأوردد و خداوندَ هدیه بوکودد. ²³ و هر کسی کی خُرمه کتان، و نخِ پشمی آبی و بنفش و سرخ، و یا بُزِ پشم و قوچِ پوستَ کی سُرخ رنگ بوبُستِه بو، و یا خَز، دَأشتِه بأورد. ²⁴ بعضیانم نُقره و بُرُنز هدیه بأوردد و بعضیانم کی اَقاقیا دارِ چوبَ دَأشتِد بأوردد. ²⁵ همۀ زنَأکانی کی ریسندگی جَه مهارت دَأشتِد، خُرمه کتان و پشمی پارچه یانی کی خودشأن بِبافته بودَ بأوردد، کی آبی و بنفش و سرخ رنگ بوبُسته بو. ²⁶ و همۀ زنَأکانی کی اوشَأنِ دیل خَأستِه خوشَأنِ مهارتَ بکار بیگیرد، جی بُزِ پشم نخ رِسِدِه. ²⁷ قؤمِ رهبرانم ایفود و سینه بندِ رِه سنگهای عقیق و سنگایِ گِران قیمت بأوردد. ²⁸ و انواع عَطر، روشنایی رِه روغن، و مسح کودَأنِ رِه روغن، و بوخور خوشبو هدیه بأوردد. ²⁹ پس همۀ بنی اسرائیلِ زنأکأن و مردکأنی کی مایل بود کمک بوکوند، خداوندِ رِه چیزایِ با ارزش هدیه بأوردد تا اون چیزایی کی خداوند موسی یَ اَمر بوکوده بو چَأکودنِ وَسی بکار بَأیِه. ³⁰ بازن موسی بنی اسرائیلَ بوگوفت: «بدَأنید کی خداوند بِصَلئیل اوری پسر و حور نوه یَ جی یَهودا قبیله انتخاب بوکوده، ³¹ و اونَ خدا روحِ اَمرَه پورَه کوده، و اونَ مهارت و فَهم و دانش بِبِخشِه دَأره تا هر جور صنعتِ دورون بِتَأنِه کار بوکونه. ³² و جی طلا و نُقره و بُرنز بِتَأنِه نقشهایِ هنری چَأکونه. ³³ و بِتَأنِه سنگ بتراشِه و چوب اَمرَه وسیله چَأکونه، و همه جور صنعت بدَأنِه. ³⁴ و اون و اُهُولیاب، اَخیسامَکِ پسر، جی دانِ قبیله یَ، اَ قدرتَ بدَه دَأره تا بِتَأند دیگرانَ تعلیم بدد. ³⁵ خدا اَشَأنَ مهارت بِبِخشِه دَأره تا هر کاری کی حَکاکان و طراحان و گولدوزان، نخایِ آبی و بنفش و سرخِ اَمرَه کتانِ ریزبافتِ رو کوند، یعنی کارانی کی صنعتگران و ماهرِ طراحان انجام دهدَه، خودشَأن انجام بدد.»