1
و خدا موسی مرَه گب بزَه و اَ اَحکامَ بفرماست:
2
«من یَهوَه تی خدایم، هون خدایی کی ترَه مصرِ زمینِ جَه کی اونِ دورون برده بوئید بیرون بأوردم.
3
غیرِ من خدایِ دیگریَ پرستش نوکون.
4
هیچ بُت و تمثالی جی اونچی کی آسمانِ میَأن یا زمینِ رو یا دریا میانَ نَهَه، ترِه چَأنکون.
5
هیچ بُتی یَ سُجده و عبادت نوکون. چره کی من یَهوَه، کی تی خدایم، خدایی ایسم باغیرت، و کسانی یَ کی مرَه دوشمن دَأندِه، اوشَأنِ گوناه انتقامَ تا سومین و چهارمین نسل اوشَأنِ زَأکانِ جَه فَأگیرم.
6
ولی کسانی یَ کی مرَه دوس دَأرد و می اَحکامَ دَأردَ، تا هیزار نسل رَحمت کونم.
7
تی خدا یَهوَه نامِ جَه سوء ایستفاده نوکون، چره کی خداوند کسی یَ کی اونِ نامَ بی احترامی بوکونه و به اونِ نام هَأچین قسم بوخوره، مُجازات کونه.
8
روزِ سبّتَ بخاطر بدَأر تا اونَ مقدس بدَأری.
9
شیش روز کار بوکون و همۀ تی کارانَ انجام بدن.
10
ولی هفتمین روز، تی خدا یَهوَه سبّت روزه، او روزِ دورون هیچ کاری نوکون، نه خودت نه تی پسر نه تی دختر نه تی نوکر نه تی کُلفَت نه تی حیوان و نه کسی کی تی خانه مِهمانه.
11
چون خدا هم شیش روزِ دورون آسمان و زمین و دریا و هر چی کی اوشَأنِ دورون نَهَه یَ خلق بوکود و روزِ هفتمِ رِه آرام بیگیفت، هَنِه وَسی خدا روزِ هفتمَ روزِ استراحت تعیین بفرماست و اونَ مبارک و تقدیس بوکود.
12
تی پئر و مارَ اِحترام بِنن، تا تی عمُر اون سرزمینی دورون کی یَهوَه تی خدا ترِه بخشِه، دراز بیبِه.
13
قتل نوکون
14
زِنا نوکون
15
دوزدی نوکون
16
علیه تی همساده شهادتِ دوروغ ندن.
17
تی همساده مال و ناموسَ طمع ندَأر، اونِ زنَ، اونِ نوکرَ، اونِ کُلفَتَ، اونِ گاوَ، اونِ خرَ و اونِ هیچ چیَه طمع نوکون.
18
وختی بنی اسرائیلِ قؤم، گورخانه و شیپورِ صدا و دودی یَ کی کوهِ جَه بوجُر شوئِه یَ فَأندرستد، جی ترس بِپرکستد و کوهِ جَه دورتر بِئسَد،
19
و موسیَ بوگوفتد:«تو خدا پیامَ بیگیر و اَمرَه برسَأن اَمَأن گوش کونیم، ولی خدا اَمی اَمرَه گب نزنه، چونکی ترسیم بیمیریم.»
20
موسی بوگوفت:«نترسید، چون خدا نزول بوکوده تا شمرَه اِمتحان بوکونه کی جی اَن پس اونِ قدرتَ بخاطر بدَأرید و دِ گوناه نوکونید.»
21
ولی مردم دور بِئسَد و فَأندرستد کی موسی، اون غلیظِ اَبرَ کی خدا اونِ دورون ایسَه بویَ نزدیکَ بوست.
22
و خدا موسیَ بوگوفت:«بنی اسرائیلَ بوگو؛ شومَأن خودتَأن بیدِه اید کی چوطو آسمانِ جَه شیمی اَمرَه گب بزَم.
23
جی طلا و نقره خودتانِ رِه خدا چَأنکونید و وختی مرَه عبادت کودَأن دَأرید دِ بُتَ پرستش نوکونید.
24
زمینِ خاکِ جَه مرِه ایتَه قربانگاه چَأکونید و گوسفند یا بُز یا گاوَ کی سلامتی رِه قربانی کونید، و شیمی سوختَنی قربانی یَ اونِ رو بنید، هر جایی کی من تعیین کونم مذبح چَأکونید، تا من بَأیم و شمرَه در اویَ برکت بدم.
25
و اگر سنگِ جَه مرِه مذبح چَأکونید، اونَ بتراشتِه سنگِ جَه چَأنکونید، چون اگر شیمی اَبزارَ اونِ رو بکارَ گیرید، اونَ نجسَ کوده دَأرید و دِ می قُربانگاهِ رِه مناسب نییِه.
26
و می مذبحِ رِه پله نِئنید، چره کی وختی پله جَه بوجُر شید، ممکنه شیمی کمر بیجر نمایان بیبِه.