14

¹ و خداوند موسیَ بفرماست: ² «بنی اسرائیلَ بوگو؛ وَأگردید و «فمُ الحیروت» روبرو دریاکنارِ ورجَه اُردو بزنید. جایی کی «مَجدُل» و دریایِ سرخ مابین و «بَعَل صَفُونِ» نزدیکی نَهَه. ³ اَطو فرعون خیال کونه کی بنی اسرائیل سرگردانَ بوسته دَأره و اَشَأنِ جولو دریا، و اَشَأنِ پوشتِ سر صحرا نَهَه. ⁴ من اونِ دیلَ سختَ کونم تا شمرَه دونبالَ کونه، بازن من می قدرت و عظمتَ فرعون و اونِ لشکریانَ نیشان دهم، تا مصریان بدَأند کی من یَهوَه یم.» پس بنی اسرائیلم هو کارَ بوکودد و هو جایی کی خدا نیشان بدَه بو خیمه بزَد. ⁵ وختی فرعونَ خبر بدَأد کی بنی اسرائیلِ قؤم فرار بوکوده دَأرد، اون و اونِ درباریان پشیمانَ بوستد و بوگوفتد:«اَ چی کاری بو کی اَمَأن بوکودیم؟ چره وَأهَأشتیم کی اَمی برده یان جی اَیَ بوشود؟» ⁶ پس فرعونم خو ارابه یَ آماده کود و خو سربازانَ بسیج بوکود، ⁷ و شیشصد تَه مخصوصِ ارابه، و هر چی جنگی ارابه کی دَأشته یَ اوسَأد، و سربازان و سردارانِ مصری اوشَأنَ سوار بوستد و همگی راه دکفتد. ⁸ خداوند فرعونِ دیلَ سختَ کود تا بیشِه بنی اسرائیلِ دونبال کی سربلندی مرَه جی مصر بیرون بوشو بود. ⁹ همۀ فرعونِ سربازایِ پیاده و اونِ سواران خوشَأنِ جنگی ارابه یان مرَه بنی اسرائیلِ قؤمِ دونبال بوشود. اسرائیلِ قؤم «فَم الحیرت» نزدیکی «بَعَل صَفُونِ» روبرو، دریا کنارِ جَه اُردو بزَه بود کی فرعونِ لشکریان اوشَأنَ فَأرسد. ¹⁰ وختی بنی اسرائیلِ مردم جی دور فرعون و اونِ سربازانَ بیدِد کی نزدیکَ بوستَأن دِرِد، بترسد و خدا جَه کمک بخَأستد. ¹¹ اوشَأنَ موسیَ بوگوفتد:«اَ چی کاری بو کی اَمی اَمرَه بوکودی و اَمرَه مصرِ جَه بیرون بأوردی؟ آیا مصرِ دورون قبر نِنَأبو کی اَمرَه بأوردی اَیَ صحرا دورون بیمیریم؟ ¹² اَمَأن ترَه نوگوفتیم اَمرَه وا بدن بدَه مصریانَ خدمت بوکونیم؟ چون دَأنستیم اَمرِه خیلی بهتره کی مصریانَ خدمت بوکونیم، تا اَنکی بَأئیم اَیَ صحرا دورون بیمیریم.» ¹³ موسی اوشَأنَ جواب بدَه:«نترسید، بِئسید و فَأندرید کی ایمروز خداوند شیمی نجاتِ رِه چی کونه، شومَأن دِ هیچموقع مصریانَ نیدینید، ¹⁴ لازم نییِه شومَأن کاری بوکونید، خداوند شیمی وَسی جنگ کونه.» ¹⁵ خداوند موسیَ بفرماست:«چی وَسی می ورجَه فریاد کونید؟ قؤمَ بوگو حرکت بوکوند. ¹⁶ و تو تی عصایَ دریا طرف درازَ کون تا دریا آب وَأشکافه، بازن بنی اسرائیل تَأند جی راهی کی دریا وسطِ جَه بازَ بِه خوشکی رو دوَأرد. ¹⁷ ولی هَسَه فرعون و اونِ لشکریانِ دیلَ سختَ کونم تا شمرَه دونبالَ کوند، بازن می قدرت آشکارَ بِه، و فرعون و اونِ لشکریانِ جَه جلال پیدا کونم. ¹⁸ وختی کی اوشَأنَ شکست بدَم و می جلالَ آشکارَ کودم، مصریان فَهمده کی من، یَهوَه یم.» ¹⁹ خداوندِ فرشته کی ایتَه ستونِ اَبرِ دورون بنی اسرائیلِ پیشاپیش شوئِه، حرکت بوکود بوشو و اوشَأنِ سرِ پوشت، ²⁰ اسرائیلیان و مصریانِ مابین بِئسَه. وختی شب بوبُست اَبرِ ستون، به آتشِ ستون تبدیل بوبُست و اسرائیلیانِ اُردویَ روشنایی بخشِه ئِه، ولی مصریانِ اُردو تاریک بو، هَنِه وَسی اوشَأن نِتَأنستد همدیگرَ نزدیکَ بود. ²¹ موسی خو دسَ دریا طرف درازَ کود و خدا هم شرقِ بادی مرَه کی تا صُبح دمسته، دریا آبَ عقب بوبورد و دریایَ خوشکَ کود و دریا میَأنِ جَه ایتَه راه بازَ بوست. ²² و بنی اسرائیل دریا میَأنِ جَه خوشکی رو دوَأرستد و آب اوشَأنِ دو طرفِ جَه دیوارِ مَأنستَأن بوبُسته بو. ²³ مصریانم خوشَأنِ اسبان و ارابه یانِ مرَه اوشَأنِ دونبال بأمود دریا میَأن. ²⁴ صبح دمِ رِه خداوند اَبر و آتشِ ستونِ میَأنِ جَه، مصریانَ فَأندِرِست و اوشَأنِ دیلِ دورون وحشت تَأوَأده. ²⁵ خدا باعیث بوبُست کی اوشأنِ ارابه یانِ چرخ قائمَ بوسته و اوشَأن سختی اَمرَه تَأنستد حرکت بوکوند. مصریان بوگوفتد:«بائید جی اَیَ فرار بوکونیم، چره کی خداوند اسرائیلیانِ وَسی اَمی اَمرَه جنگ کودَأن دِره» ²⁶ و خداوند موسیَ بفرماست:«تی دسَ دریا طرف درازَ کون، تا آب فیوِه مصریان و اوشَأنِ ارابه و اَسبانِ رو.» ²⁷ موسی هم خو دسَ دریا طرف درازَ کود و موقعی کی آفتاب زَئَن دوبو، دریا آب وَأگردست خو قبلی حالت. مصریان تلاش بوکودد کی فرار بوکوند، ولی خداوند اوشَأنَ تَأوَأده دریا میَأن. ²⁸ آبان وَأگردستد و سربازان و ارابه سواران، و همۀ فرعونِ لشکریانی کی بنی اسرائیلِ دونبال سر بأمو بود دریا میَأن، همه تَه دمردد، حتی ایتَه جی اوشَأنم زنده نمَأنست. ²⁹ ولی بنی اسرائیل دریا وسطِ جَه خوشکی رو راه شوئِد و آبان اَشَأن دو طرفِ جَه دیوارِ مَأنستَأن بو. ³⁰ او روزِ دورون خداوند بنی اسرائیلَ مصریانِ دسِ جَه خلاصَ کود و بنی اسرائیلِ قؤم، مصریانِ جنازه یَ دریا ساحلِ رو بیدد. ³¹ وختی اسرائیلیان خداوندِ عظیمِ مُعجزه یَ فَأندِرستد و بیدد کی چوطو مصریانَ شکست بدَه، خداوندِ جَه بترسد و خدا، و اونِ خادم موسیَ ایمان بأوردد.