¹ ۔ برکات حِکمت اے میرے بیٹے ! اگر تُو میری باتوں کو قبُول کرے ۔اَور میرے حُکموں کو اپنے پاس محفُوظ رکھّے ۔ ² ۔ایسا کہ تُو حِکمَت کی طرف کان لگائے ۔اَور تیرا دِل حِکمَت کی طرف مائِل ہو۔ ³ ۔ ہاں ۔ایسا کہ تُو دانِش کو پُکارے اَور فہم کی طرف اپنی آواز اُٹھائے ۔ ⁴ ۔اگر تُو اُسے چاندی کی طرح ڈھونڈے اَور پوشیدہ خزانوں کی مانند اُس کی تلاش کرے۔ ⁵ ۔تو تُو خُداوند کے خوف کو سمجھے گا اَور خُدا کے عِلم کو پائے گا ۔ ⁶ کیونکہ خُداوند حِکمَت بخشتا ہَے اَور اُس سے عِلم و فہم نِکلتا ہَے۔ ⁷ ۔وہ راستکاروں کے لئے مدد کا ذخیرہ رکھتا ہَے اَور جو راستی سے چلتے ہَیں۔ اُن کی وہ ڈھال ہَے۔ ⁸ ۔وہ اِنصاف کے رستوں کا نِگہبان ہَے۔ اَور اپنے برگُزیدوں کی راہ کی حِفاظت کرتا ہَے ۔ ⁹ ۔تب تُو عدالت ۔حَق اَور راستی بلکہ ہر ایک نیک رستے کو سمجھ لے گا۔ ¹⁰ ۔کیونکہ حِکمَت تیرے دِل میں داخِل ہوگی ۔اَور عِلم تیری رُوح کو اچھّا لگے گا۔ ¹¹ ۔عقل مندی تیری حفاظت کرے گی اور سمجھ بُوجھ تیری نگہبان ہوگی ۔ ¹² ۔تو وہ تُجھے بَدی کی راہ سے اَور اُس اِنسان سے چھُڑائے گی جو فریب کی باتیں کرتا ہَے۔ ¹³ ۔ یعنی اُن سے جو راستی کی راہوں کو ترک کرتے اور تارِیکی کے رستوں پر چلتے ہَیں ۔ ¹⁴ ۔وہ بَدی کرنے سے خُوش ہوتے ہیں اور بدی کے کاموں سے شادمانی کرتے ہَیں۔ ¹⁵ ۔جِن کے رستے ٹیڑھے اَور جِن کی راہیں خُود پسندی کی ہَیں۔ ¹⁶ ۔اَور وہ تُجھے اجنبی عورت سے چھُڑائے گی یعنی اُس بیگانہ عورت سے جو اپنی باتوں سے تیری خُوشامد کرتی ہَے۔ ¹⁷ ۔جس نے اپنی جوانی کے رفیق کو ترک کر دِیا ہَے اَورجو اپنے خُدا کےعہد کو بھُول گئی ہَے۔ ¹⁸ ۔کیونکہ اُس کاگھر مَوت کی طرف جاتا ہَے اَور اُس کی راہیں پاتال کو جاتی ہَیں ۔ ¹⁹ ۔جو بھی اُس سے مِلتا ہَے وہ نہیں لَوٹے گا۔ اَور زِندگی کی راہوں کو نہیں پائے گا۔ ²⁰ ۔تاکہ تُو نیک آدمیوں کی راہ پر چلے۔اَور صادِقوں کے رستوں پر قائم رہے ۔ ²¹ ۔کیونکہ راستبا ز زمین پر سکُونت کریں گے ۔اُور کامِل اُس میں باقی رہیں گے۔ ²² ۔لیکن شریر زمین پر سے کاٹ ڈالے جائیں گے اَور ناراست لوگ اُس میں سے اُکھاڑے جائیں گے۔