1
و خداوند موسیَ بوگوفت:«ایتَه بلایِ دیگر فرعون و اونِ قؤمِ سر اَورم، اَی دفعَه اون خودش شیمی جَه خَأیِه کی بیشید، و همۀ شمرَه جی اَیَ بیرونَ کونه.
2
هَسَه قؤمَ بوگو کی چی زنَأکان و چی مردَأکان هر کس وَأستی خو همساده جَه چیک چیه طلا و نقره بخَأیِه.»
3
و خداوند قؤمَ، مصریانِ چومِ جَه محترم بوکود. و مصرِ مردم و فرعونِ درباریان موسی یَ پیله کس حیساب کودد.
4
و موسی فرعونَ بوگوفت: «خداوند اَطو فرمایِه؛ نیصفه شب مصرِ جَه دوَأرم،
5
و هر پیله زَأیی کی مصرِ سرزمینِ دورون بِئسِه، جی فرعونِ پیلِه زَأی کی اونِ جانشینه بیگیفته، تا اون کنیزِ پیلِه زَأی کی آسیابِ دستی پوشت نیشتِه، همه میرِد، حتی حیوانانِ پیله زأکان هم میرد.
6
و چنان شیون و زاری مصرِ دورون به پا بیبِه کی تا هَسَه نوبوسته و جی اَن پسم نیبِه.
7
اما قؤمِ بنی اسرائیلِ رِه حتی ایتَه سگم لاو نوکونه، تا بدَأنید کی خدا مصریان و اسرائیلیانِ میَأن فرق بنَه دَأره.
8
همۀ تی درباریان می ورجَه زانو زند و مرَه التماس کوند کی زودتر بنی اسرائیلِ قؤمَ مصرِ جَه بیرون بوبورم، بازن من مصرِ جَه بیرون شؤم.» موسی اَ گبَ کی بزَه، عصبانیتِ اَمرَه جی فرعونِ ورجَه بیرون بوشو.
9
و خداوند موسیَ بوگوفت:«فرعون تی گبَأنَ اِعتنا نوکونه، و اَن مرَه مُهلت دِهِه تا مصرِ میَأن مُعجزه یانِ ویشتری بوکونم.»
10
با اَنکی موسی و هارون فرعونِ چومِ جولو اَن همه مُعجزه بوکودد، بازم اون راضی نوبوست کی بنی اسرائیلِ قؤمَ آزادَ کونه، چره کی خدا اونِ دیلَ سختَ کوده بو.