¹ ۔ اِطمینان کے ساتھ ایک خُشک نوالہ اُس گھر سےبہتر ہَے جو ذَبیحوں اَور جھگڑے سے بھرا ہو ۔ ² ۔ دانِشمند نوکر اُس بیٹے پر حُکم چلائے گا ۔جو رُسوائی کا باعِث ہَے اَور میِرَاث میں بھائیوں کے درمیان حِصّہ پائے گا۔ ³ ۔ چاندی کے لیے کُٹھالی اَور سونے کے لئے بھَٹی ہَے ۔ مگر دِلوں کا آزمانے والا خُداوند ہَے ۔ ⁴ ۔ شریر آدمی بَدی کے ہونٹوں کی بات سُنتا ہَے ۔اَور دَرَوغ گوفسادی زُبان پر کان لگاتا ہَے ۔ ⁵ ۔مِسکین کو ٹھٹھا کرنے والا اس کے خالِق کو ملامت کرتا ہَے اَور دوسرے کی مُصیبت پر خُوشی کرنے والا بے سزا نہ رہے گا۔ ⁶ ۔ بیٹوں کے بیٹے بوڑھے آدمیوں کا تاج ہَیں اَور بیٹوں کا فخر اُن کے باپ دادا ہَیں ۔ ⁷ ۔ خُوش گفتگو احمق کو نہیں سجتی اَور امیر کے جھُوٹے ہونٹ اُس سے بھی بَدتر ہَیں۔ ⁸ ۔ رشوَت اُس کے دینے والے کے ہاتھ میں جادُو کا پتھّر ہَے ۔وہ اُس کے لیے ہر موقع پر باعث کامیابی ہَے ۔ ⁹ ۔ جو میل مِلاپ کا خواہاں ہَے وہ قصَور کو چھپاتا ہَے۔ جو اُس کا ذِکر کرتا ہَے وہ دوستوں میں جُدائی ڈالتا ہَے ۔ ¹⁰ ۔دانِشمند آدمی کا سر زَنش پانا۔ جاہِل کو سَوکوڑے مارنے سے زیادہ مؤثر ہَے ۔ ¹¹ ۔ شریر آدمی سر کشی کا جویاں ہَے پس بے رحم قاصد اُس کے خلاف بھیجا جائے گا۔ ¹² ۔ احمق کا اُس کی حماقت میں مُقابلہ کرنے کی نِسبت اُس ریچھنی کا سامنا کرنا بہتر ہَے جس کے بچّے پکڑے گئے ہوں ۔ ¹³ ۔جو نیکی کے بدلے میں بَدی کرتا ہَے۔اُس کے گھر سے بَدی ہرگز جُدا نہ ہوگی۔ ¹⁴ ۔ جھگڑے کا شرُوع پانی کے چھوڑنے کی مانند ہَے اس لئے جھگڑا بَرپا کرنے سے پیشتر باز آ ۔ ¹⁵ ۔ شریر کو صادِق ٹھہرانے والا اَور صادِق کو شریر بنانے والا خُداوند کے نزدیک دونوں مکُروہ ہیں ۔ ¹⁶ ۔ احمق کے ہاتھ میں دانائی خریدنے کی قیمت سے کیا فائدہ ہَے جب کہ وہ قُوّت ِ اِمتیاز سے محّروم ہَے ۔ ¹⁷ ۔ دوست ہمیشہ اپنی دوستی کا اظہار کرتا ہَے اَور بھائی مُصیبت کے وقت کےلئے پیدا ہوتا ہَے۔ ¹⁸ ۔ بے عقل اِنسان ہاتھ پر ہاتھ مارتا ہَے ۔اَور اپنے ہمسائے کے رُو برُو ضامِن بنتا ہَے۔ ¹⁹ ۔جھگڑے کا مشُتاق گُناہ کا مُشتاق ہَے۔ جو اپنا دروازہ اُونچا کرتا ہَے وہ تباہی کا خواہاں ہَے ۔ ²⁰ ۔ کَج دِلا اِنسان نیکی نہ پائے گا ۔بَد زُبان بَلا میں مُبتلا ہوگا ۔ ²¹ ۔ جاہِل کا باپ ہونا دُکھ کا باعِث ہَے احمق کے باپ کے لئے خُوشی نہیں ۔ ²² ۔ شادمان دِل صحِت بخش ہَے اَور شِکسَتہ رُوح ہَڈیوں کو خُشک کرتی ہَے ۔ ²³ ۔ شریر آدمی بَغل میں سے رشوَت رکھّ لیتا ہَے ۔تاکہ اِنصاف کی راہوں کو بگاڑے ۔ ²⁴ ۔ حِکمَت صاحبِ فہم کے پیش نظر ہَے پر بے وقُوف کی آنکھیں زمین کے کِناروں پر لگی ہَیں۔ ²⁵ ۔ جاہِل بیٹا اپنے باپ کے لئے دُکھ ہَے اَور اپنی والدہ کے لیے تلخی ہَے۔ ²⁶ ۔ بے گُناہ پر جرمانہ لگانا دَرست نہیں اَور نہ امیروں کو ناحَق مارنا ۔ ²⁷ ۔ صاحبِ عِلم کم باتیں کرتا ہَے۔ اَور صاحبِ فہم ملائم ہَے ۔ ²⁸ ۔ احمق جب چُپ رہے تو دانا گِنا جاتا ہَے اَور جو اپنے ہونٹوں کو بند رکھے وہ صاحبِ فہم شُمار ہوتا ہے۔