¹ ۔ حکمت کی فضیلت کیا حِکمَت زور سے نہیں پُکارتی اَور دانائی اپنی آواز بُلند نہیں کرتی ؟ ² ۔ وہ راہ میں اُونچے مقاموں کی چوٹیوں پر اَور رستوں کے بیچ میں کھڑی ہوتی ہَے ۔ ³ ۔ اَور پھاٹکوں کے نزدیک شہر کی دہلیز کے پاس یعنی دروازوں میں داخل ہونے کی جگہ زور سے پُکارتی ہَے۔ ⁴ ۔ اَے آدمیو! مَیں تُمہیں بُلاتی ہُوں اَور بنی آدم کے ساتھ میری بات ہَے ۔ ⁵ ۔ اَے نادانو۔ دانائی سیکھو ۔اَے جاہلو۔ فہم کو پہچانو۔ ⁶ ۔سُنو۔ کیونکہ میں اچھی باتیں بولوں گی اَور میرے لب دُرست باتوں کے لئے کھلیں گے ۔ ⁷ ۔ کیونکہ میرا مُنہ حَق بیان کرتا ہَے۔ اَور میرے لب شرارت سے نفرت رکھتے ہَیں ۔ ⁸ ۔ میرے مُنہ کی سب باتیں صداقت ہیں ۔اُن میں کُچھ تِرچھا اَور ٹیڑھا نہیں ۔ ⁹ ۔ وہ سمجھنے والے کے نزدِیک سب کی سب دُرست ہَیں اور عِلم رکھنے والے کے نزدِیک راست ہَیں ۔ ¹⁰ ۔ میری تربیت کو قبُول کر و نہ کہ چاندی کو اَور عِلم کو کُندن پر فوقیّت دو۔ ¹¹ ۔ کیونکہ حِکمَت جواہرات سے بہتر ہَے اور کوئی خزانہ اُس کے برابر نہیں ۔ ¹² ۔ مَیں حِکمَت ،مشورے کے ساتھ رہتی ہُوں ۔ مَیں عِلم اَور فہم رکھتی ہُوں ۔ ¹³ ۔ خُداکا خوف بدی سے عداوت ہَے ۔غرور اور گھمنڈ اور کج گو سے مُجھے نفرت ہَے۔ ¹⁴ ۔ مشورے اَور مہارت میرے ساتھ ہیں۔ مَیں فہم ہُوں ۔توانائی میری ہَے ۔ ¹⁵ ۔ سلاطین میرے ذریعہ سے مُسلّط ہیں اَور حاکمِ اِنصاف سے عدالت کرتے ہَیں۔ ¹⁶ ۔ اُمراء میرے ذریعہ سے حکومت کرتے ہیں اَور رئیس زمین پر حُکمران ہَیں ۔ ¹⁷ ۔ مَیں انہیں پیار کرتی ہُوں جو مُجھے پیار کرتے ہیں اَور جو میری تلاش کرتے ہَیں وہ ُ مُجھے پالیں گے۔ ¹⁸ ۔ دولت اَورعزّت اَور پائیدار سرمایہ اَور اِقبال مندی میرے پاس ہَیں۔ ¹⁹ ۔ میرا پھَل سونے اَور کُندن سے بہتر اَور میرا حاصِل نفیس چاندی سے افضل ہَے ۔ ²⁰ ۔مَیں صداقت کی راہ میں اَور عدل کے رستوں کے درمیان چلتی ہوں ۔ ²¹ ۔ تاکہ انہیں جو مُجھے پیار کرتے ہیں ۔اچھے مال کے وارِث بناؤں اَور اُن کے خزانے بھر دُوں ۔ ²² ۔ خُداوند اپنی راہ کے شُروع میں مُجھے رکھتا تھا۔اس سے پیشتر کہ ابتدا میں کُچھ بنایا ۔ ²³ ۔ مَیں اَزل سے مقرر کی گئی۔ قدیم سے یعنی اِس سےپیشتر کہ زمین بنائی گئی ۔ ²⁴ ۔ مَیں اُس وقت پیدا ہوئی جس وقت گہراؤ اَور پانیوں کے بڑے چشمے نہ تھے۔ ²⁵ ۔ اُس سے پیشتر کہ پہاڑ قائم کئے گئے اَور مَیں ٹِیلوں سے پیشتر پیدا ہوئی ۔ ²⁶ ۔ اُس نے ہنُوز زمین کو نہیں بنایا تھا اَور نہ میدانوں اَور نہ دُنیا کی پہلی گُردہی کو ۔ ²⁷ ۔ جب اُس نے آسمان قائم کِیا تو مَیں وہاں تھی۔ جب اُس نے گہراؤ کے چہرے پر دائرہ کھینچا ۔ ²⁸ ۔ جب اُس نے بُلندی پر اَفلاک ٹھہرائے اَور گہراؤ کے چشمنے مضبوط کئے ۔ ²⁹ ۔ جب اُس نے سمندر کی حدُود باندھیں تاکہ پانی کِناروں سے باہر نہ جائے ۔ جب اُس نے زمین کی بنیاد ڈالیں ۔ ³⁰ ۔ تب مَیں نے اُس کے ساتھ ماہر کارِیگر کی مانند تھی اَور روز بروز خُوشی کرتی تھی ۔ہروقت اُس کے آگے کھیلتی تھی ۔ ³¹ ۔ مَیں زمیں پر کھیلتی تھی اَور بنی نُوع اِنسان کے ساتھ رہنا میری خُوشی تھی ۔ ³² ۔ پس اب اَے فرزندو ! میری سنو۔ کیونکہ مُبارک ہَیں وہ جو میری راہوں کو مانتے ہیں ۔ ³³ ۔ میری تربیت کو سُنو اَور دانِشمند بنو اَور اُس سے انکار نہ کرو۔ ³⁴ ۔ مُبارَک ہَے وہ اِنسان جو میری سُنتا ہَے ۔جو روز بروز میرے پھاٹکوں ہے پاس جاگتا ہَے۔ اَور میرے دروازوں کی چوکھٹوں پر انتظار کرتا ہَے۔ ِ ³⁵ ۔ کیونکہ جِس نے مُجھے پایا اُس نے زِندگی پائی اَور خُداوند کی خُوشنُودی حاصل کی۔ ³⁶ ۔ لیکن جو مُجھ سے مُحروم ہَے وہ اپنی زندگی پر ظُلم کرتا ہَے ۔سب جو مُجھ سے نفرت کرتے ہیں مَوت کو پیار کرتے ہَیں ۔