1
بوخور سوزَأنِنِ وَسی چوبِ اَقاقیا مرَه ایتَه مذبح چَأکون.
2
مذبح مربع بیبِه، اونِ درازا نیم متر و اونِ بلندی یک متر، و اونِ چهار گوش چهار تَه زائده شاخِ مَأنستَأن بدَأره.
3
اونَ طلایِ خالصِ اَمرَه روکش بیگیر، هم اونِ رویَ هم اونِ دؤرَ و هم اونِ شاخانَ. و ایتَه قاب جی طلا هم اونِ دؤرِ رِه چَأکون.
4
دو تَه حلقه جی طلا چَأکون و قابِ جیر نصب بوکون تا میله یانی کی اَنِ حملِ شینه جی اَ حلقه یان ردَ بود.
5
میله یانَ جی اَقاقیا چوب چَأکون و طلا اَمرَه روکش بیگیر.
6
اَ مذبحَ، پرده ای کی صندوقِ عهدِ جولو نَهَه روبرو بِنن، هو جایی کی من تی اَمرَه ملاقات کونم.
7
هر روز صبح وختی هارون خَأیِه چراغانَ روشنَ کونِه، اَ مذبح رو بوخور خوشبو بوسوزَأنِه.
8
غروب دمِ رِه وختی خَأیِه چراغانَ روشنَ کونه، دوباره وَأستی بوخور بوسوزَأنِه. اَ هدیه بوخور وَأستی همیشگی بیبِه و همه دورانان میَأن انجام بیگیره.
9
اَ مذبح رو هیچ بوخور دیگر یا قربانی تمام سوز نوسوزَأنید و یا هدیۀ آردی اونِ رو تقدیم نوکونید، و یا وَأخوردنی هدیه اونِ رو فونکونید.
10
هارون وَأستی سالی ایبار گوناه قربانی خونَ، مذبحِ شاخانَ وَسینِه و اَطو اونِ رِه کفاره بوکونه. اَ کفاره وَأستی هر سال نسل در نسل انجام بیبِه، اَ کار خداوندِ رِه خیلی مُقدسه.»
کفّاره قیمت
1112
خداوند موسی بفرماست:«هر وخت بنی اسرائیلَ آمار گیری رِه سرشوماری کودَأن دری، هر کسی کی ایشمارده بِه وَأستی خو جانِ کفاره رِه ایتَه مبلغ خداوندَ پرداخت بوکونه تا سرشوماری موقع بلایی اَونِ سر نَأیِه.
13
هر کسی کی ایشمارده بِه، وَأستی نیم مِثقال مُطابق قُدسِ مِثقال فَأده، هر مِثقال، بیست قیراط بِهِه. اَ نیم مثقال هدیه ای ایسه خداوندِ شین.
14
هر کس کی بیست سال یا ویشتر سن بدَأره، وَأستی خداوندِ هدیه یَ فَأده.
15
وختی خوشَأنِ جانِ کفاره رِه خداوندَه هدیه فَأدَن دَرد، دارایأن ویشتر جی نیم مثقال فَأندد و فقیرانم کمتر فأندد.
16
تو وَأستی بنی اسرائیلِ قؤمِ جَه اَ هدیه ئَنَ فَأگیری و خیمۀ عبادتِ خدماتِ رِه هزینه بوکونی، تا اوشَأنِ جانِ رِه کفاره بیبِه، و من اوشَأنَ بیاد بدَأرم و اوشَأنِ جانَ حفظ بوکونم.»
حوض
17
اونموقع خداوند موسی یَ بفرماست:
18
«جی بُرنز ایتَه حوض چَأکون کی اونِ پایِه هم جی بُرنز بیبِه. اونَ مذبحَ و خیمۀ عبادتِ مابینِ جَه بِنِن و اونِ دورونَ آب دوکون.
19
هارون و اونِ پسرأن خوشَأنِ دس و پایَ اَ آب اَمرَه بوشورد.
20
وختی عبادتِ خیمۀ داخلَ بُد و یا وختی خدمتِ رِه مذبحَ نزدیکَ بُد، وَأستی اَ آبِ اَمرَه خوشَأنَ بوشورد، نوکونه بیمیرد.
21
اَ قانون هارون و اونِ نسلِ رِه ایتَه قانون اَبدیه، اوشَأن وَأستی خوشَأنِ دس و پایَ بوشورد تا نیمیرد.»
تقدیسِ روغن
22
بازن خداوند موسی یَ بفرماست:
23
«خُرمه اَدویه بیگیر، پونصد مِثقال مُر چکیده، دویست و پنجاه مِثقال خُرمه دارچین، دویست و پنجاه مِثقال نِیشکر خوشبو،
24
پونصد مِثقال سَلیخَه (ایجور دارچین) کی همه وَأستی مُطابق قُدسِ مِثقال وزن بوبُستِه بد، و چهار لیتر روغن زیتون.
25
همۀ اَشَأنَ با هم مخلوط بوکون تا روغنِ تقدیس چَأکوده بیبِه، اَشَأنَ وَأستی عَطارانِ مَأنستَأن مهارتِ اَمرَه مخلوط بوکونی.
26
بازن اَ روغنَ خیمۀ عبادت و صندوقِ عهدِ مسح کودَأنِ رِه بکارَ گیر.
27
و هَطو میز و همۀ اونِ اسبابَ، چراغدان و همۀ اونِ اسبابَ، بوخورِ مذبحَ،
28
و قربانی تمام سوزِ مذبح تمامِ اونِ اسبابِ اَمرَه، و حوضَ اونِ پایِه اَمرَه.
29
و همۀ اَشَأنَ اَطو تقدیس بوکون تا مُقدس بوبود و هر کس نِتَأنِه اَشَأنَ دس بزنه.
30
و اون روغنِ مرَه هارون و اونِ پسرأنَ مسح بوکون تا تقدیس بوبود و مرِه کهانت بوکوند.
31
بنی اسرائیلِ قؤمَ بوگو؛ اَ روغنِ مُقدس، مسحِ شینه و وَأستی همۀ نسلانِ میَأن می خدمتِ رِه بکار بوبورد.
32
اَ روغن نوَأستی مردمِ معمولی رو فوکوده بیبِه، و حق نَأئرید اَنِ مَأنستَأنَ چَأکونید، اَ روغن مُقدسه و شومَأنم وَأستی اونَ مُقدس بدَأنید.
33
هر کی اَ روغنِ مَأنستَأنَ چَأکونه و یا اونَ کسی رو کی کاهن نییِه وَسینِه، وَأستی جی بنی اسرائیلِ قؤم اِخراج بیبِه.»
عَطران
34
و خداوند موسیَ بفرماست:«جی عطرَأنی کی ترَه گویم بیگیر، مَیعه، اَظفار، قِنّه و کُندُرِ خالص. جی هر کودام به اندازه مساوی بیگیر.
35
اَشأنَ با هم مخلوط بوکون و بُخوری عطرِ مَأنستَأن چَأکون و نمکم اونَ ایضافَه کون تا خالص و مُقدس بیبِه.
36
ایبچی جی اونَ بوکوب تا پودرَ بِه، و اونَ خیمه دورون، صندوقِ عهدِ ورجَه، هویی کی تی اَمرَه ملاقات کونم بِنن. اَ عطر شُمرِه کاملاً مُقدس بیبِه.
37
اَ ترکیبِ اَمرَه شُمرِه عطرِ دیگری چَأنکونید، چره کی خداوندِ مخصوصه و شومَأن وَأستی اونَ مُقدس بدَأنید.
38
هر کی اَ عَطرَه، عطر کودَأنِ وَسی خورِه چَأکونِه، وَأستی جی قؤم اِخراجَ بِه.»