22

¹ اگر کسی گاو یا گوسفندی بودوزَأنِه و اونَ بوکوشه یا بوفروشه، وَأستی گاوِ عوض پنج تَه گاو، و گوسفندِ عوض چهار تا گوسفند فَأده. ² اگر کسیَه دوزدی کودَأنِ موقع بیگیرد و جوری بزند کی بیمیره، کسایی کی اونَ بوکوشتد قاتل به حیساب نَأیِد، ³ ولی اگر روزِ دورون کسیَه دستگیر بوکوند و اونَ بوکوشد مُجرمد. دوزد هر چی رِه کی بودوزَأنه دَأره وَأستی جریمه فَأده، اگر چیزی نَئره، خودشَ به غلامی بوفروشد تا اونِ پولِ مرَه اونِ جریمه یَ فَأدد. ⁴ اگر دوزدی موقع دستگیر بیبِه و گاو یا گوسفند یا خر، زنده اونِ دسِ جَه پیدا بیبِه، وَأستی دو برابرِ ارزشِ او حیوانَ جریمه فَأده. ⁵ اگر کسی عمداً خو حیوانَ دیگری مزرعه یا تاکستانِ دورون اوسه کونه تا بچره، وَأستی خو مزرعه یا تاکستانِ بهترین محصولِ جَه اونَ تاوان بده. ⁶ اگر کسی خو مزرعه دورون آتش روشنَ کونه تا هرزِ علفَأنَ بوسوزَأنِه، و همساده مزرعه یَ آتش بیگیره و اونِ بِرِسِه محصول یا بیبِه بوبُسته محصول آتشِ دورون بوسوزه، کسی کی آتش روشنَ کوده وَأستی همه یَ تاوان بده. ⁷ اگر کسی پول یا خو چیک چیَه خو همساده خانه امانت بنه، و همساده خانه جَه بودوزَأند، اگر دوزد پیدا بوبُست، وَأستی دو برابرِ اونَ پس بده. ⁸ ولی اگر دوزد پیدا نوبُست، کسی کی چیک چیَان، اونِ ورجَه اَمانت نَهَه بو وَأستی بیشِه قاضی ورجَه تا حُکم بیبِه کی، خیانت بوکوده دَأره یا نَه. ⁹ هر وخت چیزی گومَه بوست، جی گاو و گوسفند و خر و رخت بیگیفته، تا هر چیزِ دیگری کی کسی ایدعا کونه اوی تَه ورجَه نَهَه، و او شخص گویه نه، هر دو وَأستی بوشود قاضی ورجَه، و کسی کی مقصر بوبُست وَأستی دو برابر او مالَ تاوان بده. ¹⁰ اگر کسی خر یا گاو یا گوسفند یا هر حیوانِ دیگری یَ، خو همساده یَ امانت فَأدِه، و او حیوان بیمیره یا آسیب بیدینه و یا غارت بوکوند و اونِ جَه به زور فَأگیرد و شاهدی هم نِئسِه، ¹¹ کسی کی امانت فَأگیفته وَأستی بیشِه عبادتگاه، و خدایَ قسم بوخوره کی خو همساده مالَ نودوزَأنِه دَأره، بازن حیوانِ صاحاب وَأستی قبول بوکونه و تاوان فَأنگیره. ¹² ولی اگر حیوانَ جی اونِ ورجَه بودوزَأنِه بِد، وَأستی اونَ، حیوان صاحابَ تاوان بده. ¹³ و اگر ایتَه وحشی حیوان او حیوانَ بوکوشت، اونِ باقی بِمَأنستِه یَ بَأوره حیوان صاحابِ ورجَه تا خو حرفَ ثابت بوکونه، و دِ لازم نییِه کی تاوان بده. ¹⁴ اگر کسی حیوانی خو همساده جَه قرض بیگیفت و او حیوان آسیب بیده و یا بِمرد، اگر اونِ صاحاب نِئسَه بو، وَأستی اونِ عوضَ تاوان بده، ¹⁵ ولی اگر حیوانِ صاحاب ایسَه بو نِخَأیِه کی تاوان بده، اگرم او حیوانَ کرایه بوکوده بو، اونِ کرایه پول، اونِ تاوان حیساب بِه و ویشتر جی اون نخَأیِه.

اخلاق و دینِ قوانین

¹⁶ اگر مردی دختریَ کی اونِ نامزد نییِه یَ فریب بده و اونَ تجاوز بوکونه، وَأستی اونَ عقد بوکونه و به زنی بیگیره. ¹⁷ ولی اگر دختره پئر به اَ ازدواج راضی نیبِه، فقط وَأستی اونِ مهریه یَ کی تعیین بوبُسته پرداخت بوکونه. ¹⁸ زنی کی جادوگری بوکونه یَ بوکوشید. ¹⁹ هر کی حیوانی مرَه نزدیکی بوکونه، وَأستی بیمیره. ²⁰ هر وخت کسی غیرِ یَهوَه، خدایِ دیگری رِه قربانی بوکونه وَأستی بیمیره. ²¹ کسی کی غریب ایسِه یَ اذیت و آزار نوکونید، به خاطر بَأورید کی شومَأنم مصرِ دورون غریب بوئید. ²² بیوه زن و یا یتیمَ ظُلم نوکونید. ²³ هر وخت اوشَأنَ ظُلم بوکودید و اوشَأن می ورجَه فریاد بوکوند و کمک بخَأید، من اوشَأنِ داد رِسِم، ²⁴ و شیمی دسِ جَه عصبانی بؤم و شمشیرِ اَمرَه شمرَه کوشم و شیمی زنانَ بیوه و شیمی زَأکانَ یتیم کونم. ²⁵ اگر می قؤمِ ایتَه جی فقیرانَ پولی قرض بدَأئی، نزول خورانِ مَأنستَأن رفتار نوکون و اونِ جَه سود فَأنگیر. ²⁶ اگر تی همساده رختَ گرو اوسَأدی، قبلِ مغریب اونَ وَأگردَأن. ²⁷ چره کی ایمکان دَأره، اون فقط هَ ایتَه دس رختَ بدَأره، و شب رِه دِ چیزی ندَأره کی دوکونه و خورَه گرمَ کونه، اگر اون می ورجَه آه و ناله بوکونه، من اونِ داد فَأرسم، چره کی خدایی ایسم کریم. ²⁸ خدایَ ناسزا نوگو، و تی قؤمِ شیخَأنَ لعنت نوکون. ²⁹ تی انگور و تی غلّه نوبری یَ می ورجَه بأور و مرَه تقدیم بوکون، تی اولی زأی اگر پسر بوبُست مرَه تقدیم بوکون. ³⁰ تی گاو و گوسفند اولی زَأی کی نر بوبُست، هفت روز حیوانَ اونِ مارِ ورجَه بدَأرید، و هشتمین روزِ رِه اونَ مرِه قُربانی بوکونید. ³¹ شومَأن می قؤمِ مُقدسید، نوَأستی گوشتِ حیوانی یَ کی صحرا دورون درنده حیوان بوکوشته دَأره یَ بوخورید، اونَ سگانِ ورجَه تَأوَأدید.