1
همۀ بنی اسرائیلِ قؤم خدا دستورِ اَمرَه جابجا بوستد و کوچ کودد. اوشَأن سینِ صحرا جَه کوچ بوکودد و بوشود «رِفیدیمِ» دورون اُردو بزَد، ولی اویَ هم آب وَأخوردنِ رِه نِئنَه بو.
2
و قؤم موسیَ اعتراض بوکودد و بوگوفتد:«اَمرَه آب فَأدن تا وَأخوریم» موسی اوشَأنَ جواب بدَه:«چره مرِه اعتراض کونید؟ چره خدایَ امتحان کونید؟»
3
و قؤم کی خیلی عطش دَأشتد توندی مرَه موسی یَ بوگوفتد:«چره اَمرَه مصرِ جَه بیرون بأوردی تا اَمی زن و زَأیَ و اَمی گله یانَ تشنگی جَه بوکوشی؟»
4
اونموقع موسی خدا درگاه التماس بوکود و بوگوفت: «خدایا، اَ قؤمِ مرَه چی بوکونم؟ دِ نزدیکه مرَه سنگسار بوکوند.»
5
خداوند موسیَ بفرماست:«چن نفر جی قؤمِ پیله کسانَ تی مرَه اوسَأن و اوشَأنِ جولو جَه راه دکف، و تی عصایَ کی اونِ اَمرَه دریایَ بزئی تی دس بیگیر،
6
من کوهِ سینا جُر صخره ای رو ایسم، تو تی عصا مرَه او صخره یَ بزن تا اونِ جَه آب بیرون بَأیِه و مردم وَأخورد.» پس موسی هم اسرائیلِ شیخانِ چومِ جولو جَه هَ کارَه بوکود.
7
موسی اون محلِ نامَ «مَسَّه» و «مَریبَه» بنَه. چره کی بنی اسرائیل اویَ اعتراض، و خداوندَ امتحان بوکوده بود و بوگوفته بود:«آیا خداوند اَمی میَأن ایسَه یا نه؟»
جنگ عَمالیقیانِ اَمرَه
8
عمالیقیان بأمود رِفیدیم تا بنی اسرائیلِ اَمرَه جنگ بوکوند.
9
و موسی یوشَعَ بوگوفت:«جی قؤم مردانی یَ انتخاب بوکون و فردا بوشون عَمالیقیانِ مرَه جنگ بوکون، من خدا عصایَ می دس گیرم و کوه جُر بپا ایسم.»
10
پس یوشَع هم هو کاری کی موسی بوگوفته بویَ بوکود و بوشو عَمالیقیانِ اَمرَه جنگ بوکونه. موسی و هارون و حور هم بوشود کوهِ قلّه جُر.
11
وختی موسی خو دسَ راستَ گیفته اسرائیلیان پیروزَ بوستد، و هَطو کی خستگی وَسی خو دسَ بیجیر اَورده، عَمالیقیان پیروزَ بوستد.
12
آخرسرِه موسی خستَه بوست و دِ نِتَأنست خو دسَ بوجُر بدَأره، هارون و حور بوشود ایتَه سنگ بأوردد و موسیَ بینیشَأند سنگِ رو، و اونِ دو طرف بپا بِئسَأد و دو نفری اونِ دسَ بوجُر بدَأشتد. موسی دس تا مغربِ رِه بوجُر بو.
13
و اَطو یوشَع و اونِ لشکر، عَمالیقیانَ شمشیرِ اَمرَه شکست بدَأد.
14
پس خداوند موسیَ بفرماست:«اَ پیروزی یَ یادگاری وَسی کیتابِ دورون بینیویس، و یوشَعَ بوگو؛ من عَمالیقیانِ خاطره یَ، کلاً آسمانِ جیر جَه محوَه کونم.»
15
موسی هم ایتَه مذبَح چَأکود و اونِ نامَ «یَهوَه نِسّی» یعنی «خداوند می پرچمه» بنَه.
16
بازن موسی بوگوفت: «خداوندِ پرچم همیشه بوجُره، و خداوند تا اَبد عمالیقِ مرَه جنگ کونه.»