¹ ۔ مختلف نصائح اَے میرے بیٹے ! اگر تُو اپنے دوست کا ضامِن ہُوااور اگر تو ہاتھ پر ہاتھ مار کر کسی بیگانے کا ذمہ دار ہوا۔ ² ۔ تو تُو اپنے مُنہ کی باتوں سے پھندے میں پڑا اَور اپنی باتوں سے تُو پکڑا گیا۔ ³ ۔اَے میرے بیٹے ! تُو یہ کر اَور اپنے آپ کو بچا جب تُو اپنے پڑوسی کے ہاتھ میں پڑگیا ہَے۔تو جا اَور اپنے پڑوسی کے آگے گِر اَور اَس کی مِنّت کر۔ ⁴ ۔اپنی آنکھیں نیِند کے سپُرد نہ کر۔نہ اپنی پلکوں کو اُونگھنے دے ۔ ⁵ ۔ اپنے آپ کو ہِرن کی طرح دام سے اَور چڑیا کی مانند صیّاد سے بچا۔ ⁶ ۔اَے کاہل مَرد ! چیونٹی کے پاس جا ۔ اُس کی رَوشیں دیکھ اَور عقلمند ہو۔ ⁷ ۔ اُس کا کوئی رہبر کوئی دار وغہ اَور کوئی حاکمِ نہیں ۔ ⁸ ۔ وہ خُوراک گرمی کے موسم میں مُہیّا کرتی اَور فصل کے وقت اپنی خُوراک جمع کرتی ہَے۔ ⁹ ۔ اَے کاہِل مَرد۔ تُو کب تک سوتا رہے گا۔؟ تُواپنی نیند سے کب اُٹھے گاِ؟ ¹⁰ ۔ تھوڑا سا سونا تھوڑا سا اُونگھنا اَور آرام کےلئے کُچھ ہاتھوں کا سمیٹنا! ¹¹ ۔اَور مُفلِسی رہزن کی طرح تُجھ پر آئے گی اَور مُحتاج مُسلّح آدمی کی مانند ۔ ¹² ۔خبِیث و شریر مَرد اپنے مُنہ کی خِیانت میں چلتا ہَے۔ ¹³ ۔ وہ آنکھیں مارتا پاؤں سے اشارہ کرتا اَور انُگلیوں سے بولتا ہَے۔ ¹⁴ اُس کے دِل میں فریب ہَے۔ وہ ہر وقت شرارت پیدا کرتا اَور جھگڑا ڈالتا ہَے ۔ ¹⁵ ۔ اَس لئے اُس پر یکایک ہلاکت آئے گی ۔وہ ناگہاں تباہ ہوگا۔اَور اُس کےلئے عِلاج نہ ہوگا ۔ ¹⁶ ۔چھ چیزیں ہَیں جِن سے خُداوند نفرت کرتا ہَے بلکہ سات اُس کے نزدیک مکُروہ ہَیں۔ ¹⁷ ۔ اُونچی آنکھیں اَور جھوٹی زُبان اَور ہاتھ جو بے گُناہ کا خُون بہاتے ہَیں ۔ ¹⁸ ۔ اَور دِل جو بَدی کے منصُوبے پیدا کرتا ہَے اَور پاؤں جو فساد کی طرف دوڑنے میں تیز ہیں۔ ¹⁹ ۔اَورجھوٹا گُوا ہ جو جھُوٹی باتیں پھیلاتا ہَے اَور وہ شخص جو بھائیوں کے درمیان جھگڑا ڈالتا ہَے۔ِ ²⁰ ۔زِنا کاری سے خبردار اَے میرے بیٹے ! اپنے باپ کا حُکم مان ۔اَور اپنی ماں کی تعلیم کو ترک نہ کر ۔ ²¹ ۔ ہر وقت اُسے اپنے دِل میں باندھ اَور اپنی گردن میں لٹکا ۔ ²² ۔ جب تُو چلتا ہَے تو یہ تیرا رہبر ہوگا۔ جب تُو سوتا ہَے تو تیری نِگہبانی کرے گا۔اَور جب تُو جاگتا ہَے تو تیرے ساتھ باتیں کرے گا۔ ²³ کیونکہ حُکم چراغ ہے۔ تعلیم نُور ہَے۔ اَور تربیت کی جھڑ کی زِندگی کی راہ ہَے ۔ ²⁴ ۔ تاکہ اجنبی عورت سے یعنی بیگانہ عورت کی زُبان کی چاپلُوسی سے تیری حِفاظت کرے۔ ²⁵ ۔ اپنے دِل میں اُس کے حُسن کی خُواہش نہ کر ۔اَور اُس کی پلکوں کا گرفتار نہ بن ۔ ²⁶ ۔ فاحشہ کے سبب سے آدمی روٹی کے ٹکڑے کا مُحتاج ہو جاتا ہَےپر زِنا کار عورت قیمتی جان کا شکار کرتی ہَے۔ ²⁷ ۔ کیا ہوسکتا ہَےکہ انِسان اپنے سینے میں آگ لے اَور اُس کے کپڑے نہ جِل جائیں ؟ ²⁸ ۔یا کوئی جَلتے کوئلوں پر چلے اَور اُس کے پاؤں نہ جَلیں ۔ ²⁹ ۔ ایسا ہی وہ ہَے جو اپنے ہمسایہ کی عورت سے صُحبت کرتاہَے جو کوئی اُسے چھُوتا ہَے بے سزا نہ رہے گا۔ ³⁰ ۔ کیا لوگ اُس چور کو حِقیر نہیں جانتے جو بھُوکا ہوکر اپنا پیٹ بھرنے کےلئے چوری کرے؟ ِ ³¹ ۔اگر وہ پکڑا جائے تو سات گُناہ اِدا کرے گا اَوراُسے اپنے گھر کا سارا مال دینا پڑے گا۔ ³² ۔ لیکن زِنا کرنے والاعقل سے محُروم ہَے ۔ یُوں کرنے والا اپنے آپ کو ہلاک کرتا ہَے۔ ³³ ۔ وہ چوٹ اَور ذِلّت پائے گا ۔اَور اُس کی رُسوائی مِٹائی نہ جائے گی۔ ³⁴ ۔ کیونکہ مَرد کا غُصّہ غیرت کا غُصّہ ہَے۔ وہ انتِقام کے دِن ترس نہ کرے گا۔ ³⁵ ۔ وہ فدیہ قبُول نہ کرے گا ۔اَور وہ راضی نہ ہوگا ۔اگرچہ تُو بہُت رِشوت دے۔