1
و خداوند موسیَ بفرماست:
2
«بنی اسرائیلَ بوگو کی مرِه پیشکشی بأورد، و هر کسی کی خو میلِ اَمرَه مِرِه پیشکشی اَوره اونِ جَه قبول بوکون.
3
پیشکشیانی کی مردمِ جَه قبول کونی اَشَأند؛ طلا، نقره، بُرنز،
4
نازکِ کتان، نخِ پشمی کی سُرخ و آبی و بنفش بیبِه، پارچه ای کی بُزِ پشمِ جَه بیبِه،
5
قوچِ پوست کی اونَ سُرخ رنگ بزَه بِد، خز، اَقاقیا چوب،
6
و چراغانِ رِه روغن، مسحِ روغنِ رِه اَدویه، بوخورِ خوشبو،
7
کاهنِ اَعظمِ ردا و سینه بندِ تزئینِ رِه، سنگِ عقیق و سنگایِ گرانقیمتِ دیگر.
8
قؤم وَأستی ایتَه مقدسِ خیمه مِرِه چَأکوند تا اوشَأنِ میَأن ساکن بوبوم.
9
اَ خیمه و اونِ چیک چی وَأستی مُطابق اونچی کی ترَه نیشان دهم چَأکوده بیبِه.
صندوقِ عهد
10
اَقاقیا چوبِ اَمرَه ایتَه صندوق چَأکونید کی اونِ درازا صد و بیست و پنج سانتی متر و اونِ پهنا و بلندی هر کودام هفتاد و پنج سانتی متر بیبِه.
11
و اونِ دورون و بیرونَ طلایِ خالصِ اَمرَه بوپوشَأن و ایتَه طلایی قاب اونِ دورِ رِه چَأکون.
12
چهار تَه طلایی حلقه چَأکون و اونِ چهار تَه پایه رو نصب بوکون، یعنی دو تَه حلقه هر طرفِ جَه.
13
دو تَه بُلندِ چوب، اَقاقیا دارِ جَه تهیه بوکون و اوشَأنَ طلا اَمرَه روکش بیگیر،
14
و اَن چوبَأنَ اون حلقه یانِ میَأنِ جَه کی صندوقِ جیر نصب بوکوده بویی ردَ کون، تا صندوقِ عصا بیبِه و صندوقَ اونِ مرَه اوسَأند.
15
و اَ عصایان صندوقِ حلقه یانِ میَأن بِمَأنِه و اوشَأنِ جَه بیرون نَأیِه.
16
وختی صندوقِ چَأکودَأن تومامَ بوست، اون دو تَه لوحی کی اَحکامَ اونِ رو بینیویشته دَأرمَ ترَه فَأدم تا اونِ دورون بنی.
17
اَ صندوقِ سرپوشَ به درازایِ صد و بیست و پنج سانتیمتر و پهنایِ هفتاد و پنج سانتیمتر جی طلایِ خالص چَأکون، اَ سرپوش تختِ رحمته، شیمی گوناهانِ کفاره رِه.
18
تختِ رحمتِ رِه دو تَه فرشتۀ نگهبان جی طلایِ خالص چَأکون،
19
اَ دو تَه مجسمه یَ ایتَه یَ تختِ اَطرف و ایتَه یَ تختِ اوطرفِ جَه نصب بوکون. اَ مجسمه یَأن وَأستی تختِ رحمتِ مرَه یکپارچه و ایتَه بوبود.
20
فرشته یان خوشَأنِ بالانَ بازَه کوند و تختَ خوشَأنِ بالِ اَمرَه بوپوشَأند و اوشَأنِ صورت همدیگرِ طرف بیبِه و تختَ فَأندرِد.
21
و تختِ رحمتَ صندوقِ رو بِنِن و اون دو تَه لوحَ کی ترَه فَأدم صندوقِ دورون بِنن.
22
من تختِ رحمتِ بوجُرِ جَه تی مرَه ملاقات کونم، او دو تَه فرشته ی نگهبانِ میانِ جَه کی صندوقِ رو ایسَأد، و می اَحکام و دستوراتَ دربارۀ بنی اسرائیلِ قؤم ترَه گویم.
نانِ مقدسِ میز
23
اقاقیا چوبِ اَمرَه ایتَه میز چَأکون کی اونِ درازی یک متر و اونِ پهنا نیم متر و اونِ بلندی هفتاد و پنج سانتی متر بیبِه.
24
اونَ طلایِ خالصِ اَمرَه بوپوشَأن و ایتَه قاب جی طلا میزِ دورِ رِه چَأکون.
25
میزِ رِه ایتِه حاشیه به پهنایِ چهار انگوشت چَأکون و اونَ طلایِ خالصِ اَمرَه بوپوشَأن.
26
چهار تَه حلقه جی طلا چَأکون و اوشَأنَ میزِ چهار گوشه و اونِ پایِه اَنِ بوجُرِ جَه وصلَ کون.
27
حلقه یَأن وَأستی حاشیه یَ نزدیک بوبود، جوری کی بشَه میزِ حمل کودَأنِ رِه عصایانی اونِ دورونِ جَه ردَ کودَأن.
28
اَ عصایانَ جی اَقاقیا چوب چَأکون و هر دو تَه یَ طلا اَمرَه بوپوشَأن تا میزَ اوشَأنِ مرَه اوسَأند.
29
کاسه بُشقاب و پیاله و جامَ جی طلایِ خالص چَأکون تا اوشَأنِ مرَه پیشکشی یانِ وَأخوردنی فوکوند.
30
مقدسِ نان همیشه میزِ رو می حضورِ جَه بمَأنِه.
چراغدان
31
طلایِ خالصِ جَه ایتَه چراغدان کی چُکُش کاری بوبُسته بِه چَأکون، چراغدانِ پایه و اونِ بدنه و اونِ شاخه یان و اونِ جا چراغیأن و گولانی کی اونِ رو نقش زنید همه وَأستی یکپارچه و جی طلایِ خالص بیبِه.
32
چراغدانِ دو طرفِ جَه شیش تَه شاخه چَأکونید، یعنی سه شاخه ایطرف و سه شاخه هم ایطرفِ دیگر.
33
چراغدانِ هر ایتَه شاخه آخرِ جَه سه تَه جا چراغی بادامِ گولِ مَأنستَأن، اونِ گلبرگ و کاسبرگِ مرَه چَأکونید.
34
چراغدانِ اصلی شاخه آخر، چهار تَه جا چراغی بادامِ گولِ مَأنستَأن اونِ گلبرگ و کاسبرگِ مرَه چَأکونید.
35
چراغدانِ هر سه جُفتِ شاخه یانِ جیر ایتَه پیاله کاسبرگِ مَأنستَأن چَأکوده بیبِه.
36
پیاله یان و شاخه یان و چراغدانِ بدنه همه وَأستی یکپارچه و طلایِ خالصِ جَه چَأکوده بیبِه و چُکُش کاری بوبُسته بِه.
37
چراغدانِ رِه هفتَ چراغ چَأکون و اونِ رو بِنن تا اونِ جولویَ روشنَ کونه.
38
اونِ اَنبر و جیرِ سینیان جی طلایِ خالص بیبِه.
39
چراغدان و همۀ اونِ چیک چیانِ چَأکودَأنِ رِه ایتَه تیکه طلایِ خالص کی سی و چهار کیلو وزن بدَأره لازم دَأری.
40
دقت بوکون همۀ اوشَأنَ مُطابق اون نمونه هایی کی کوه جُر ترَه نیشان بدَم چَأکونی.