¹ ۔ پدرانہ ہدایت اَے بچّو ! باپ کی تربیت کو سُنو۔اَوردانِشمندی حاصِل کرنے کےلئے دھیان لگاؤ۔ ² ۔ کیونکہ مَیں تمہیں تلقین کرتا ہُوں۔ سو تُم میری تعلیم کو ترک نہ کرو۔ ³ ۔جب مَیں اپنے باپ کا بیٹا تھا نازک اَور اپنی ماں کی نِگاہ میں لاڈلا ۔ ⁴ ۔تو وہ مجھے سِکھاتا اَور کہتا رہا ۔ کہ تیرا دِ ل میری باتوں کو یاِد رکھّے۔ تُو میرے حُکموں کو مان۔تو تُو جیئے گا۔ ⁵ حِکمَت حاصِل کر ۔فہم حاصِل کر۔مت بھُول اَور میرے مُنہ کی باتوں سے کُنارہ نہ کر ۔ ⁶ ۔اُسے ترک نہ کر ۔وہ تیری حِفاظت کرے گی۔اُس سے محبّت رکھّ ۔وہ تیری نِگہبان ہوگی۔ ⁷ ۔ حِکمَت کی ابتدا یہ ہَے کہ حِکمَت حاصِل کر ۔اَوراپنے مَقدور کے مطُابق حِکمَت پا ۔ ⁸ ۔ اُس کی بزُرگی کر وہ تُجھے بُلند کرے گی۔جب تُو اُس سے ہمکنار ہو ۔وہ تُجھے سرفرازی بخشے گی ۔ ⁹ ۔ وہ تیرے سر پر زیِنت کا سِہرا رکھّے گی ۔وہ تُجھے جلال کا تاج دے گی ۔ ¹⁰ ۔ دوراہیں اَے میرے بیٹے! سُن ۔ اَور میری باتیں مان۔ تو تیری زندگی کے ایّام بڑھ جائیں گے ۔ ¹¹ ۔ مَیں تُجھے حِکمَت کی راہ کی تعلیم دیتا ہُوں۔ میں سیدھے رستے پر تُجھے چلاتا ہَوں۔ ¹² ۔چلنے میں تیرے قدم تنگ جگہ میں نہ پڑیں گے اَور جب تُو دوڑے گا تو ٹھوکر نہ کھائے گا ۔ ¹³ ۔تربیت کو پکڑے رکھّ اُسے جانے نہ دے۔اُسے محفُوظ رکھّ ۔کیونکہ وہ تیری زِندگی ہَے۔ ¹⁴ ۔شریروں کی راہ میں داخِل نہ ہو اَور بُرے آدمیوں کے رستے میں نہ چل ۔ ¹⁵ ۔اُس سے بچنا۔اُس کے پاس سے نہ گُزرنا۔اُس سے پھِر جانا اَور دوسر ی طرف چلاجانا ۔ ¹⁶ ۔ کیونکہ جب تک وہ بَدی نہ کرلیں وہ نہیں سوتے اَور جب تک وہ کِسی کو گِرا نہ لیں اُن کی نیِند اُن سے جاتی رہتی ہیں۔ ¹⁷ ۔وہ شرارت کی روٹی کھاتے ہیں ۔اَور ظُلم کی مَے پیِتے ہیں۔ ¹⁸ ۔ لیکن صادِقوں کی راہ نُور فجِر کی مانند ہَے۔ جس کی روشنی دوپہر تک بڑھتی جاتی ہَے۔ ¹⁹ ۔اور شریروں کی راہ تارِیکی کی طرح ہَے۔وہ نہیں جانتے کہ وہ کس چیز سے ٹھوکر کھا جائیں گے۔ ²⁰ ۔ ثابت قدمی اَے میرے بیٹے! میرے کلام کی طرف دھیان لگا اَور میری باتوں کی طرف اپنے کام مائِل کر ۔ ²¹ ۔ اپنی آنکھوں سے اُنہیں الگ نہ کر ۔اَور اپنے دل کے باطِن میں اُنہیں رکھّ ۔ ²² ۔ کیونکہ وہ اُن کے لئے جو اُنہیں پاتے ہیں حیات اَور سارے جِسم کے لئے صِحت ہیِں۔ ²³ ۔اپنے دل کی سب سے بڑھ کر حِفاظت کر ۔کیونکہ زِندگی کے چشمے وہیں سے نِکلتے ہیں ۔ ²⁴ ۔ ناراستی کی باتوں کو اپنے پاس سےہٹا دے اَور لبوں کی نا پاکی کو اپنے پاس سے دُور کر ۔ ²⁵ ۔ تیری آنکھیں سامنے ہی دیکھیں اَور تیری پلکیں سِیدھی رہیں ۔ ²⁶ ۔اپنے پاؤں کے رستے کو ہموار بنا اَور تیری سب راہیں قائم رہیں ۔ِ ²⁷ ۔ نہ دہنے مُڑ نہ بائیں۔اَور پاؤں کوبَدی سے ہٹا لے۔