1
خداوند موسیَ بفرماست:
2
«من بَصَلئیل، اوری پسر، حورِ نوه یَ جی یهودا قبیله انتخاب بوکودِم،
3
و اونَ خدا روحِ اَمرَه پورَه کودم. اونَ هر جور هنر و صنعتِ رِه حِکمت و فَهم و دانش فَأدَه دَأرم.
4
تا بِتَأنِه اُستادانِه طلا و نُقره و بُرنزِ اَمرَه کار بوکونه.
5
و بِتَأنه سنگ بِتَراشه اونِ رو جواهرکاری بوکونه، و نجاری و خراطی بِدَأنِه و هر صنعتی میَأن مهارت بدَأره.
6
و اُهُولیاب، اَخیسامَکِ پسر جی قبیله دانَ، اونِ دسیار تعیین بوکودم، و همۀ اوستاکارانی کی اَشَأنِ مرَه کار کوندَه حِکمت بِبِخشم دَأرم تا اونچی کی ترَه اَمر بوکودمَه چَأکوند.
7
خیمۀ عبادت و صندوقِ عهد و تختِ رَحمت و همۀ خیمه وسایلَ،
8
میز و همۀ اونِ اسبابَ، چراغدان کی طلایِ خالصِ جَه یه و همۀ اونِ وسایل، بوخورِ مذبح،
9
قربانی تمام سوزِ مذبح و همۀ اونِ وسایلِ اَمرَه، حوض و اونِ پایه ئَن،
10
هارونِ کاهنِه مُقدس رخت، و اونِ پسرأنِ رخت کی وَأستی کهانتِ رِه دوکوند.
11
و مَسح کودَأنِ روغن و مُعطرِ بوخور قُدسِ رِه، همۀ اَشَأنَ هوطویی کی ترَه اَمر بوکودم چَأکوند.»
سبَّت
12
بازن خداوند موسیَ بفرماست:
13
«بنی اسرائیلَ بوگو؛ می سَبّتانَ کی می روزِ مخصوص و روزِ استراحت یَ بدَأرید، چره کی اَن نیشانی بِهِه من و شیمی میَأن و شیمی نسلانِ میَأن، تا بدَأنید من یَهوَه یم کی شُمرَه تقدیس بوکوده دَأرم.
14
پس سَبّتَ بِدَأرید چره کی شُمرِه مُقدسه، هر کی سبّتَ بی حُرمتی بوکونه، وَأستی بیمیره و هر کی اَ روزِ دورون کار بوکونه وَأستی قؤمِ جَه اِخراجَ بِه.
15
شیش روزِ هفته وَأستی کار کودَأن، اما روزِ هفتم، روزِ سبَّته و روزیه کی وَأستی استراحت کودَأن، اَ روز مُقدسه و خداوندِ شینه، هر کی اَ روزِ دورون کار بوکونه وَأستی بیمیره.
16
پس بنی اسرائیل وَأستی سبَّتَ بدَأرد و اونَ ایتَه عهدِ اَبدی مَأنستَأن نسل در نسل بجا بأورد.
17
اَ ایتَه عهد و نیشانِ اَبدی منو بنی اسرائیلِ قؤمِ میَأنِه، چره کی خداوند شیش روزِ میَأن آسمان و زمینَ چَأکود، ولی روزِ هفتم آرام بیگیفت و استراحت بوکود.»
18
وختی کی خداوندِ گب زَئَن موسی مرَه تومامَ بوست، دو تَه لوحِ شهادت، یعنی دو لوحِ سنگی اونَ فَأدَه کی خودشِه اَنگوشتِ مرَه خو اَحکامَ اونِ رو بینیویشته بو.