26

¹ می خیمه یِ حضورَه، کی شیمی خیمۀ عبادته، ده تَه پرده کتانِ نازکِ اَمرَه کی نخایِ پشمی یِ سُرخ و آبی و بنفش اَمره بِبافته بوبُسته چَأکون، و اوشَأنِ رویَ فرشته یانِ نقشَ گولدوزی بوکون. ² هر پرده چهارده متر درازا و دو متر پهنا بدَأره و همه یک اندازه بیبِه. ³ اَ پرده یانَ پنج تَه پنج تَه به هم بودوج، ⁴ و ریسمانِ آبی رنگِ اَمرَه پنجاه تَه حلقه چَأکون و پردۀ اولِ حاشیه جَه مُتصلَ کون، هَ کارَه پردۀ دومِ رِه انجام بدن. ⁵ پنجاه حلقه پردۀ اولِ رِه، پنجاه حلقه هم پردۀ دومِ رِه، و جوری اوشَأنَ وصلَ کون کی حلقه یان همدیگرِ روبرو بمَأنه. ⁶ بازن پنجاه تَه چنگک جی طلا چَأکون کی دکمه کارَه بوکونه و پرده یانَ اون دکمه یَأنِ اَمرَه همدیگرَ وصلَ کون تا خیمه پرده یَأن، یک تیکه بیبِه. ⁷ خیمه بیرونِ پوشأنِ نِ رِه، یازده تَه پرده جی بُزِ پشم بِباف. ⁸ هر یازده تَه پرده ایتَه اندازه و اوشَأنِ درازا پونزدَه متر و اوشَأنِ پهنا دو متر بیبِه. ⁹ پنج تَه جی اون پرده یانَ به هم بودوج تا ایتَه پیله پرده چَأکونی و شیش تَه یه دیگرم به هم بودوج تا ایتَه پیله پرده ی دیگر چَأکوده بیبِه، شیشمی پرده یَ کی خیمه جولو جَه آویزانَ بِه دولا بوکون. ¹⁰ ریسمانِ مرَه پنجاه حلقه، پردۀ اولِ حاشیه جَه و پنجاه حلقه هم پردۀ دومِ حاشیه جَه چَأکون، ¹¹ پنجاه تَه بُرنزی دکمه هم چَأکون، و اوشَأنَ حلقه یانِ دورون تَأوَأد تا اَطو خیمه دو تَه تیکه بهم وصلَ بِه. ¹² اَ پرده یانِ قسمتِ ایضافی یَ، خیمه پوشتِ جَه آویزانَ کون. ¹³ جی هر طرفِ خیمه، نیم متر پرده ایضافه اَیِه، اون نیم مترَ خیمه دو طرفِ جَه آویزانَ کون تا خیمه یَ بوپوشَأنِه. ¹⁴ و ایتَه روکش جی قوچِ پوست چَأکون و اونَ سُرخِ رنگ بزن، و تَأوَأد خیمه رو، بازن ایتَه روکشِ دیگر جی خَز چَأکون و قوچِ پوستِ رو تَأوَأد. ¹⁵ اَقاقیا چوبِ اَمرَه ستونایی چَأکون تا خیمه یَ بدَأرد. ¹⁶ هر تخته ستون وَأستی پنج متر درازا و هفتاد و پنج سانتی متر پهنا بدَأره. ¹⁷ هر تخته کنار، ایتَه زبانه چَأکون تا اوی تَه مرَه قرینه بیبِه و همدیگرِ مرَه جوفتَ بود. همۀ تخته یانَ اَطو چَأکون. ¹⁸ بیستَ ستون خیمه جنوبِ طرفِ رِه چَأکون. ¹⁹ چهل تَه پایه هم جی نقره اَ ستونانِ جیر رِه چَأکون، یعنی هر ستونِ رِه دو تَه پایه بِنن تا ستونِ دو تَه اتصالَ بدَأره. ²⁰ بیستَ ستونم خیمه شمالِ طرفِ رِه چَأکون، ²¹ چهل تَه نُقره ای پایه هم اوشَأنِ جیر بِنن، یعنی هر ستونِ رِه دو تَه پایه. ²² شیش تَه ستونم خیمه پوشتِ رِه کی غربِ طرف نَهَه چَأکون. ²³ دو ستونِ دیگرم خیمه پوشتِ گوشه یانِ رِه چَأکون، ²⁴ اَ ستونَأن وَأستی حلقه یانِ مرَه جی بوجُر تا بیجیر همدیگرَ وصلَ بود، اوی تَه گوشه دو تَه ستونم وَأستی هَطو چَأکوده بیبِه. ²⁵ پس هشتَ ستونِ رِه، شونزدَه تَه پایه نُقره ای چَأکون، کی هر ستونِ جیر دو تَه پایه نقره ای بِمَأنه. ²⁶ چوبِ اَقاقیا جَه تخته یانی چَأکون تا خیمه پوشت بندِ رِه ایستفاده بوکونی، پنج تَه پوشت بند، ایطرفه خیمه ستونایِ چوبی رِه، ²⁷ و پنج تَه پوشبندم ایطرفِ دیگرِ رِه، و پنج تَه پوشبند هم خیمه عقبِ ستونانِ رِه که غربِ طرف نَهَه. ²⁸ او تختۀ پوشت بندی کی خیمه وسطِ جَه مَأنه، وَأستی جی اَسر تا اوسرِه خیمه بیشِه. ²⁹ همۀ ستونانَ طلا اَمرَه روکش بیگیر و اوشَأنِ رو حلقه یانی وصلَ کون، جوری کی اَ تخته یانی کی پوشبندِ رِه چَأکوده دَأری اوشَأنِ میَأنِ جَه بوگذره. ³⁰ خیمه یَ وَأستی دقیقاً هوطویی کی کوه جُر اونِ نمونه یَ ترَه نیشان بدم چَأکونی. ³¹ جی نخایِ پشمی آبی و بنفش و سُرخ ایتَه پرده بِباف و اونِ رو فرشته یانِ نقشَ خیلی قشنگ گولدوزی بوکون، ³² پرده یَ دکمه های طلا اَمرَه اون چهار ستونی رو کی اَقاقیا چوبِ اَمرَه چَأکوده بوبُسته و طلا اَمرَه روکش بوبُسته و چهار تَه نقره ای پایه رو نَهَه، وَألاخان. ³³ پرده یَ خیمه سقفِ دکمه یَأنَ والاخان و صندوقِ عهد کی دو تَه لوحِ سنگی اونِ دورون نَهَه یَ بوبور پرده پوشت بِنن. اَ پرده شمرِه «قُدسَ» جی «قُدس اَلاقداس» سیوایَ کونه. ³⁴ پس تختِ رحمتَ بِنن صندوقِ عهدِ رو و بوبور قُدس اَلاقداسِ میَأن. ³⁵ میز و چراغدانَ قُدسِ میَأن بِنن، میزَ شمالِ طرفِ جَه و چراغدانَ جنوبِ طرفِ جَه. ³⁶ ایتَه پردۀ کتانِ دیگر، جی نخایِ پشمی آبی و بنفش و سُرخ، خیمه درِ ورودی رِه بِباف. ³⁷ اَ پرده رِه پنج تَه ستون جی اَقاقیا چوب چَأکون و طلا مرَه روکش بیگیر، و دکمه هایِ طلا هم اونِ رو وصلَ کون، اَ ستونانِ پنج تَه پایه هم وَاستی جی بُرنز بیبِه.