1
و خداوند موسی یَ بفرماست:
2
«قؤمِ بنی اسرائیلِ میَأن هر پیله زَأیی کی پسر بیبِه، و هر حیوانِ اولی زأیی کی نر بیبِه، مرِه وقف بوکونید، چون اون می شینه»
3
موسی قؤمَ بوگوفت:«اَ روزَ بخاطر بدَأرید، روزی کی مصرِ جَه بیرون بأموئید، جایی کی اونِ دورون برده و غلام بوئید، اَ روزیِه کی خداوند شمرَه خو قدرتِ عظیمِ اَمرَه جی اویَ آزادَ کود، پس عیدِ روزَأنِ رِه نانِ خمیرمایه دار نوخورید.
4
شومَأن ماهِ اَبیبِ اولین روزِ رِه جی مصر بیرون باموئید.
5
خداوند شیمی اَجدادَ وعده بدَه دَأره تا سرزمینی کی کنعانیان و حِتیان و اَموریان و حِویان و یِبوسیان اونِ میَأن زندگی کوندَ شمرَه فَأده، جایی کی شیر و عسلِ سرزمینَ معروفه، پس وختی او سرزمینَ بودورون بوشوئید، شیمی آزادی وَسی هر سال اَ ماه دورون جشن بیگیرید.
6
هفت روز نانِ فطیر بوخورید و هفتمین روزَ، خداوندِ احترامِ رِه جشن بیگیرید.
7
هفت روزِ رِه فقط نانِ فطیر بوخورید و اصلاً خمیرمایه یا نانِ خمیرمایه دار شیمی خانه یانِ دورون، و حتی شیمی سرزمینِ دورون پیدا نیبِه.
8
و هر سال اَ جشنِ موقع شیمی زَأکانَ بوگوئید کی اَ جشن، او پیله کاری وَسیه کی خداوند شمرَه انجام بدَه و شمرَه جی مصر بیرون بأورد.
9
اَ جشن شمرَه علامتی مَأنستَأنِه کی شیمی دسِ رو، و یا نیشانی کی شیمی پیشانی رو نَهَه، تا همیشه خدا شریعتَ بخاطر بأورید و اونِ جَه گب بزنید، چره کی خدا خو قدرتِ عظیمِ اَمرَه شمرَه جی مصر بیرون بأورد.
10
پس هر ساله اَ موقع، اَ ایتفاقِ وَسی جشن بیگیرید.
11
هوطو کی خداوند شیمی اجدادَ وعده بدَه بو، شمرَه بوره کنعانیانِ سرزمین، وختی بوشوئید اویَ بخاطر بدَأرید،
12
پیله پسرَأن و حیوانانِ اولی زَأی کی نر بوبُست، خداوندِ شینه، اونَ خداوندَ تقدیم بوکونید.
13
ولی خره اولی زَأیِ جا گوسفند برّه قربانی بوکونید، اگر نخَأستید برّه قربانی بوکونید، اونِ گردنَ بیشکنید، ولی شیمی پیله پسرِأنِ جا قربانی بوکونید.
14
بعدها وختی شیمی زَأکان شیمی جَه وَأورسد؛ اَ کارانَ چی وَسی کونید؟ بوگوئید؛ خداوند خو قدرتِ عظیمِ مرَه، اَمرَه جی مصریانِ بندگی نجات بدَه.
15
اونموقع فرعون، اَمرَه جی بردگی آزادَ نوکوده، و خداوند همۀ مصریانِ پیله پسرَأن و اوشَأنِ حیوانانِ اولی زَأکأنَ کی نر بویَ بوکوشت تا فرعون اَمرَه آزادَ کونه، هَنه وَسی اَمَأنم اگر اَمی حیوانانِ اولی زَأی نر بیبِه، اونَ خداوندَ تقدیم کونیم، و اَمی پیله پسرِ جا هم ایتَه حیوان قربانی کونیم.
16
اَ جشن شمرَه نیشانی یَه مَأنه کی شیمی دس و پیشانی رو نَهَه، تا شمرَه بخاطر بِمَأنه کی خداوند خو دسِ قوتِ مرَه، اَمرَه جی مصر بیرون بأورد.»
اَبرِ و آتشِ ستون
17
وختی فرعون قؤمَ آزادَ کود، خداوند اوشَأنَ جی فلسطینیانِ سرزمین نوبورد، با اَنکی او راه نزدیکتر بو. چره کی خدا بوگوفت:«مبادا وختی قؤم بیدیند کی وَأستی جنگ بوکوند، پشیمانَ بود و وَأگردد مصر»
18
خدا قؤمَ جی راهِ صحرایی کی دریای سرخِ ورجَه نَهه و دورتر بو هدایت بوکود، پس بنی اسرائیلم مُسلح بوبُستد و جی مصر بیرون بأمود.
19
و موسی یوسفِ استخوانانَ خو مرَه اوسَأد، چره کی یوسف بنی اسرائیلَ قسم بدَه بو و بوگوفته بو:«هر وخت خدا شمرَه اِلتفات بوکود و جی اَیَ بوبورد، می اُستخوانانم شیمی اَمرَه بوبورید.»
20
قؤم جی «سکّوت» کوچ بوکودد و «ایتامِ» جَه کی صحرا کنار نَهَه بو اُردو بزَد.
21
اَ سفرِ دورون خدا روزَأن، ایتَه اَبرِ ستونِ میَأن و شبَأن هم ایتَه آتشِ ستونِ میَأن اوشَأنِ پیشاپیش حرکت کوده و اوشَأنَ هدایت کوده، و اوشَأن، هم شب و هم روز تَأنستد سفر بوکوند.
22
اَ ستونایِ اَبر و آتش حتی ایتَه لحظه هم اوشأنِ جولو جَه دورَ نوبوستد.