32

¹ وختی قؤم بیدد کی موسی خیلی وخته بوشو دَأره کوه جُر و وَأنگردستِه، قؤم هارونِ دؤر جمعَ بوستد و بوگفتد: «ویریز و اَمرِه ایتَه خدا چَأکون تا اَمرَه راهنمایی بوکونه، چره کی نَأئنیم اَ مردای موسی سر، کی اَمرَه جی مصر بیرون بأورد چی بلا بأمو دَأره.» ² هارون جواب بدَه:«گوشواره یانی کی شیمی زنان و دخترأن و پسرأنِ گوشِ دورون نَهَه یَ بیرون بأورید و بأورید می ورجَه.» ³ پس همۀ قؤم خوشَأنِ طلایی گوشواره یانَ کی اَشَأنِ گوشِ دورون نَهَه بویَ بیرون بأوردد و بوبوردد هارونِ ورجَه. ⁴ هارون اوشَأنَ مردمِ دسِ جَه بیگیفت و ذوب بوکود و قلمِ اَمرَه شکل بدَه و ایتَه مُجسمه گوساله مَأنستَأن چَأکود. اونموقع اوشَأن بوگوفتد:«ای اسرائیل، اَن اَمی خُدایِه کی اَمرَه جی مصر بیرون بأورد.» ⁵ هارون اَنَ کی بیدِه، گوساله روبرو جَه ایتَه مذبَح چَأکود و اعلام بوکود:«فردا یَهوَه عیده» ⁶ پس قؤم صبح دمِ رِه ویریشتد و سلامتی رِه هدیه بأوردد و قُربانی تمام سوز تقدیم بوکودد، بازن بینیشتد بوخوردد و وَأخوردد، و شروع بوکودد وَشتَن کودَأن و کارای شرم آور انجام بدَأد. ⁷ اونموقع خداوند موسی یَ بفرماست: «توند بوشو بیجیر، چره کی تی اَ قؤم کی جی مصر بیرون بأوردی فاسدَ بوسته دَأرد. ⁸ به هَ زودی جی او راهی کی اَشَأنَ اَمر بوکوده بؤم مُنحرفَ بوستد، و خوشَأنِ رِه ایتَه گوساله چَأکودد و اونِ رِه قُربانی بوکودد و اونِ جولو سُجده کوند، و گویده کی ای اسرائیل اَن تی خدایِه کی ترَه جی مصر بیرون بأورد.» ⁹ و خداوند موسی یَ بوگوفت:«من دَأنم کی اَ قؤم چقده نافرمانه، ¹⁰ تو دِه اَشَأنِ رِه شفاعت نوکون، چره کی اَشأنِ دسِ جَه عصبانیم و خَأیم می خشمَ اَشَأنِ رِه شُعله ور بوکونم و همه تَه یَ جی میَأن بوبورم، بازن تی جَه ایتَه پیلدانه قؤم به وجود اَورم.» ¹¹ پس موسی خو خدا، یَهوَه یَ التماس بوکود و بوگوفت:«ای خداوند، چی وَسی وَأستی تی خشم شُعله ور بیبِه تی قؤمِ رو؟ قؤمی کی قدرتی عظیم و دسی قوی مرَه اونَ جی مصر بیرون بأوردی. ¹² چره مصریان بوگوید؛ اوشَأنَ به قصد بد بیرون بوبورد، تا اوشَأنَ کوه هانِ دورون بوکوشه و جی میَأن بوبوره؟ پس تی خشمِ جَه وَأگرد و تی قؤمِ رو بلایی نازل نوکون. ¹³ تی بنده یان ابراهیم و اسحاق و اسرائیلَ به یاد بأور، کی اوشَأنِ وَسی خودتِ ذاتَ قَسم بوخوردی و اوشأنَ بوگوفتی؛ شیمی نسلَ آسمان ستاره یانَ مَأنستَأن زیادَ کونم، و همۀ اَ سرزمینَ کی اونِ جَه شمرِه گب بزَمَه، شیمی نسلَ بخشم، کی تا اَبدالآباد اوشَأنِ شین بیبِه.» ¹⁴ بازن خداوند جی اون بلایی کی بوگوفته بو خو قؤمِ سر اَوره، صرف نظر بوکود. ¹⁵ بازن موسی اون دو تَه لوحِ سنگی یَ بدس بیگیفت و جی کوه بیجیر بأمو. هر دو لوحِ پوشتُ رو بینیویشتِه بوبُسته بو. ¹⁶ اَ لوحانَ خدا خودش چَأکوده بو و اَحکامَ اوشَأنِ رو حَک بوکوده بو. ¹⁷ وختی یوشَع قؤمِ آوازَ بیشتَأوست کی فریاد کوند، موسی یَ بوگوفت:«اُردوگاه جَه صدای جنگ اَیِه» ¹⁸ موسی جواب بدَه:«اَ صدایَأن نه پیروزی صدایه، نه شکسته صدا، بلکی آواز خانانِ صدایه کی به می گوش فَأرِسه.» ¹⁹ وختی موسی اُردوگاهَ نزدیکَ بوست و گوساله، و مردمی کی اونِ دؤر وَشتَأن کودَأن دوبودَ بیدِه، عصبانی بوبُست و کوهپایه میَأن لوحهانَ بِئگَأد زمین و بیشکینه. ²⁰ بازن اون گوساله ایی کی اوشَأن چَأکوده بودَه بیگیفت و آتشِ دورون بوسوزَأنِه و پودرِ مَأنستَأن اونَ خوردَه کود، و آبِ رو بِپاشَأنِه و اون آبَ بنی اسرائیلَ وَأخورأنِه. ²¹ موسی هارونَ بوگوفت:«اَ قؤم ترَه چی بدی بوکوده بو کی اَشَأنَ به هَ پیلِکی گوناه آلوده بوکودی؟» ²² هارون جواب بدَه:«آقا عصبانی نوبون. تو خودت اَ قؤمَ شِنَأسی کی بدی کودَأنَ دوس دَأرد. ²³ اوشَأن مِرَه بوگوفتد؛ اَمرِه ایتَه خدا چَأکون کی اَمی پیشاپیش راه بیشِه، چره کی نَأئنیم اَ مردای موسی سر، کی اَمرَه جی مصر بیرون بأورد چی بلایی بأمو دَأره. ²⁴ پس منم اوشَأنَ بوگوفتم؛ هر کی طلا دَأره بیرون بأوره، پس اوشَأنم خوشَأنِ زیور آلاتِ طلایی یَ می ورجَه بأوردد و منم همۀ طلایانَ آتشِ دورون تَأوَأدم و اَ گوساله بیرون بأمو.» ²⁵ وختی موسی بیده کی قؤم یاغی بوبُستِه دَأره، چره کی هارون قؤمَ ولَ کوده بو تا خوشَأنِ دوشمنانِ ورجَه بی آبرو بوبود. ²⁶ بوشو اُردوگاه دروازه جولو جَه بپا بِئسَه و فریاد بوکود و بوگوفت: «هر کی خداوند سره، می ورجَه بأیِه.» پس همۀ لاوی قبیله بوشُد موسی ورجَه. ²⁷ موسی اوشَأنَ بوگوفت:«یَهوَه اسرائیلِ خدا اَطو فرمایِه؛ هر کی خو شمشیرَ خو کمر دوَده و جی اَ سرِ اُردوگاه تا او سرِ اُردوگاه بیشِه و خو برَأر و دوست و خو همساده یَ بوکوشه.» ²⁸ پس لاویان هوطو کی موسی بوگوفته بو عمل بوکودد، و او روزِ رِه نزدیکِ سه هزار نفرَ بوکوشتد. ²⁹ بازن موسی بوگوفت: «ایمروز، خودتَأنَ خداوندِ رِه وقف بوکودید، با اَنکی دَأنستید شیمی ایطاعت کودَأن شیمی پسرأن و برَأرأنِ جانَ فَأگیره، ولی بازم نافرمانی نوکودید، خداوند شمرَه برکت بده.» ³⁰ فردایی صبحِ رِه موسی قؤمَ بوگوفت:«شومَأن ایتَه پیله گوناه بوکوده دَأرید. هَسَه من شؤم کوه جُر خداوندِ ورجَه، شاید بتَأنم شیمی گوناهِ رِه کفاره بوکونم.» ³¹ پس موسی وَأگردست خداوندِ ورجَه و بوگفت:«آه ای خداوند، اَ مردم ایتَه پیلدانه گوناه بوکودد، اوشَأن خوشَأنِ رِه خدایی جی طلا چَأکودد. ³² هَسَه اگر بِهِه اوشَأنِ گوناهَ ببخش، وگرنه مِرَم جی اون دفتری کی بینیویشته ای، محوَ کون.» ³³ خداوند موسی یَ جوابَ بدَه و بوگوفت:«هر کسی کی گوناه بوکوده اونَ می دفترِ جَه مَحوَ کونم. ³⁴ هَسَه بوشون و اَ قؤمَ به اون جایی کی ترَه بوگوفتم راهنمایی بوکون، و می فرشته، تی پیشاپیش راه شِه، و من بموقع قؤمَ اوشَأنِ گوناه وَسی جزا دهم.» ³⁵ و خداوند اون گوساله ای وَسی کی قؤم هارونِ دسِ مرَه چَأکوده بود، اوشَأنِ رو بلایی نازل بوکود.