1
خبرِ دوروغَ پخشَ نوکون، و شهادتِ دوروغِ اَمرَه گوناهکارَ یاری ندن.
2
کارهایِ بدِ میَأن جماعتِ همرنگ نیبید و شهادت دَئَنِ موقع، اکثریتِ تحتِ تأثیر قرار نیگیرید و عدالتَ پامالَ نوکونید.
3
و کسی جَه فقط اَنِ وَسی کی فقیره طرفداری نوکونید.
4
اگر تی دوشمنِ گاو و گوسفندَ کی گومَه بوسته دَأره یَ پیدا کودی، اونَ اونِ صاحابَ وَأگردَأن.
5
اگر بیده ای تی دوشمنِ خر بارِ جیر بِکفته دَأره و نِتَأنِه ویریزه، با اَنکی او شخصِ جَه ترَه خوش نَأیه، ولی بی اِعتنا نوبون و اونَ کمک بوکون تا خو خرَ ویریزانه.
6
دادگاه دورون ایتَه فقیرِ شخصِ حقَ پامالَ نوکون.
7
کسی یَ اِفترا نزن و وَأنَأل کسی بی گوناه مرگَ محکوم بیبِه. چره کی من کسی یَ کی عدالتَ پامالَ کونه، بی سزا نِنِم.
8
رِشوه نیگیر، چره کی رِشوه مردمِ چومَ کورَ کونه و کاری کونه کی راستگویان دوروغ بوگوید.
9
و غریبه یَأنَ ظُلم نوکونید، چره کی خودتَأنم مصرِ دورون غریب بوئید و غریبانِ حالِ جَه خبر دَأرید.
سَبَّتِ حُکم
10
شیش سال تی زمینَ بکار و اونِ محصولَ جمعَ کون،
11
ولی هفتمین سالِ رِه اون زمینَ وا بدن و اونِ دورون کِشت نوکون، بدَه زمین استراحت بوکونه، و وَئَأل هر چی اونِ دورون بوجُر اَیِه یَ فقیران جمعَ کوند، و هر چی یم بِمَأنستَ صحرا حیوانان بوخورد. تی زیتون دار و تاکستانِ مرَه هم هَ کارَه بوکون.
12
هفته ای شیش روز کار بوکون و هفتمین روزِ رِه آرام بیگیر، تا تی خر و گاو، و تی غلام و کنیز، و همۀ کسانی کی شیمی رِه کار کوند بِتَأند استراحت بوکوند.
13
اَحکامی کی شمرَه فَأده دَأرمَ بدَأرید و خدایانِ دیگرِ ورجَه دوعا نوکونید، حتی اوشَأنِ نامَ به زبان نَأورید.
عیدَأن
14
هر سالِ رِه سه مرتبه مرِه عید بیگیر.
15
اول، عیدِ فطیر، هوطو کی قبلاً توضیح بدَم اَ عیدِ دورون هفت روز نانِ فطیر بوخورید و هر ساله ماهِ اَبیبِ رِه اَ عیدَ جشن بیگیرید، چون هَ ماه میَأن بو کی مصرِ جَه بیرون بأموئید. اَ جشنِ رِه همۀ شومَأن وختی اَمون درید می پرستشِ رِه وَأستی مره هدیه بأورید.
16
دوم عیدِ نوبر، اون موقعی ایسِه کی شومَأن وَأستی شیمی محصولاتِ نوبریَ مرِه تقدیم بوکونید. و سوم عیدِ جمع آوری، کی آخرِ سال وختی کی شیمی محصولَ مزرعه جَه جمعَ کونید.
17
هر سال، اَ سه تَه عیدِ رِه همۀ بنی اسرائیلِ مردَأکان وَأستی خداوند یَهوَه حضورِ جَه حاضر بوبود.
18
حیوانِ قربانی خونَ نانِ خمیر مایه دارِ اَمرَه، مرَه تقدیم نوکونید، و وَأنَألید حیوانِ قربانی پیَه تا صُبح بِمَأنه.
19
هر سال شیمی زمینِ محصولِ نوبرَ کی دِرو کونید، بأورید یَهوَه خانه و شیمی خدایَ تقدیم بوکونید.
بُزغاله یَ اونِ مارِ شیرِ دورون نپچید.
خدا فرشته
20
هَسَه من ایتَه فرشته اوسِه کونم تا ترَه راه میَأن محافظت بوکونه و فأرِسَأنِه به او جایی کی آماده کوده دَأرم.
21
اونِ گبَأنَ گوش بوکونید و اونِ جَه ایطاعت بوکونید، اونِ دستورِ جَه سرپیچی نوکونید، چره کی شیمی گوناهانَ نبخشه، چونکی اونَ من اوسِه کوده دَأرم.
22
ولی اگر اونِ جَه ایطاعت بوکونید و اونچی کی من شمرَه دستور بدَه مَه بجا بأورید، من شیمی دوشمنانِ مرَه جنگ کونم.
23
می فرشته شیمی جولو حرکت کونه و شمرَه فَأرسَأنه اَموریان و حِتّیان و فَرِزیان و کنعانیان و حِوّیان و یَبوسیانِ سرزمین، و من همۀ اوشَأنَ هلاکَ کونم.
24
اوشَأنِ خدایانِ جولو جَه سُجده نوکونید و اوشَأنِ خدایانَ پرستش هم نوکونید و اوشَأنِ اَعمالِ مذهبی یَ انجام ندید، بلکی اوشَأنِ بُتَأنَ بیشکینید و اوشَأنِ مقدسِ ستونانَ فوکوردَأنید.
25
و یَهوَه، شیمی خدایَ پرستش بوکونید تا شیمی نان و آبَ برکت بدم و مریضی یَ شیمی جَه دورَ کونم.
26
و شیمی سرزمینِ میَأن وَأنَألم زَأی سقط بیبِه و یا زنی نازا بیبِه، و تی عُمرَ درازَ کونم.
27
من می خُؤئفَ شیمی جَه پِشتر اوسه کونم قؤمَأنی میَأن کی قراره شومَأن اوشَأنِ میَأنِ جَه دوارید، و اَقوامی کی اوشَأنِ مرَه جنگ کونیدَ سراسیمَه کونم، کاری کونم کی همۀ شیمی دوشمنان شیمی جولو جَه فرار بوکوند.
28
من پِشتر جی شومَأن سُرخِ زرزنگ اوسِه کونم، تا حِوّیان و کنعانیان و حِتّیان شیمی جولو جَه فرار بوکوند.
29
اَ قؤمَأنَ ایتَه سالِ جَه جی اویَ بیرونَ نوکونم، کی نوکونه اوشَأنِ شهرَأن ویرانِه بیبِه و حیوانانِ درندۀ وحشی زیادَه بِه و شمرَه حمله بوکوند.
30
بلکی ایبچه ایبچه اوشَأنَ بیرون تَأوَأدم تا شیمی نفرات زیادَه بِه و بِتَأنید زمینَ تصرف بوکونید.
31
شیمی سرزمینِ مرزَ، جی دریایِ سرخ تا دریایِ مدیترانه، و جی جنوبِ صحرا تا فراتِ رودخانه تعیین کونم، و شمرَه یاری کونم تا اَ سرزمینانِ مردمانَ شکست بدید و بیرون تَأوَأدید.
32
شومَأن هیچ عهد و پیمانی اوشَأن، و اوشَأنِ خدایانِ مرَه دنوَدید.
33
وَأنَألید شیمی سرزمینِ دورون زندگی بوکوند، نوکونه کی شومَأنم بُت پرست بیبید و اوشَأنِ خدایانَ عبادت بوکونید و دِ می اَحکامَ ندَأرید، و اگر اَطو بیبِه شمرَه ایتَه پیلِه مُصیبتَ گرفتارَ کوند.