1
خلاصه ای برأرأن، شومَأن اَمی جَه یاد بیگیفتید کی چوطو وَأستی رفتار بوکونید تا خدایَ خوشحالَ کونید و هوطو کی هَ کارَم انجام دهید، ولی هَسَه به نام عیسایِ خداوند شیمی جَه استدعا دَأرم و التماس کونم کی در اَن باره ویشتر تلاش بوکونید.
2
چون دَأنید کی عیسایِ خداوندِ طرفِ جَه چی اَحکامی شمرَه فَأدَه دَأریم.
3
خدا اِراده اَنه کی شومَأن مُقدّس بیبید، خودتَأنَ بی عفتی جَه دور بدَأرید.
4
هر کودام جی شومَأن وأستی بدَأنه کی چوطو وَأستی خو بدنَ کنترل بوکونه، و اونَ مقدس و محترم بدَأره.
5
وَأنألید شیمی بدن قؤمهایِ خدانشناسِ مَأنستَأنْ شهوتِ اَسیر بیبه.
6
تا هیچکس ایتَه ایماندارِ دیگرِ حریمَ تجاوز نوکونه و اونِ زنَ صاحاب نیبه و اونِ جَه سوءاستفاده نوکونه. چون هوطو کی پیشترانم شمرَه بوگوفتم و هشدار بدم خدا اَجور کارانِ وَسی آدمَ سِزا دِهه.
7
چون خدا اَمرَه ناپاکی رِه دنخَأده، بلکی دخأده تا پاک و مقدّس بیبیم.
8
پس هر کس اَ تعلیمَ قبول نَئره، بدَأنه کی انسانَ ردَ نوکونه بلکی خدایی یَ ردَ کونه کی خو روحِ قدوسَ شمرَه عَطا بوکوده.
9
و اما دربارۀ اَنکی وَأستی همدیگرَ مُحبت بوکونیدْ لازم نییه شمرَه چیزی بینیویسم، چون خودتان خدا جَه یاد بیگیفته اید کی چوطو وَأستی همدیگرَ مُحبت بوکونید.
10
و البته هَ کارم کونید، و واقعاً همۀ مقدونیه مسیحیانِ اَمرَه هَطو رفتار کونید، ولی ای برأرأنْ، التماس کونم باز ویشتر جی اَن مُحبت بوکونید.
11
شیمی هدف اَن بیبه کی ایتَه زندگی آرام بدَأریدْ، شیمی سرَ بیجیر تَأوأدید و خودتانِ زندگی یَ مشغول بیبید و خودتانِ دسِ اَمرَه کار بوکونید، هوطو کی پیشترانِ رِه هم شمرَه بوگوفتم ایم.
12
و اَطو شیمی زندگی، غیرِمسیحیانِ رو تأثیر خوب نهه و اوشَأنْ شمره اِعتماد کوند و اِحترام نهد، و اَطو شیمی دسَ هم اَی تَه اوی تَه جولو درازَ نوکونید و هیچکسَ مُحتاج نیبید.
خداوند عیسی وَأگردستَن
13
ای برأرأن، نخَأیم کسانی کی بمرده دَأردِ حالِ جَه بیخبر بیبید، نوکونه کسانی کی اُمیدی نَئردِ مَأنستَأن ناراحتَ بید و غُصه بوخورید.
14
چون اگر ایمان دَأریم کی عیسی بمرد و دوباره زندَه بوست، پس یقین بدَأرید خدا اوشَأنی کی عیسی دورون خوفته دَه اونِ اَمرَه وَأگردَأنه.
15
اَنَ من خودِ خدا کلامِ جَه شمرَه گویم؛ اَمَأن مسیحیانِ جَه اون کسانی کی تا خداوندِ آمونِ روزْ هنوز زنده ئیم، پیشتر جی مُرده یان صُعود نوکونیم.
16
هون موقعی کی خودِ خداوند، فرمان بلندِ اَمرَه، و فرشته یانِ رئیسِ آوازِ اَمرَه و شیپورِ صدا مرَه جی آسمان بیجیر بَأیه، پیشتر جی همه، مسیحیانی کی بمرده دَأرد زندَه بود.
17
بازن، اَمَأن کی هنوز زنده و باقی بمأنسته ایم، اوشَأنِ اَمرَه اَبرانِ دورون به بوجُر شیم تا هوا دورون بیشیم خداوندِ پیشواز، و تا اَبد خداوندِ اَمرَه بِئسیم.
18
پس اَ گبانِ اَمرَه همدیگرَ تشویق بوکونید و دیلداری بدید.