29

¹ اَ کارانی ایسِه کی وَأستی اوشَأنِ رِه انجام بدی تا تقدیس بوبود و مرِه کهانت بوکوند؛ ایتَه گوساله و دو تَه قوچ سالم اوسَأن. ² جی خُرمِه گندمِ آرد، نانِ فطیر چَأکون. بعضیانَ روغن زیتونِ اَمرَه و بعضیانم بدونِ روغن زیتون بِپچ، و ایبچی هم، نازکِ کلوچه مَأنستَأن چَأکون و اونِ رویَ روغن زیتون بِمالان. ³ اوشَأنَ ایتَه سبدِ دورون بِنِن و موقعی کی اون گوساله و دو تَه قوچَ قربانی کودَأن دری، همۀ نانانَ تقدیم بوکون. ⁴ هارون و اونِ پسرانَ خیمۀ عبادت درِ ورجَه بأور و آبِ اَمرَه غُسل بدن. ⁵ بازن کهانت رختانَ بأور، و پیرهن و ایفودِ عَبا، و خودِ ایفود، و سینه بندَه اونَ دوکون، و کمرشالَ اونِ کمرَ دوَد. ⁶ هارونِ عَمامه یَ اونِ سر بِنِن و اون نیمتاجَ کی چَأکودِه بی یَ اونِ عَمامه سر بِنن. ⁷ بازن روغنِ مُقدسَ باور و اونِ سرِ رو فوکون و اونَ مسح بوکون. ⁸ بازن هارونِ پسرَأنَ بأور جولو و پیرهنایِ مخصوصَ اوشَأنَ دوکون. ⁹ بازن کمرشالَ اوشَأنِ کمرَ دوَد و عَمامه یَ اوشَأنِ سر بِنن. مقامِ کاهنی هارون و اونِ زَأکانِ رِه واجب و اَبدیه. پس اَطو هارون و اونِ پسرانَ، کهانتِ خدمتِ رِه تقدیس بوکون. ¹⁰ گوساله یَ خیمۀ عبادتِ درِ ورجَه بأور و هارون و اونِ پسرأن اونِ رو دس بِند. ¹¹ بازن گوساله یَ هویَ خیمۀ عبادتِ درِ جولو جَه خدا حضورِه جَه سر وَأوین. ¹² ایبچی جی اونِ خونَ تی اَنگوشتِ اَمرَه مذبحِ شاخأنِ رو وَأسین و مابقیَ فوکون مذبحِ پایه ئانِ جیر. ¹³ بازن همۀ چربی کی دیل و روده یَ پوشَأنِه و سفیدی کی جیگر رو نَهَه و هر دو تَه قُلوه و چربی کی اوشَأنِ دؤر نَهَه یَ بیگیر، و مذبحِ رو بُسوزَأن. ¹⁴ ولی گوساله گوشت و اونِ پوست و اونِ فُضولاتَ اُردوگاه بیرونِ جَه بوسوزَأن. اَن قربانی، گوناه شینه. ¹⁵ بازن ایتَه جی قوچَأنَ بیگیر و هارون و اونِ پسرَأن اونِ رو دس بِنَأد. ¹⁶ اونم ذبح بوکون و اونِ خونَ مذبحِ همه طرف بِپاشان. ¹⁷ بازن قوچَ تیکه تیکه بوکون و اونِ دیل و روده و پاچه یانَ بوشور و بِنن کله و تیکه یانِ ورجَه. ¹⁸ بازن همۀ قوچَ مذبحِ رو بوسوزَأن، چره کی اَ خداوندِه رِه قربانیه تمام سوزه. و خوشبو، و خداوندِ رِه مخصوصِ هدیه به حساب اَیِه. ¹⁹ بازن دومی قوچَ بیگیر و هارون و اونِ پسران، خوشَأنِ دسانَ قوچِ رو بند. ²⁰ قوچِ سرَ وَأوین و ایبچی جی اونِ خونَ وَأسین هارون و اونِ پسرانِ راستِ گوشِ لاله یَ، و راستِ دسِ شصتِ اَنگوشتَ، و راستِ پایِ شصتِ اَنگوشتَ. مابقیه خونَ مذبحِ همه طرف بِپاشان. ²¹ ایبچی جی خونی کی مذبحِ رو نَهَه و ایبچی جی روغنِ مسحَ اوسَأن و هارون و اونِ پسرانِ رو، و هارونِ رخت رو و اونِ پسرأنِ رخت رو بِپاشان. اَطو هارون و اونِ پسرأن و اوشَأنِ رختَأن تقدیس بِه. ²² قوچِ چربی یَ، و اونِ دُنبِه یَ، و چربی کی روده یانَ پوشَأنه، و جیگر سِفیدَ، هر دو تَه قُلوه و اوشَأنِ دؤرِ چربیَ، و قوچِ راستِ رانَ اوسَأن، چره کی اَ قوچ، تخصیصِ قربانیه. ²³ و جی او سبد نانی کی مِرَه تقدیم بوبُستِه جی هر نمونه ایتَه اوسَأن، ایتَه نانِ روغن زیتونی، و ایتَه بدونِ روغن زیتون و ایتَه هم کلوچه. ²⁴ همۀ اَشَأنَ فَأدن هارون و اونِ پسرانِ دس، و بگو کی خدا حضورِ جَه به عنوانِ تکان دَئنی هدیه تکان بدد. ²⁵ بازن تو اَ نانانَ اوشَأنِ دسِ جَه بیگیر و سوزَأنی قربانی رو، مذبحِ سر بوسوزَأن، تا خدا رِه عطر خوشبو بیبِه. چرِه کی خدا سوزَأنی قربانی یَ پسند کونِه. ²⁶ و قوچِ سینه یَ کی هارونِ تخصیصِ شینِه بدس بیگیر، و به عنوانِ تکان دَئَنی هدیه، خدا حضورِ جَه تکان بدن، بازن اونَ تِرِه اوسَأن. ²⁷ قسمتایی جی قوچِ تخصیص کی هارون و اونِ پسرانِ شینه یَ تقدیس بوکون، یعنی تکان دَئَنی سینه و راستَ کودَأنی رانَ. ²⁸ و اَ قسمتَأن هارون و اونِ پسرانِ شینه و اَ قانون بنی اسرائیلِ قؤمِ رِه اَبدیه، چره کی هدیه راستَ کودَأنی یه، و راستَ کودَأنی هدیه جی طرف بنی اسرائیلِ قؤم جزِء سلامتی هدیه حیساب بِهِه. ²⁹ هارونِ مقدسِ رختَان اونِ مردَن پَسِ رِه، اونِ پسرأنِ شینه، تا دس نَئَن و مسح بوستأنِ موقع او رختانَ دوکوند. ³⁰ هارونِ پسر کی اونِ جانشین و کاهن بِهِه و خیمۀ اجتماع و قُدسَ وارد بِه تا خدمت بوکونه، وَأستی هفت روز اَ رختَأنَ دوکونه. ³¹ و قوچ گوشتَ کی تخصیصِ قربانیه اوسَأن، و قُدسِ جَه آبپز بوکون. ³² هارون و اونِ پسرأن وَأستی قوچِ گوشت و نانی کی سبدِ دورون نَهَه یَ خیمۀ عبادتِ درِ ورجَه بوخورد. ³³ اوشَأن وَأستی خوراکی کی اوشَأنِ دس نهی و اوشَأنِ کفاره رِه آماده بِهِه یَ، فقط خودشَأن بوخورد و نوَأستی غیر کاهنان کسِ دیگری جی او غذا بوخوره، چره کی مُقدسه. ³⁴ اگر چیزی جی نان و یا قربانی گوشت تا صُبح باقی بِمَأنست، همه یَ آتش رو بوسوزَأن و نوَأستی خورده بیبِه، چره کی مُقدسه. ³⁵ هر چی درباره هارون و اونِ پسرَأن ترَه اَمر بوکودمَه هفت روز اوشَأنِ رِه انجام بدن و اوشَأنَ تقدیس بوکون. ³⁶ و طبقِ گوناه قربانی رسم، هر روز ایتَه گوساله قربانی بوکون، کفاره وَسی. ³⁷ و اَ کفاره اَمرَه مذبحَ پاکَ کون، بازن اونَ روغن زیتونِ اَمرَه مسح بوکون تا مُقدس بیبِه. ³⁸ هفت روز مذبحِ رِه کفاره بوکون و اونَ مسح بوکون، بازن مذبح مُقدس بِهِه و دِ هر کس نِتَأنِه اونَ دس بزنه وگرنه آسیب دینِه. ³⁹ و اَن قربانیانی ایسه کی مذبحِ رو وَأستی قربانی بیبِه، هر روز دو تَه یکساله برّه. ⁴⁰ ایتَه برّه یَ صبح سر وَأوین و ایتَه دیگرَ بَعظهر. ⁴¹ هر برّه مرَه یک کیلو خُرمه آرد نرم و یک لیتر روغن زیتونِ خالص تقدیم بوکون، و ایتَه لیتر شراب هم هدیه وَأخوردنی رِه تقدیم بوکون. ⁴² و اوی تَه برّه یَ بَعظهر سر وَأوین، و اونِ رِه صبحِ برّه مَأنستَأن آردی هدیه و وَأخوردنی هدیه تقدیم بوکون تا تمام سوزه قربانی وعطرِ خوشبو خداوندِ رِه بیبِه. ⁴³ اَ قربانیه تمام سوز وَأستی نسل در نسل همیشه خیمۀ عبادتِ درِ ورجَه خداوندَ تقدیم بیبِه، هو جایی کی من شُمرَه مُلاقات کونم و تی اَمرَه گب زنم. ⁴⁴ در اویَ بنی اسرائیلِ اَمرَه ملاقات کونم و بواسطۀ می جلال اویَ تقدیس بِهِه. ⁴⁵ و خیمۀ عبادت و مذبحَ مُقدس اعلام کونم، و هارون و اونِ پسرأنَ تقدیس کونم تا مِرِه کهانت بوکوند. ⁴⁶ اونموقع بنی اسرائیلِ میَأن ساکن و اَشَأنِ خدا بؤم.