3
1
آخرسر بیدم دِ ویشتر جی اَن نتَأنم شیمی جَه بیخبر بوبوم، تصمیم بیگیفتم آتنِ دورون تنها بِئسم.
2
و تیموتائوسَ کی اَمی برأر و خدا خادمه، و مسیحِ انجیلِ انتشارِ رِه خدمت کونه، اوسَه کودم شیمی ورجَه تا شمرَه شیمی ایمانِ میَأن تشویق و تقویت بوکونه.
3
تا هیچکودام جی شومَأن اَ زحماتی وَسی کی دینید سُستَه نیبه، هر چند خودتان دَأنید کی اَ آزارُ اَذیتان جُزئی جی خدا نقشه یه اَمَأن مسیحیانِ رِه.
4
شمرَه یاد اَیه او زمان کی شیمی ورجَه ایسَه بیم شمرَه بوگوفتیم کی اَذیت و آزار بید، و هوطو هم بوبُست.
5
هَنه وَسی چون دِ اَ بیخبری طاقتَ نَأشتم، اوسه کودم تا شیمی ایمانِ جَه باخبر بوبوم، حقیقت ترسه ئِم کی شیطان شمرَه وسوسه بوکوده به و آزمایشِ میَأن تَأوأدَه بِه و اَمی زحمات بی نتیجه بمَأنسته بِه.
تیموتانوسِ گزارش
6
ولی هَسَه تیموتائوس جی شیمی ورجَه وَأگردسته و خبرایِ خوشی اَمَرَه بدَه دَأره، شیمی ایمانِ جَه و مُحبتی کی نسبتِ به اَمَأن دَأرید، و بوگوفت کی چوطو اَمرَه لُطف دَأرید و همیشه اَمَرَه به خاطر اَورید و هوطو کی اَمَأن شیمی دِئِنِ رِه اِشتیاق دَأریم، شومَأنم اَمی دِئِنِ رِه مُشتاقید.
7
ای برأرأن، با همۀ گرفتاریان و نگرانیهایی کی دَأریم، ولی اَ خبر اَمی خیالَ شیمی جَه راحتَ کود، و شیمی ایمانْ اَمی خیالَ آسودَه کوده.
8
تا زمانی کی شومَأن ایمانِ به خداوندِ دورون اُستوار بِئسید، اَ مشکلاتِ تحملْ کودَأن اَمرِه آسانه.
9
واقعاً نَأنم چوطو تَأنیم خدایَ شُکر بوکونیم اَن همه خوشی ایی وَسی کی خدا حضورِ جَه دربارۀ شومَأن دَأریم؟
10
اَمَأن شب و روز دائماً دوعا کونیم کی باز فرصتی پیش بَأیه کی بتَأنیم شمرَه بیدینیم، تا بتَأنیم هر نقصی شیمی ایمانِ دورون وجود دَأره یَ برطرف بوکونیم.
11
خدا یعنی اَمی پئرْ، و اَمی خداوند عیسی مسیح اَمی راهَ شیمی طرف هموارَ کونه و ایبار دیگر اَمرَه اوسه کونه شیمی ورجَه.
12
و خداوند شیمی مُحبتَ چنان زیادَ کونه کی بتَأنید همدیگرَ و دیگرانَ مُحبت بوکونید، هوطویی کی اَمَأن شمرَه مُحبت کونیم.
13
و شیمی دیلانَ قَوی و اُستوار بوکونه تا موقعی کی اَمی خداوند عیسی مسیح خو مُقدسینِ مرَه وَأگرده، شومَأن خدا حضورِ جَه، یعنی اَمی پئرِ حضورِ جَه پاک و بی عیب بیبید.