2
پولسِ خدمت تِسالونیکی میَأن
1
ای برأرأن، خودتَأن دَأنید کی اَمی اَمون شیمی ورجَه بی نتیجه نوبو.
2
هوطو کی دَأنید پیشتر جی اَنکی بأئیم شیمی ورجَه، شهرِ فیلیپی دورون اِنجیلِ پیغامِ وَسی، اَمرَه اَذیت و آزار بوکودد و بی احترامی بیده ایم، ولی خدا یاری بوکود و اَمرَه جرأت بدَه تا بتَأنیم خدا انجیلَ اَنهمه مخالفت و دوشمنی میَأن، شمرَه برسَأنیم.
3
اگر شمرَه تشویق کونیم که انجیلَ ایمان بأورید، جی گومراهی یا موزی گری نییه، یا نخَأئیم شمرَه گول بزنیم.
4
ولی چون خدا اَمرَه اعتماد بوکوده و لایق بدَأنسته و انجیلَ اَمرَه امانت فَأده دَأره، هَنه وَسی اَمَأنم ذره ایی خدا پیغامَ تغییر ندیم؛ حتی اگر مردمَ خوش نَأیه، چون اَمَأن خدایی یَ خدمت کونیم کی اَمی دیلِ نیتِ جَه خبر دَأره.
5
خدا خودش شاهده و شومَأنم خُب دَأنید کی اَمَأن هیچ موقع چرب زبانی نوکوده ایم و اَمی حرفَأن جی رویِ ظاهرسازی و طمع نوبو.
6
و هیچموقع نخَأستیم کی مردمْ اَمرَه احترام بند، چی شومَأن چی دیگرانْ، هر چند به عنوانِ مسیحِ رسولان شیمی گردن حَق دَأشتیم.
7
ولی نه فقط اَ حقِ جَه استفاده نوکودیم، بلکی ایتَه مهربانِ مارِ مَأنستَأن کی خو شیرخواره زَأیِ جَه مراقبت کونه، شیمی مرَه مُلایمتِ اَمرَه رفتار بوکودیم.
8
اَمَأن اَقدر شمرَه علاقه دَأشتیم کی نه فقط حاضر بوئیم شادی اَمرَه خدا انجیلَ شمرَه برسَأنیم، بلکی حاضر بوئیم اَمی جانَ شِمرِه فَأدیم، اَز بَس کی اَمرِه عزیز بوئید.
9
ای عزیزِ برأرأن، حتماً شمرِه یاد اَیه کی چوطو زحمت کشه ایم و شب و روز کار کودیم و عَرق فوکودیم، اَمَأن اَ کارانَ کودیم تا وختی انجیلِ پیغامَ موعظه کونیم هیچ کسِ سَربار نیبیم.
10
شومَأن شاهدید، و خدا هم گواهه کی چوطو شومَأن ایماندارانِ اَمرَه پاکی و عدالتُ بی عیبی اَمرَه رفتار بوکودیم.
11
هوطو کی دَأنید اَمی رفتار شومَأن تک تکِ اَمرَه پئری مَأنستَأن بو کی خو زَأکأنَ نصیحت کوده و دیلداری دَئه.
12
و شمرَه نصیحت کودیم و شیمی جَه خَأستیم جوری رفتار بوکونید کی خدایی شایسته بیبه کی شمرَه به خو ملکوت و به خو جلال دخَأده دَأره.
13
و هَنه وَسی همیشه خدایَ شُکر کونیم کی وختی خدا کلامَ اَمی جَه بیشتَأوستید، اونَ به عنوانِ ایتَه پیغام جی انسانِ طرف قبول نوکودید، بلکی اونَ خدا طرفِ جَه بدَأنستید، البته حقیقت هم هَنه، و خدا کلام هَسَه شومَأن ایماندارانِ دورون عمل کودَأن دره و شیمی زندگی یَ عوضَ کوده.
14
ای برأرأن، شومَأنم دوروست هون راهی یَ شوئون درید کی یهودیه کلیسائان کی مسیحِ عیسی مرَه مُتحدد شوئون دَرد، چون شومَأنم شیمی هموطنانِ جَه هون آزارانی یَ بیده اید کی اوشَأنم یهودیانِ جَه بیده دَأرد،
15
یهودیانی کی عیسایِ خداوندَ و خدا اَنبیایَ بوکوشتد و اَمرَم بیرون تَأوأدد، اوشَأنْ خدایَ خوشنود نوکوند و همۀ مردمِ اَمرَه دوشمنی دَأرد،
16
و وَأنألد اَمَأن غیرِیهودیانِ اَمرَه گب بزنیم تا نجات پیدا کوند. و اَطو همیشه خوشَأنِ گوناهانِ پیمانه یَ لبریز کوند. ولی آخرسر خدا غضب اوشَأنِ سر نازل بِه.
پولسِ اِشتیاقْ تِسالونیکی ایماندارانِ دِئِن وَسی
17
ای برأرأن، چون ایتَه مدتِ کوتاه شیمی جَه دور بوئیم، البته اَمی دیل همیشه شیمی ورجَه بو، اشتیاقِ ویشترِ اَمرَه سعی بوکودیم تا ایبار دیگر شیمی رویَ بیدینیم.
18
هَنه وَسی من پولسْ، یکی دوبار خَأستم بأیم شیمی ورجَه، ولی هربار شیطان وَأنأشت!
19
چون اَمی اُمید و اَمی شادی و اَمی تاجِ افتخارْ وختی اَمی خداوند عیسی مسیح وَأگرده، اونِ حضورِ جَه چیسه؟ مگر شومَأن نیئید؟
20
حقیقتاً کی شومَأنْ اَمرِه مایۀ افتخار و شادمانی ئید.