10

^{1 2} و خداوند موسیَ بوگوفت: «ای موسی ویریز بوشو فرعونِ ورجَه، من اون و اونِ درباریانِ دیلَ سختَ کوده دَأرم تا اَ مُعجزه یانَ اوشَأنِ میَأن آشکارِ کونم. ایروز تو اونچی کی من مصرِ دورون بوکودم و اَ مُعجزه یانی کی آشکارَ کودمَه تی زَأکان و تی نوه یانِ رِه نقل کونی، و همۀ شومَأن فهمیدی کی من یَهوَه یم.» ³ پس موسی و هارون ویریشتد بوشود فرعونِ ورجَه و بوگوفتد: «یَهوَه عبرانیانِ خدا اَطو گویِه؛ تا کِی خَأیی می دستورِ جَه نافرمانی بوکونی؟ می قؤمَ آزادَ کون تا مرَه عبادت بوکوند. ⁴ چون اگر می قؤمَ آزادَ نوکونی من فردا ملخَأنَ تی طرف اوسِه کونم. ⁵ و ملخَان زمینَ پورَه کوند جوری کی شیمی پا جیرِ زمینَ نِتَأنید دِئِن. ملخَأن هر گیاهی کی تگرگِ بلا جَه بجا بِمَأنسته یَ خورد، و هر داری کی صحرا میَأن جُر بأمو دَأره یَ جی میَأن بورد. ⁶ و تی کاخ و تی درباریانِ خانه و همۀ تی مردمِ خانه، جی ملخ پورَه بِه، جوری کی تا هَسَه مصرِ دورون اَجور بلا نأمو دَأره و تی اَجدادم اَجور بلایَ به خاطر نَأورد.» بازن موسی وَأگردست و جی فرعونِ ورجَه بوشو بیرون. ⁷ اونموقع فرعونِ درباریان اونَ بوگوفتد: «تا کِی وَأستی اَ مردای، اَمرَه مُصیبتَ دوچارَ کونه؟ اَ مردُمَ آزادَ کون تا بوشود خوشَأنِ خدا یَهوَه یَ عبادت بوکوند. مگر خبردار نیئید کی همۀ مصر ویرانَ بوسته؟» ⁸ پس فرعونِ درباریان، موسی و هارونَ دوباره وَأگردَأند فرعونِ ورجَه، و فرعون اوشَأنَ بوگوفت:«بیشید و یَهوَه شیمی خدایَ عبادت بوکونید، ولی وَأستی مرَه بوگوئید چی کسانی عبادت کودَأنِ رِه شُد.» ⁹ موسی جواب بدَه:«همۀ اَمَأن اَمی دختران و پسران و اَمی پیران و جوانان و همۀ اَمی گاو و گوسفند مرَه شیم. چره کی همگی اَمَأن وَأستی اَ جشنِ دورون شرکت بوکونیم.» ¹⁰ فرعون بوگوفت: «به خدا قسم کی وَأنَألم کی زنان و زَأکانَ شیمی اَمرَه بوبورید، چون معلومه کی خَأئید کلک بزنید. ¹¹ اَطو نَه، فقط شومَأن مردَأکانی کی بالغ ایسید بیشید خدایَ عبادت بوکونید، چون جی هون اولم شیمی خَأستِه هَن بو.» بازن موسی و هارونَ جی فرعونِ ورجَه بیرون تَأوأدد. ¹² و خداوند موسیَ بوگوفت:«تی دسَ مصرِ سرزمینِ طرف درازَ کون تا ملخَأن مصرَ فوتورکد، و همۀ گیاهانی کی تگرگِ بلا جَه بِمَأنسته دَأردَ بوخورد» ¹³ وختی موسی خو عَصایَ راستَ کود مصرِ سرزمینِ طرف، خداوندِ دستورِ اَمرَه همۀ او روز و همۀ او شبَ، شرقِ طرفِ جَه توندِ بادی بأمو، وختی صبح بوبُست شرقِ باد خو مرَه ملخَأنَ بأورد. ¹⁴ ملخان همۀ مصرِ سرزمینَ بوپوشأند و همه جایَ پورَه کودد، و ملخَأن اوقدر زیاد بود کی تا اونموقع کسی اونِ مَأنستَأنَ نیدِه بو، و جی اون پسم نیدینِه. ¹⁵ همۀ زمینَ ملخَأن بوپوشَأند و زمین، سیاهَ بوسته بو، همۀ گیاهانَ و دارانِ میوه یَ کی تگرگِ جَه بجا بِمَأنِسته بویَ ملخَأن بوخوردد، جوری کی مصرِ سرزمینِ میَأن دِ هیچ میوه و ورگی دارِ رو، و هیچ سبزِ گیاهی صحرا دورون باقی نِمَأنسته بو. ¹⁶ اونموقع فرعون عجله اَمرَه موسی و هارونَ دِخَأد و بوگوفت:«من شمرَه، و یَهوَه شیمی خدایَ بدی بوکودم، ¹⁷ اَی دفعه هم مرَه ببخشید و شیمی خدا جَه بخَأئید کی اَ بلایَ می جَه دورَ کونه» ¹⁸ اونموقع موسی جی فرعونِ ورجَه بیرون بوشو و خدا جَه بخَأست کی ملخَأنَ دورَ کونه. ¹⁹ و خداوند هم اَمر بوکود غربِ طرفِ جَه توندِ بادی بَایِه و اَ توندِ باد، همۀ ملخَأنَ خو مرَه بوبورد و دریایِ سُرخِ دورون دوکود، جوری کی مصرِ دورون حتی ایتَه ملخم باقی نِمَأنست. ²⁰ ولی بازم خداوند فرعونِ دیلَ سختَ کود و اون بنی اسرائیلِ قؤمَ آزادَ نوکود. ²¹ و خداوند موسی یَ بفرماست:«تی دسَ آسمانِ طرف درازَ کون تا ایتَه تاریکی غلیظ همۀ مصرَ بیگیره.» ²² موسی خو دسَ آسمانِ طرف درازَ کود، و تا سه روز ایتَه تاریکی غلیظ کی هیچ جایَ نِشَأستِه دِئِن همۀ مصرَ بیگیفت. ²³ مردم نِتَأنستد همدیگرَ بیدیند، و تا سه روز کسی خو خانه جَه بیرون نَأمویِه، ولی سابقِ مَأنستَأن، قؤمِ بنی اسرائیلِ منطقه دورون همه جا روشن بو. ²⁴ و فرعون موسی یَ دِخَأد و بوگوفت: «بیشید شیمی خدایَ عبادت بوکونید، شیمی زَأکانم بوبورید، فقط گله یان و گاو و گوسفند شیمی اَمرَه نوبورید.» ²⁵ موسی بوگوفت:«اَمَأن اَمی گاو و گوسفندِ گله یانَ وَأستی اَمی اَمرَه بوبوریم، تا اَمی خدا یَهوَه رِه، قربانی بوکونیم، ²⁶ همۀ اَمی گله یانَ وَأستی اَمی اَمرَه بوبوریم و حتی ایتَه حیوانم نوَأستی باقی بنیم، چره کی تا قربانگاهَ فَأنرسیم نَأنیم کی خداوند کَ ی تَه حیوانَ قربانی رِه خَأیِه، و اَمَأن کَ ی تَه حیوانَ وَأستی قربانی بوکونیم.» ²⁷ و خداوند فرعونِ دیلَ سختَ کود و بازم فرعون اوشَأنَ آزادَ نوکود. ²⁸ بازن فرعون موسیَ بوگوفت:«می حضورِ جَه بیرون بوشو و دِ وَأنگرد، اگر ایبار دیگر ترَه بیدینم، ترَه کوشم.» ²⁹ موسی جواب بدَه:«باشد، دِ مرَه نیدینی.»