¹ ۔چھٹا حکم اَے میرے بیٹے! میری حِکمَت پر دھیان لگا اَور میر ی فہم کی طرف اپنے کان مائل کر ۔ ² ۔ تاکہ تُو میرے مُنہ کی مشورت کی حِفاظت کرےاَور تیرے لب عِلم کی نگہبانی کریں۔ ³ ۔ عورت کے بہکانے پر تُوجّہ نہ کر کیونکہ بیگانی عورت کے ہونٹوں سے شہد ٹپکتا ہَے اَور اُس کا تالُو تیل سے زیادہ چکنا ہَے۔ ⁴ ۔مگر اُس کا انجام اَفستِین ( ناگدونا)کی طرح کڑواہَے اَور دودھاری تلوار کی مانند تیز ہَے۔ ⁵ ۔اُس کے پاؤں مَوت کی طرف نیچے اُترتے ہیں اَور اُس کے قدم پاتال تک پہُنچتے ہیں۔ ⁶ ۔وہ زندگی کے رستے پر نہیں چلتی بلکہ اُس کی راہیں آوارہ ہیں اَور وہ اس پر نہیں سوچتی۔ ⁷ ۔پس اے بیٹو! اب میری سُنو۔ اَور میرے مَنہ کی باتوں سے کنارہ نہ کرو۔ ⁸ ۔اپنا رستہ اُس سے دُور ہٹا اَور اُس کے گھر کے دروازے کے نزدیک نہ جا۔ ⁹ ۔ایسا نہ ہو ۔کہ توُ اپنی عِزّت دُوسروں کو اَور اپنے برس بے رحم کو دے۔ ¹⁰ ۔ایسا نہ ہو کہ اجنبی تیرے مال سے سیر ہوں ۔اَور بیگانہ کے گھر میں تیری کمائی صرف ہو۔ ¹¹ ۔ کہ آخر کو جب تیر ا گوشت اَور تیرا جِسم گھُل جائے تو تُو نوحہ کرے گااَور کہے گا ۔ ¹² ۔میں نے تربیت سے کیوں نفرت کی اَور ملامت کو کیوں حقیر جانا ۔ ¹³ ۔مَیں نے اپنے اُستادوں کی کیوں نہیں سنی اَورتربیت کرنے والےکی طرف کان کیوں نہیں جھکایا؟ ¹⁴ ۔ یہاں تک کہ مَیں محِفل اَور جِماعت کےدرمیان قریباََ ہر بُرائی میں مُبتلا ہُوا ۔ ¹⁵ ۔اپنے ہی حوض سے پانی پی اور اپنے ہی کُنویں سے بہتا پانی۔ ¹⁶ ۔ کیا تیرا چشمہ باہر بہہ جائے اَور پانی کی نہریں کُوچوں میں؟ ¹⁷ ۔تُو انہیں صرف اپنے ہی لئے رکھ ۔تیرے ساتھ بیگانے شریک نہ ہوں۔ ¹⁸ ۔ تیرا سوتا مُبارَک ہواَور تُو اپنی جوانی کی بیوی کے ساتھ خُوشی کر۔ ¹⁹ ۔وہ تیری پیاری غزال اَور دِل پسند ہرنی ہو۔اُس کی چھاتیاں تُجھے ہمیشہ آسودہ کریں۔اَور اُس کی محبّت پر تُو ہمیشہ فریفتہ (عاشق) رہ ۔ ²⁰ ۔ اَے میرے بیٹے! تُو اجنبی عورت پر کیوں فریفتہ(عاشق) اَور بیگانی سے کیوں ہم آغوش ہوتا ہَے؟ ²¹ ۔ کیونکہ اِنسان کی راہیں خُداوند کی آنکھوں کے سامنے ہَیں اَور وہ اُس کے تمام رستوں کو دیکھتا ہَے۔ ²² ۔ شریر کو اُس کی بَدکاریاں پکڑلیتی ہَیں اَور وہ اپنے ہی گُناہوں کے رسّوں سےجکڑا جاتا ہے۔ ²³ ۔ وہ تربیت کے نہ ماننے کے باعث مرجائے گا اَور اپنی حماقت کی کثرت میں ہلاک ہوجائے گا۔