1
و خداوند موسی و هارونَ مصرِ سرزمینِ دورون بفرماست:
2
«اَ ماه شمرِه عزیزترین ماه، و اولین ماهِ سال بیبِه.
3
همۀ اسرائیلیانَ بوگوئید کی هر سال هَه ماه دورون، وختی ده روز ماه جَه بوگوذشت، هر اسرائیلی خانواده ایتَه برّه تهیه بوکونه، یعنی هر خانه رِه ایتَه برّه.
4
و اگر او خانه نفر کمه، خوشَأنِ همساده مرَه شریکی ایتَه برّه تهیه بوکوند، یعنی هر خانواده بسته به خو تعداد خو سهمَ حیساب بوکونه.
5
شیمی برّه، نر و یکساله، سالم و بی عیب، و گوسفند برّه و یا بُزغاله بیبِه.
6
و اونَ تا هَ ماهِ چهاردهمین روزِ رِه بدَأرید و همۀ بنی اسرائیلِ قؤم خوشَأنِ برّه یانَ، هو روز بَعظهرِ رِه سر وَأویند.
7
و قربانی خونِ جَه بیگیرد، و او خانه ای کی برّه یَ خوردَأن دِردِه دروازه دو تَه عمودی ستون، و سردرَ وَأسیند.
8
و اونِ گوشتَ او شبِ دورون آتشِ سر کباب بوکوند و نانِ فطیر و زرخِ سبزیانِ مرَه بوخورد.
9
و اون گوشتَ بپِخته یا خام نوخورید، بلکی اونَ کباب بوکونید، حتی اونِ کله پاچه و اونِ دیل و جیگرَه.
10
و اونِ جَه چیزی تا فردایی صُبح باقی نِنید و هر چی کی بِمَأنسته یَ آتشِ دورون بوسوزَأنید.
11
و اونَ اَطو بوخورید؛ شیمی کمرشال دوَدید، شیمی پاپوشَ دوکونید، و شیمی عصایَ شیمی دس بیگیرید و اونَ عجله اَمرَه بوخورید، اَ مراسم، خداوندِ فِصَح دِخَأده بِه.
12
و او شبِ دورون مصرِ سرزمینِ جَه دوَأرم و همۀ پیله زَأکأنَ کوشم. جی انسانِ پیله زَأی بیگیفته تا حیوانِ شین. چره کی من یَهوَه خدایم و همۀ مصرِ خدایانَ جزا دهم.
13
و اون خونی کی شومَأن شیمی خانه درِ سر وَأسینید شمرِه علامتی بِهِه، بلا کی نازل بوبُست وختی من خونَ دینم شیمی جَه گوذرم، و فقط مصریانِ پیله زَأکأنَ هلاکَ کونم.
14
اَنِ وَسی کی اَ ایتفاق و کارایی کی خدا شیمی وَسی بوکودَه بخاطر بدَأرید، هر سال اَ روزِ دورون خداوندِ رِه جشن بیگیرید. اَ عید وَأستی شیمی میَأن ایتَه عیدِ اَبدی بیبِه، و شیمی نسلایِ آینده هم وَأستی اونَ جشن بیگیرد.
15
اَ جشنِ دورون کی هفت روز طول کِشِه وَأستی نانِ فطیر بوخورید، هو اولین روزِ رِه خمیرمایه یَ شیمی خانه جَه بیرون فیشَأنید، هر کسی کی اَ هفت روزِ دورون نانِ خمیرمایه دار بوخوره دِ بنی اسرائیلی به حیساب نَأیِه.
16
اَ جشنِ اولین روز و هفتمین روزِ رِه، همۀ قؤم وَأستی دسته جمعی خدایَ عبادت بوکونید و بجز غذا چَأکودَأن هیچ کار دیگری نوَأستی بوکونید.
17
اَ عید کی نانِ فطیرِ مرَه جشن بیگیفته بِه، شمرَه بخاطر اَوره کی من هَ روزِ دورون شمرَه جی مصر بیرون بأوردم. شمرَه و شیمی نسلایِ آینده یَ تا اَبد واجبه کی اَ روزَ جشن بیگیرید.
18
اَ ماه دورون، جی مغربِ روزِ چهاردهم تا مغربِ روزِ بیست و یکم، وَأستی نانِ فطیر بوخورید.
19
اَ هفت روزِ میَأن شیمی خانه دورون خمیرمایه ندَأرید، و اگر کسی اَ هفت روزِ دورون نانِ خمیرمایه دار بوخوره وَأستی اسرائیلِ قؤمِ جَه اِخراجَ بِه. اَ قانونَأنِ انجام دَئَن حتی کسانی رِه کی اسرائیلی نییِد، ولی شیمی میَأن زندگی کوند واجبه.
20
اَ هفت روزِ دورون هیچ چیزی کی خمیرمایه دَأره نوخورید، و فقط فطیر بوخورید.»
21
بازن موسی همۀ اسرائیلِ شیخَأنَ دِخَأد و اوشَأنَ بوگوفت:«بیشید و شیمی خانواده یانِ رِه برّه تهیه بوکونید و اونَ عیدِ فصحِ رِه قربانی بوکونید.
22
برّه خونَ ایتَه تشتِ دورون دوکونید و ایتَه دسته گیاهِ زوفا مرَه، اون خونَ شیمی خانه دروازه دو تَه عمودی ستون و سردرَ وَأسینید، هیچ کودام جی شومَأن نوَأستی تا صُبح خو خانه جَه بیرون بَأِیِه.
23
چره کی او شب خداوند مصرِ جَه دوَأره تا مصریانَ بوکوشه، ولی وختی خونَ دروازه ستونِ دو طرف و سردرِ رو بیدینِه، او خانه جَه گوذره و فرشتۀ هلاک کوننده یَ وَأنَألِه کی شیمی خانه یَ بودورون بَأیِه و شمرَه بوکوشه.
24
اَ مراسمِ بجا اَوردن شومَأن و شیمی زَأکانِ رِه ایتِه قانونِ اَبدیه.
25
وختی اون سرزمینی کی خدا شمرَه وعده بدَه دَأره یَ فَأرِسِئید، اَ عیدَ جشن بیگیرید.
26
هر وخت شیمی زَأکان وَأورسِد کی چی وَسی اَ روزَ جشن گیرید،
27
بوگوئید؛ عیدِ فصحَ خداوندِ احترام نَئَن و اونِ شُکر کودَأنِ رِه جشن گیریم، اون شبی وَسی کی مصرِ جَه دوَأرست و مصریانَ بوکوشت، ولی وختی اسرائیلیانِ خانه یانَ فَأرِسِه، جی اَمَأن بوگوذشت و اَمرَه آسیبی نزَه.»
وختی موسی اَ گبأنَ بزَه، قؤم زمینِ رو بکفتد و خدایَ سجده بوکودد.
28
بازن بوشود و هوطویی عمل بوکودد کی خدا موسی و هارونَ دستور بدَه بو.
پیله پسرَأنِ مُردن
29
نیصف شب خداوند همۀ مصریانِ پیله پسرأنَ بوکوشت، جی فرعونِ پیله پسر کی اونِ جانشین بو بیگیفته، تا اون غلامی پسر کی سیاهچالِ دورون زندانی بو، همه بِمردد، حتی حیوانانِ پیله زَأکانم جی میَأن بوبورد.
30
او شبِ دورون فرعون و اونِ درباریان و همۀ مصرِ مردم خوابِ جَه ویریشتد و شیون و زاری بوکودد، چره کی خانه ای نوبو کی اونِ میَأن کسی نمردِه بِه.
31
فرعون هو شب موسی و هارونَ دِخَأد و اوشَأنَ بوگوفت:«هر چی زودتر مصرِ سرزمینِ جَه بیرون بیشید و بنی اسرائیلم شیمی اَمرَه بوبورید. بیشید و هوطو کی خَأستید خدایَ عبادت بوکونید.
32
شیمی گاو و گوسفند و گله یانم شیمی اَمرَه بوبورید، مرِه هم دوعا بوکونید.»
33
مصرِ مردمم بنی اسرائیلِ قؤمَ اِصرار کودد کی هر چی زودتر مصرِ جَه بیرون بوشود و گوفتد:«تا همۀ اَمرَه به کوشتَن ندَه دَأرید جی اَیَ بیشید.»
34
پس بنی اسرائیلِ قؤم هم خمیر بی مایه یَ پارچه میَأن بپیچستد و خوشَأنِ تشتَأنِ دورون دوکودد و خوشَأنِ دوشِ رو دوَستد.
35
و هوطو کی موسی اوشَأنَ بوگوفته بو خوشَأنِ مصری همساده یانِ جَه رخت، و چیک چیانِ طلا و نقره بخَأستد.
36
خداوند بنی اسرائیلَ مصریانِ نظرِ جَه مُحترم بوکوده بو، جوری کی هر چی اَشَأن خَأستد مصریانم اَشَأنَ فَأدَدِه. و اَطو بنی اسرائیل، مصرِ ثروتَ خوشَأنِ مرَه بوبوردد.
بنی اسرائیلِ خروج جی مصر
37
هو شبِ دورون بنی اسرائیلِ قؤم پیاده راه دکفتد و جی «رَعمسیس» بوشد به «سکّوت»، اوشَأن غیرِ زنأکأن و زَأکان، شیشصد هیزار مردانه بود.
38
قؤمایِ دیگری هم خوشَأنِ گاو و گوسفندَ اوسَأدد و بنی اسرائیلِ اَمرَه راه دکفتد و مصرِ جَه بیرون بأمود، اوشَأنِ گله یان خیلی زیاد بو.
39
وختی غذا خوردنِ رِه بِئسَأد جی اون خمیری کی خوشَأنِ مرَه بأورده بود نانِ فطیر بِپِختد و بوخوردد. اَنِ وَسی نان نپخته بود کی عجله اَمرَه مصرِ جَه بیرون بأمو بود و فرصت نَأشتِد کی نان بِپزد و خوشَأنِ راهِ رِه غذا اوسَأند.
40
بنی اسرائیل چهارصد و سی سال بو کی مصرِ دورون زندگی کودد.
41
او روزی کی چهارصد و سی سال تومامَ بوست، آخرین طایفه جی بنی اسرائیلِ قؤم مصرِ جَه بیرون بوشود.
42
خداوند اَ شبَ قؤمِ آزاد بوستَأنِ رِه در نظر بیگیفته بو، و بنی اسرائیلِ قؤمَ واجبه کی نسل در نسل اَ شبَ جشن بیگیرد تا اَشَأنَ بِخاطر بمَأنه کی خداوند اَ شبِ دورون اَشَأنَ مصرِ جَه بیرون بأورد.
فِصَحِ قوانین
43
و خداوند موسی و هارونَ بفرماست: «اَ فِصَحِ قوانینه؛ هیچ غیرِ یهودی ای نوَأستی فِصَحِ برّه گوشتَ بوخوره.
44
ولی اگر غلامی بِهِه دَأرید کی ختنه بوبوسته دَأره، تَأنِه برّه قربانی گوشتَ بوخوره.
45
شیمی خدمتکارِ غیرِ یهودی و مِهمانِ غیرِ یهودی نوَأستی اونِ جَه چیزی بوخوره.
46
همۀ قربانی گوشتَ هو خانه ای دورون کی اونِ میَأن سامان دَأرید بوخورید و اونِ جَه چیزی خانه جَه بیرون نوبورید و برّه اُستخوانانم نیشکینید.
47
همۀ اسرائیلِ قؤم وَأستی اَ مراسمَ بجا بأوره.
48
هیچ ختنه نوبوسته ای جی قربانی گوشت نوخوره، ولی اگر غیر یهودی ای کی شیمی میَأن زندگی کونه، و خَأیه خداوندِ احترام نَئَنِ رِه عیدِ فِصَح بجا بأوره، اول وَأستی همۀ اونِ خانه مردَأکان ختنه بوبود، بازن تَأنه اویِ مردمِ مَأنستَأن عیدِ فصَحَ بجا بَأوره.
49
عیدِ فِصَحِ قانونانَ همه وَأستی احترام بند، حتی کسانی کی غیرِ یهودی ایسد ولی ختنه بوبوسته دَأرد و شیمی میَأن زندگی کوند.»
50
همۀ بنی اسرائیلِ قؤم اَ کارانَ بوکودد و اونچی کی خداوند موسی و هارونَ بوگوفته بویَ اَنجام بدَد.
51
هو روزِ دورون خداوند همۀ بنی اسرائیلِ قؤمَ جی مصر بیرون بأورد.