¹ ۔ جو دوست سے علٰیحدہ ہونا چاہتا ہَے وہ موقع ڈُھونڈتا ہَے ۔وہ ہر معقُول بات سے بَرہم ہوتا ہَے ۔ ² ۔ احمق کو دانِش میں کُچھ خُوشی نہیں مگر اس میں کہ اپنے دِل کا حال ظاہر کرے۔ ³ ۔ شریر کے ساتھ رسوائی آتی ہَے ۔ذِلّت کے ساتھ ہی ملامت آتی ہَے ۔ ⁴ ۔ بعض آدمیوں کے مُنہ کی باتیں گہرے پانی کی مانند ہَیں ۔حِکمَت کاچشمہ چلتی ہوئی نہر ہَے ۔ ⁵ ۔ شریر کی طرفداری کرنا اچھّا نہیں ۔اَور نہ یہ کہ عدالت میں صادِق کا حَق بدل دِیا جائے ۔ ⁶ ۔ جاہِل کے ہونٹ جھگڑے میں پھنس جاتے ہَیں اَور اُس کا مُنہ تھپڑّ مانگتا ہَے ۔ ⁷ ۔احمق کا مُنہ اُس کی ہلاکت ہَے اَور اُس کے ہونٹ اُس کی جان کے لئے پھندا ہَیں ۔ ⁸ ۔ چُغل خور کی باتیں میٹھے نوالوں کی طرح ہَیں اَور وہ پیٹ کے اندر تک اُتر جاتی ہَیں۔ ⁹ ۔ جو اپنے کام میں ڈِھیلا ہَے وہ فضُول خرچ کا بھائی ہَے ۔ ¹⁰ ۔خُداوند کا نام ایک مضبوط بُرج ہَے ۔صادِق اُس میں دوڑ جاتا ہَے اَور محفُوظ رہتا ہَے ۔ ¹¹ ۔ دولتمند کا مال اُس کا مستحکم شہر ہَے اَور اُس کے اپنے خیال میں وہ اُونچی دِیوار کی مانند ہَے ۔ ¹² ۔ ہلاکت سے پیشتر آدمی کا دِل اُونچا ہوتا ۔ہَے ۔پر عِزّت سے پہلے فروتنی ہَے۔ ¹³ ۔ جو سُن لینے سے پیشتر جَواب دیتا ہَے وہ اپنی حماقت اَور ذِلت ظاہر کرتا ہَے ۔ ¹⁴ ۔ دِلا ور رُوح کمزوری میں اِنسان کو تھامتی ہَے مگر شِکسَتہ رُوح کی کون برداشت کرسکتا ہَے؟ ¹⁵ ۔صاحبِ فہم کا دِل عِلم حاصِل کرتا ہَے اَور دانِشمند کا کان عِلم کا طالِب ہَے۔ ¹⁶ ۔ آدمی کا ہدیہ اُس کے لیے جگہ بناتا ہَے اَور اُسے بڑے آدمیوں کے حضُور میں پہنچاتا ہَے۔ ¹⁷ ۔ جو پہلے اپنا دعویٰ بیان کرتا ہَے راست معلُوم ہوتا ہَے پر دُوسرا آکر اُس کی حقیقت ظاہر کرتا ہَے ۔ ¹⁸ ۔قُرعہ جھگڑوں کو موقُوف کرتا ہَے اَور طاقتوروں کے درمیان فیصلہ کرتا ہَے ۔ ¹⁹ ۔ رنجیدہ بھائی کو راضی کرنا محکم شہر لے لینے سے زیادہ مُشکل ہے ۔اَور جھگڑے قِلعے کی سلاخوں کی مانند ہَیں۔ ²⁰ ۔ آدمی کے مُنہ کے پھَل سے اُس کا پیٹ بھرے گا۔ اپنے ہونٹوں کی پیداوار سے وہ سیر ہوگا۔ ²¹ ۔ مَوت اور زِندگی زُبان کے قابو میں ہَیں اَور جو کوئی اُسے عزیز جانتا ہَے وہ اُس کا پھَل کھائے گا۔ ²² ۔ جو نیک بیوی پاتا ہَے وہ اچھّی چیز پاتا ہَے اَور خُداوند کی خُوشنُودی حاصِل کرتا ہے۔ ²³ ۔ مِسکین عاجِزی سے بات کرتا ہَے اَور دولتمند سختی سے جَواب دیتا ہَے۔ ²⁴ ۔ بُہت دوست رکھنا بربادی کا باعث ہَے ۔پر ایسا دوست بھی ہَے۔ جو بھائی سے بھی قریب تر تعلّق رکھتا ہَے۔