¹ ۔ بادشاہ کا دِل خُداوند کے ہاتھ میں پانی کے نالوں کی طرح ہَے ۔جدھر وہ چاہتا ہَے اُدھر اُسے پھیرتا ہَے۔ ² ۔ اِنسان کی سب راہیں اُس کی اپنی نگاہ میں راست ہَیں پر خُداوند دِلوں کا تولنے والا ہَے ۔ ³ ۔ راستی اَور اِنصاف کرنا خُداوند کے نزدیک قُربانیوں سے افضل ہَے۔ ⁴ ۔ آنکھوں کی بَلند نظری اَور دِل کی مغروری یعنی شریروں کا چراغ گُناہ ہَے ۔ ⁵ ۔ محنِتی کے منصُوبے فراوانی پیدا کرتے ہیں مگر ہر ایک جلد باز اِحتیاج کو پہُنچتا ہَے۔ ⁶ ۔ جو جُھوٹی زُبان سے خزانے حاصِل کرنا چاہتا ہَے وہ بخُارات اَور مَوت کے پھندوں کا پیچھا کرتا ہَے ۔ ⁷ ۔ شریروں کا ظُلم اُنہیں تباہ کرے گا کیونکہ وہ انصاف کرنے سے اِنکار کرتے ہَیں ۔ ⁸ ۔ شریر مَرد کی راہ ٹیڑھی ہَے۔ پر راستباز شخص کا عمل دُرست ہَے ۔ ⁹ ۔ چھت کے کونے پر رہنا جھگڑا لُو عورت کے ساتھ اکٹھے گھر میں رہنے سےبہتر ہَے۔ ¹⁰ ۔ شریر کا دِل بَدی کرنے کی طرف راغِب ہَے ۔اُس کی آنکھوں میں اُس کا ہمسایہ بھی قبُولیّت نہیں پاتا ۔ ¹¹ ۔جب ٹھٹھے باز کو سزا دی جاتی ہےَ تو سادہ دِل حِکمَت حاصِل کرتا ہَے اَور جب دانا تربیت پاتا ہے تو عِلم حاصِل کرتا ہَے ۔ ¹² ۔صادِق شریر کے گھر پر غور کرتا ہَے۔ وہ شریروں کو ہلاک ہوتے دیکھتا ہَے۔ ¹³ ۔ جو کوئی مسکین کے نالے سے کان بند کرتا ہَے وہ خُود نالہ کرے گا۔اَور اُس کی سُنی نہ جائے گی۔ ¹⁴ ۔ پوشیدگی میں ہدیہ دینا غضب کو ٹھنڈا کرنا ہَے ۔اَور بغل میں رِشؤت دینا سخت غُصّے کو تھما دینا ہَے۔ ¹⁵ ۔ اِنصاف کرنا صادِق کے لیے خُوشی اَور بَدکرداروں کے لئے خوف ہَے۔ ¹⁶ ۔ جو اِنسان حِکمَت کی راہ سے بھٹکتا ہَے وہ مُردوں کے مجمع میں بسے گا۔ ¹⁷ ۔ لَذّت کو پیار کرنے والا کنگال ہوجائے گا اَور مَے اَور گھی کو پیار کرنے والا دولتمند نہ ہوگا۔ِ ¹⁸ ۔شریر صادِق کا فدیہ ہو گا اور دغاباز راستکار کے بدلے میں دِیا جائے گا۔ ¹⁹ ۔ بِیابان میں رہنا جھگڑا لو اَور غصّہ ور عورت کے ساتھ رہنے سے بہتر ہَے۔ ²⁰ ۔دانِشمند کے گھر میں مرغَوب خزانہ اَور تیل ہے مگر احمق آدمی اُسے نگل جاتا ہَے۔ ²¹ ۔ جو کوئی راستی اُور شفقت کی پیروی کرتا ہَے وہ زِندگی اَور عَزّت پائے گا۔ ²² ۔ دانِش مند آدمی طاقتوروں کے شہر پر چڑھتا ہَے اَور جس قوت پر اُن کا بھروسا ہَے اُسے گِرا دیتا ہَے ۔ ²³ ۔ جو اپنے مُنہ اَور اپنی زُبان کی نِگہبانی کرتا ہَے۔ وہ اپنے آپ کو دُکھوں سے بچاتا ہَے ۔ ²⁴ ۔ مغرور اَور گھمنڈی آدمی کا نام ٹھٹھّے باز ہَے کیونکہ وہ بہُت مغروری سے کام کرتا ہَے ۔ ²⁵ ۔ سُست آدمی کی خواہش اُسے مار دیتی ہَے کیونکہ اُس کے ہاتھ کام کرنے سے انکار کرتے ہیں ۔ ²⁶ ۔ وہ دن بھر حِرص میں رہتا اَور لالچ کرتا ہَے مگر صادِق آدمی دیتا ہَے اَور کنُجوسی نہیں کرتا ۔ ²⁷ ۔ شریروں کی قربانی مکروہ ہَے تو کتنی زیادہ تب ہو گی جب و ہ انُہیں بَد نیتی سے گزرانے گا۔ ²⁸ ۔جھُوٹا گواہ ہلاک ہوگا ۔لیکن جو سُنتا ہَے ۔وہ خاموش نہ رہے گا۔ ²⁹ ۔ شریر اِنسان بے شرمی سےاپنے مَنہ کو سخت کرتا ہَے ۔مگر راستکار اپنی راہ کو دُرست کرتا ہَے ۔ ³⁰ ۔ نہ حِکمَت نہ نصیحت اَور نہ کوئی مشورت خُداوند کے مُقابل ٹھہرسکتی ہَے ۔ ³¹ ۔ جنگ کے دِن کےلیے گھوڑا تو تیار کیا جاتا ہَے لیکن فتح یابی خُداوند ہی کی طرف سے ہَے۔