1
تی برَأر، هارونُ اونِ پسرأن «ناداب» و «اَبیهو» و «اِلعازار» و «ایتامارَ» جی باقی بنی اسرائیل مردم سیوایَ کون و بأور تی ورجَه تا می کاهن بوبود و مرَه خدمت بوکوند.
2
تی بَرأر هارونِ رِه رخت کهانت فراهم بوکون تا اونَ عزّتُ و جلال بِبِخشِه.
3
همۀ اوستا کارانی کی خوشَأنِ مهارتَ مِرَه مَدیونَدَه دستور بدن، هارونِ رِه رختای فاخر بودوجد تا تقدیس بیبِه و مرَه خدمت بوکونِه.
4
رختایی کی اوشَأن وَأستی بودوجد جی اَ قراره: سینه بند، ایفود(کاهنانِ مخصوص جلقده)، عَبا، درازِ پیرهَن کی اونِ رو نقش بودوختِه بِد، عَمامه و کمرشال. اوشَأن وَأستی اَ مقدسِ رختانَ تی بَرَأر هارونُ اونِ پسرانِ رِه چَأکوند، تا اوشَأن بتَأند در مقامِ کاهنی مرَه خدمت بوکوند.
5
رختانَ وَأستی جی نخای طلا و نخایِ پشمیه آبی و بنفش و سُرخ بوبود، و نازکِ کتانِ جَه ایستفاده بوکوند.
6
و ایفود وَأستی جی طلا و نخایِ کتانِ ریزبافتِ آبی و بنفش و سرخ بِبافتِه بیبِه، و خیلی قشنگ چَأکوده بوبُستِه بِه.
7
اونِ دو تَه شانِه یَ به اونِ دو تَه لچه بودوجد کی یکپارچه بیبِه.
8
و ایفودِ کمرشال وَأستی اونَ وصلَه بِه و هونِ جنسِ جَه بیبِه، یعنی جی طلا و نخایِ پشمی آبی و بنفش و سرخ و جی نخایِ کتانِ ریزبافت.
9
و دو تَه سنگِ عقیقَ اوسَأن و اسرائیلِ پسرانِ نامَه اوشَأنِ رو حک بوکون.
10
شیش تَه ایتِه سنگِ رو، و شیش تَه هم ایتَه سنگِ دیگرِ رو، به ترتیب جی پیله تر تا کوچی تر.
11
هوطو کی حَکاک مُهرِ رو حَکاکی کونِه، تونم هوطو اسرائیلِ پسرانِ نامَه اون دو تَه سنگِ رو حَک بوکون، بازن اوشَانَ قابِ طلا بیگیر.
12
و اَ دو تَه سنگَ اسرائیلِ پسرانِ یادگاری وَسی ایفودِ سرشانِه یَأنِ رو وصلَ کون تا هارون اوشَأنِ نامانَ خدا حضورِ جَه، یادآوری وَسی خو شانِه یَأنِ سر حمل بوکونِه.
13
دو تَه قاب جی طلا چَأکون.
14
و دو تَه زنجیر جی طلایِ خالص چَأکون کی لافندِ مَأنِستَأن به هم بتاوستِه بِه، زنجیرانَ به او دو تَه قاب وصلَ کون.
15
و ایتَه سینه بند چَأکون تا کاهن اونِ مرَه خدا اِراده یَه تشخیص بده. سینه بند وَأستی ایفودِ مَأنستَأن جی طلا و نخایِ آبی و بنفش و سُرخ و کتانِ ریز بافت چَأکوده بیبِه.
16
اون وَأستی دولا و مربع بیبِه، اونِ طول ایی وجب، و اونِ عرضم ایی وجب.
17
بازن چهار ردیف قیمتی سنگ، کی هر ردیف سه تَه سنگ بدَأره اونِ رو دیچین. ردیفِ اول؛ سرخ عقیق و زردِ یاقوت و لعل بیبِه.
18
دومی ردیف زُمُرد و سرخ یاقوت و الماس،
19
سِومی رو فیروزه و سفید عقیق و بنفش یاقوت،
20
و چهارمی ردیفِ رو یاقوتِ کبود و عقیقِ جیگری و یَشم بیبِه. سَنگأنَ وَأستی قابِ طلا بیگیری.
21
سنگانِ تعداد وَأستی دوازدَه بیبِه، هر ایتَه سنگ ایتَه جی اسرائیلِ پسرأنِ نامِ وَسی. و هر سنگِ رو هوطو کی مُهرِ رو نقش حَک کوند، ایتَه جی بنی اسرائیلِ دوازدَه تَه قبیله نامَ حَک بوکون.
22
و سینه بندِ رِه زنجیرایی جی طلای خالص چَأکون کی لافندِ مَأنستَأن بِهَم بِتاوِستِه بوبُستِه بِه.
23
دو تَه حلقه جی طلا چَأکون و سینه بندِ بوجُرِ لچگی رو بِنِن.
24
بازن زنجیرایِ طلایی یَ سینه پوشِ دو تَه حلقِه یَ وصلَ کون.
25
زنجیرایِ طلایی اوی تَه سرَأنَ، دو تَه قابهایِ طلایی یَ دَوَد، و اَطو اوشَأنَ جولو جَه به ایفودِ سرشانِه یَأن وصلَ کون.
26
دو تَه حلقۀ طلایی چَأکون و سینه پوشِ بیجیرِ گوشِه یَأنِ رو وصلَ کون، یعنی اونِ
27
دو تَه حلقۀ طلایی دیگر چَأکون، و اوشَأنَ ایفودِ جولو جَه، و ایبچی ایفودِ کمرشال بوجُرترِ جَه وصلَ کون.
28
و سینِه بندِ حلقه یانَ نخِ آبی رنگِ اَمرَه به ایفودِ حلقه یان دوَد، جوری کی سینه بند کمرشالِ بوجُر جَه قرار بیگیره و مُحکم بیبِه و ایفودِ رو جَه کنار نیشِه.
29
وختی هارون قُدسِ دورون شِه، اسرائیلِ پسرانِ نامَ کی سینه بندِ رو حَک بوبُستِه و اونِ دیلِ رو حمل بِهه یَ، یادآوری همیشگی وَسی، خو مرَه به خدا حضور بورِه.
30
سنگایِ اوریم و تُمّیمَ سینه بندِ رو بِنن تا هر موقع هارون شِه به خدا حضور، او سنگَأن اونِ دیلِ رو حمل بیبِه، اَطو اون همیشه تَأنِه خدا اِرادِه یَ درباره بنی اسرائیلِ قؤم تشخیص بده.
31
و ایفودِ عَبا جی پارچه یکسره آبی رنگ چَأکوده بیبِه.
32
عَبا میانَ شکاف بِدن، تا دوکودنِ موقع سر جی اون ردَ بِه، و شکافِ دور تا دورَه زِرِه مَأنستَأن ایتَه بِبافتِه بوبُستِه لبه بودوج تا شکاف پارا نیبِه.
33
عَبا دامنِه دورَه نخایِ آبی و بنفش و سُرخِ اَمرَه مَنگوله بودوج کی اَنارِ مَأنَستَأن بیبِه، و زنگوله یانی جی طلا چَأکون و اوشَأنِ میَأنِ جَه بِنِن.
34
زنگوله یانِ طلایی و مَنگوله یان وَأستی عَبا دامنِ دؤر تا دؤر، و ایتَه در میان بوبود.
35
هارون وختی خدمت کودَأن رِه عبایَ دوکونه و موقعی کی اَیِه به می حضور و قُدسَ وارد بِه، و یا موقعی کی خَأیِه جی اویَه بیرون بیشِه، زنگوله یانِ صدا ایشتَأوِستِه بِه، نوکونه قُدسِ دورونِ جَه بیمیرِه
36
ایتَه برّاق لوح جی طلایِ خالص چَأکون و هوطو کی مُهرِ رو حَک کوند، اونِ رو حَک بوکون «وقف بوبُستِه یَهوَه رِه»
37
بازن ایتَه آبی رنگِ نخ اونَ وصلَ کون تا بِتَأنی اونَ عَمامه یَ دوَدی، جوری کی عَمامه جولو جَه بِمَأنِه.
38
هارون وَأستی اونَ خو پیشانی رو بِنِه تا من خداوند، همۀ قربانیانی کی بنی اسرائیلِ قؤم مِرَه تقدیم کونه یَ قبول بوکونم، حتی اگر قؤم هدیه تقدیم کودَأنِ موقع خبط بوکوند.
39
پیرهنَ جی کتانِ ریزبافت بِباف، و عَمامِه یَ هم هَطو، و کمرشالَ قشنگ گولدوزی بوکون.
40
هارونِ پسرانِ رِه پیرهن وعَمامه و کمرشال چَأکون، تا اوشَأنَ عزّت و جلال بدَه.
41
اَ رختانَ تی برَأر هارون و اونِ پسرَأنَ دوکون، و اوشَأنَ روغن زیتونِ اَمرَه مسح بوکون، و همه تَه رو دس بِنِن و تقدیس بوکون تا می کاهن بوبود و مرَه خدمت بوکوند.
42
و اوشَأنِ رِه کتانِ پارچه جَه، تونوکه بودوج کی اَشَأنِ لُخت بدنَ بوپوشَأنِه و جی کمر تا ران درازا بِدَأره.
43
وختی هارون و اونِ پسرَأن خیمۀ عبادت بودورون شُد یا وختی خَأیِد قدُسِ دورون خدمت بوکوند و مذبحَ نزدیکَ بُد، اَ تونوکه یانَ دوکوند، نوکونه کی اوشَأنِ لُختی آشکارَ بِه و جزا بیدیند و بیمیرد. هارون و اونِ نسل وَأستی تا اَبد اَ قانونَ رعایت بوکوند.