5

¹ شاید وَأورسید مسیح کِی وَأگرده، ای عزیز برأرأن، لازم نییه دربارۀ اَ اُمور چیزی شمرِه بینیویسم. ² چون خودتان خُب دَأنید کی هیچکس اونِ وَأگردستَنِ زمانَ نَنه. «خداوندِ روز» دُزدی کی شب اَیه مَأنستَأن یِهو ناخبره فأرسه. ³ اونموقع کی مردم گوید:«همه جا اَمن و اَمانه» ناخبره مُصیبت اوشَأنِ رو نازل بِه، چوطو کی زنِ حامله یَ یهو دردِ زایمان بیگیره، اونموقع دِ اوشَأنِ رِه راهِ فراری باقی نمَأنه. ⁴ ولی ای برأرأن، شومَأن تاریکی میَأن نِئسَأئید کی اون روزْ دُزدِ مَأنستَأن ناخبره شمرَه فوتورکه. ⁵ شومَأن همه تَه نور و روشنایی زَأکأنید و تاریکی و شبِ اَمرَه کاری نَئرید. ⁶ پس آماده بیبید و دیگرانِ مَأنستَأن واخوابَ نیشید، هوشیار بیبید و مسیحِ وَأگردستَنِ رأفأ بِئسید. ⁷ چون اوشَأنی کی خوسد، شَبان خوسد، و مَستان، شبان مستَ کوند. ⁸ ولی اَمَأن کی نورِ دورون زندگی کونیم، وَأستی هوشیار بیبیم و ایمانِ و مُحبتِ زِره یَ دوکونیم، و نجاتِ اُمیدَ، کُلاهخودِ مَأنستَأن خودمانِ سرِ رو بنیم. ⁹ چون خدا اَمرَه انتخاب نوکوده تا اونِ غضبَ گرفتارَ بیم، بلکی اَمرَه انتخاب بوکوده تا بواسطۀ اَمی خداوند عیسی مسیح نجات پیدا کونیم. ¹⁰ مسیح اَمی وَسی بمرد تا اونِ اَمرَه زندگی بوکونیم، چی اونِ آمونِ موقع زنده بیبیم چی نیبیم. ¹¹ پس همدیگرَ تشویق و تقویت بوکونید، هَطو کی هَسَه هم انجام دهید.

¹² هَسه ای برأرأن، شیمی جَه تقاضا دَأرم کسانی کی شیمی میَأن زحمت کشد و خداوندِ طرفِ جَه شیمی رهبراند، و شمرَه نصیحت و راهنمایی کوندَه احترام بنید. ¹³ اون زحماتی وَسی کی شمرِه کشد، اوشَأنَ تمامِ وجودِ اَمرَه احترام بنید و مُحبت بوکونید. همدیگرِ مرَه صُلح و آرامشِ دورون زندگی بوکونید. ¹⁴ ای برأرأن، شیمی جَه تقاضا دَأرم آدمای تنبل و بیکارَ توبیخ بوکونید، ترسوئانَ دیلداری بدید، ضعیفانَ حمایت بوکونید، همۀ مردمَ تحمل بوکونید. ¹⁵ مراقب بیبید بدیَ، بدی اَمرَه تلافی نوکونید، بلکی همیشه همدیگرَ و باقی مردمَ خوبی بوکونید. ¹⁶ همیشه شادمان بیبید، ¹⁷ همیشه دعا بوکونید، ¹⁸ هر وضعی دورون خدایَ شُکر بوکونید، چون اَن خدا اِراده یه شمرِه کی عیسی مسیحِ شینید. ¹⁹ روح القدسِ کارِ مانع نیبید. ²⁰ نبوتهایی کی خدا مؤمنینَ فأده یَ حقیر ندَنید. ²¹ همه چیَه تحقیق بوکونید و اونچی کی خوبه یَ مُحکم دوچوکید. ²² هر جور بدی جَه دوری بوکونید. ²³ دعا کونم خدایی کی سلامتی سرچشمه یه، خودش شمرَه کاملاً مقدس بوکونه، و شیمی روحْ و جانْ و شیمی بدنَ تا اَمی خداوند عیسی مسیحِ آمونِ موقع تماماً بی عیب محفوظ بدَأره. ²⁴ اونی کی شمرَه دخَأده اَمینه و طبقِ خو وعده اَ کارَ کونه. ²⁵ ای برأرأن، اَمرِم دعا بوکونید. ²⁶ همۀ ایماندارانَ می طرفِ جَه مَأچی مُقدسانه بدید و اوشَأنَ سلام برسَأنید. ²⁷ خداوندِ حضورِ جَه شمرَه قسم دهم کی همۀ ایماندارانِ رِه اَ نامه یَ بخأنید. ²⁸ اَمی خداوند عیسی مسیح فیض شیمی اَمرَه بیبه. آمین