1
مذبَحَ اَقاقیا چوبِ اَمرَه چَأکون. اونِ شکل مربع، و اونِ هر طرفِ درازا دو و نیم متر، و اونِ بُلندی یک و نیم متر بیبِه.
2
اونَ جوری چَأکون کی اونِ چهار گوشه، چهار تَه زایده شاخِ مَأنستَأن بدَأره. اَ شاخان و مذبَح وَأستی یکپارچه چوبِ جَه چَأکوده، و بُرنزِ اَمرَه روکش بیبِه.
3
و اونِ خاکسترِ اوسَأدنِ رِه لگن چَأکون. و جی بُرنز اونِ رِه خاک اَنداز و کاسه و اَنبُر چَأکون.
4
اونِ رِه مَنقلی کی سوراخ سوراخ بیبِه جی بُرنز چَأکون و اونِ جابجا کودَأنِ رِه چهار تَه حلقۀ بُرنزی هم اونَ وصلَ کون.
5
و اونَ مذبحِ دورون فرو بوبور، جوری کی اونِ بوجُر مذبحِ لبه رو بِمَأنِه.
6
و چوبِ اَقاقیا جَه دو تَه عصا مذبحِ رِه چَأکون و اوشَأنَ روکشِ بُرنز اَمرَه بوپوشَأن.
7
وختی خَأئید مذبحَ جابجا بوکونید، اَ عصایانَ تَأوَأدید حلقه یانی دورون کی مذبحِ چهار گوشه جَه نصب بوکوده دَأری، و اَطو عَصایان مذبحِ دو طرفِ جَه مَأنه و تَأنید اونَ راستَ کونید.
8
مذبحِ دورونَ تخته اَمرَه ایتَه خالی جعبه مَأنستَأن چَأکون، هوطویی کی ترَه کوه جُر نیشان بدم.
عبادتگاهِ حیاط
9
و خیمه رِه جنوبِ طرفِ جَه ایتَه حیاط چَأکون، اونِ دیوار جی نازک کتان بیبِه کی پنجاه متر درازا بدَأره.
10
اَ پرده یانِ رِه بیستَ ستونِ برنزی و اَ ستونانِ رِه بیستَ پایه یِ بُرنزی، و دکمه های نُقره ای چَأکون تا اَ پرده یَأنَ بدَأرد.
11
شمالِ طرفِ پرده یان هم وَأستی پنجاه متر درازا و بیستَ ستون و پایه جی بُرنز و قُلابان و دکمه هایی جی نُقره بدَأرد.
12
حیاطِ غربِ طرفِ پرده، وَأستی بیست و پنج متر درازا و ده تَه ستون و پایه بدَأره.
13
و شرقِ طرفِ پرده هم وَأستی بیست و پنج متر درازا بدَأره.
14
و خیمه دروازه ایطرفِ پرده، هفت و نیم متر بیبِه، اَ پرده یانِ دَأشتِنِ رِه سه تَه ستون و سه تَه پایه چَأکون.
15
و طرفِ دیگرِ رِه هم ایتَه پردۀ هفت و نیم متری و سه تَه ستون و سه تَه پایه چَأکون.
16
و حیاطِ دروازه رِه ایتَه پرده به درازای ده متر بِنن، اَ پرده وَأستی جی نازکِ کتان بیبِه کی نخایِ سُرخ و آبی و بنفشِ اَمرَه بِبافته بوبُسته بِه.
17
همۀ حیاطِ ستونان وَأستی پوشت بندایِ نُقره ای مرَه به هم وصلَ بود و اوشَأنِ دکمه یَأن جی نُقره و پایه یَأن وَأستی جی بُرنز بیبِه.
18
پس حیاط وَأستی پنجاه متر درازا و بیست و پنج متر پهنا و اونِ دیواران جی نازکِ کتان بیبِه و دو نیم متر بُلندی بدَأره، و اونِ ستونان و پایه یَأن هم جی بُرنز چَأکوده بیبِه.
19
هر چیزِ دیگری کی خیمه دورون بکار اَیِه و همۀ خیمه و حیاطِ میخَأن، وَأستی جی بُرنز بیبِه.
چراغِ روغن
20
و تو بنی اسرائیلِ قؤمَ دستور بدن، تا عبادتگاه چراغانِ رِه روغن زیتونِ خالص بأورد، تا چراغان همیشه روشن بیبِه.
21
هارون و اونِ پسرَأن چراغدانَ می خیمه قُدسِ جَه، یعنی قُدس اَلاقدسِ بیرونِ جَه بِند، و شب و روز خداوندِ حضورِ جَه چراغدانِ جَه مراقبت بوکوند تا اونِ شُعله خاموشَ نیبِه. اَ بنی اسرائیلِ همۀ نسلانِ رِه ایتِه قانونِ اَبدیه کی وَأستی رعایت بوکوند.