18

¹ موسی زنپئر یِترون، کی مِدیانِ کاهن بو، بیشتَأوست کی خدا چی کارایی موسی رِه بوکوده و چوطو بنی اسرائیلِ قؤمَ جی مصر بیرون بأورده. ² موسی خو زنَ خو زنپئرِ خانه اوسِه کوده بو، پس یِترونم، خو دختر صفورَه یَ اوسَأد، ³ و موسی دو تَه پسرم اوسَأد، کی ایتَه نام «جِرشون» یعنی غریب بو، چره کی موسی اونِ بودونیا اَمونِ وخت بوگوفته بو:«زمینِ بیگانه جَه غریبم» ⁴ و اوی تَه نامم «اِلیعازر» بو، یعنی خدا می یاوره، چره کی اونِ بودونیا اَمونِ وخت هم موسی بوگوفته بو:«می پئرِ خدا، مرَه یاری بوکود و جی فرعونِ شمشیر نجات بدَه» ⁵ پس یِترون موسی زنپئر، اونِ زن و دو تَه پسرَأنِ مرَه بأمود صحرا، جایی کی موسی، کوهِ سینا ورجَه خیمه بزَه بو. ⁶ و موسی رِه پیغام اوسه کود کی من یِترون، تی زنپئر، تی زن و زَأیِ مرَه اَمون دَأرم تی ورجَه. ⁷ موسی بوشو اونِ پیشواز و اونَ تعظیم بوکود و مَأچی بدَه، و اونِ حال و احوال وَأورسِه و بازن بوشود موسی خیمه دورون. ⁸ موسی یِترونِ رِه نقل بوکود کی خدا بنی اسرائیلِ نجاتِ رِه، فرعونِ سر چی بلایی بأورد، و نقل بوکود کی وختی صحرا دورون سختیَانَ دوچارَ بوستِد، خدا چوطو اوشَأنَ نجات دَئِه. ⁹ وختی یِترون بیشتَأوست کی خداوند بنی اسرائیلَ احسان بوکوده و چوطو اوشَأنَ مصریانِ دسِ جَه خلاصَ کوده، خوشحالَ بوست. ¹⁰ و یِترون بوگوفت: «متبارک بیبِه خدایی کی شمرَه جی فرعون و مصریانِ دسِ جَه خلاصَ کوده، و خو قؤمَ بردگی جَه نجات بدَه دَأره، ¹¹ هَسَه بدَأنستم کی یَهوَه، جی همۀ خدایان پیله تره، چره کی خو قؤمَ جی مصریانِ مغرور و بی رَحمِ دسِ جَه نجات بدَه.» ¹² و یِترون، موسی زنپئر، قربانی تمام سوز و قربانی هایِ دیگر خدایَ تقدیم بوکود، بازن هارون و قؤمِ اسرائیلِ پیله کسان، یِترونِ دِئِن رِه بأمود اونِ ورجَه، و خدا حضورِ جَه، موسی و اونِ زنپئرِ مرَه غذا بوخوردد. ¹³ فردایی صُبح، موسی خو جایگاه جَه بینیشت تا قؤمِ شکایتانَ رسیدگی بوکونه، و مردم جی صبح تا مغرب، اونِ ورجَه بپا بِئسَد تا اونِ مرَه مشورت بوکوند. ¹⁴ وختی موسی زنپئر اونچی کی موسی کودَأن دوبویَ فَأندرست، موسی جَه وَأورسِه:«اَ چی کاری ایسِه کی تو قؤمِ اَمرَه کودَأن دَری؟ چره تو تنهایی همۀ اَ کارانَ انجام دهی، و مردمَ صبح تا شب اَیَ بپا دَأری؟» ¹⁵ موسی جواب بدَه:«من وَأستی اَ کارَه انجام بدم، چره کی مردم می ورجَه اَیِد تا بیدیند خدا ایراده چیسه. ¹⁶ وختی دو نفرِ میَأن اختلاف دکفه می ورجَه اَید تا من تشخیص بدم کی حق کَ ی تَه مرَه یِه، بازن خدا دستورات و اَحکامَ اوشَأنَ تعلیم دهم» ^{17 18} موسی زنپئر اونَ بوگوفت:«کاری کی تو کودَأن دری، دوروست نییِه، اَ کارِ اَمرَه هم خودت و هم مردمَ خستَه کونی، چره کی اَ کار ترِه تنهایی خیلی دوشواره. تنهایی نِتَأنی اَ کارَه کودَأن، ¹⁹ می گبَ گوش بوکون، ترَه ایتَه خُرمِه نصیحت کونم و خدا هم تی اَمرَه یِه. تو خدا حضورِ جَه اَ مردمِ نماینده بوبون و اَشَأنِ مسائل و مُشکلاتَ خدایَ عرض بوکون، ²⁰ تو وَأستی خدا اَحکامَ اوشَأنَ یاد بدی و بوگویی کی چوطو وَأستی زندگی بوکوند و چی رفتاری وَأستی بدأرد. ²¹ بازن مردانی کی دوروستکار و خداترس و اَمین بوبود، و رِشوه بیگیر نوبودَه مردمِ میَأنِ جَه انتخاب بوکون، تا گروهای هیزار نفری و صد نفری و پنجا نفری و ده نفری رهبر بوبود. ²² اوشَأن تَأند مردمِ میَأن قضاوت بوکوند و هر کوچی چیَه خوشَأنِ میَأن حل و فصل بوکوند، ولی پیله مُشکلاتَ تی ورجَه بأورد، اَطو اَ کارِ اَمرَه اوشَأن ترَه کُمک کوند و تی کار راحتر و سُبُکترَه بِه. ²³ خدا بخَأیِه اگر اَ کارَه انجام بدی، هم خودتَ زیاد خستَه نوکونی، هم مردمِ اختلاف زودتر حل بِه و شُد خوشَأنِ کار و زندگی سر.» ²⁴ پس موسی هم خو زنپئرِ گبَ گوش بوکود و اونچی کی اون بوگوفته بویَ عمل بوکود. ²⁵ و موسی مردانِ دوروستکاری همۀ قؤمِ جَه انتخاب بوکود و اوشَأنَ گروههای هیزار نفری، صد نفری، پنجاه نفری و ده نفری رهبر بوکود. ²⁶ اوشَأن همیشه قؤمِ میَأن قضاوت کودد، و کوچی دعوایانَ خوشَأن میَأن حل کودد ولی پیله مُشکلاتَ موسی ورجَه اَوردد. ²⁷ بازن موسی خو زنپئر یِترونَ بدرقه بوکود و اون وَأگردست خو خانه.