¹ ۔ نرم جَواب غُصّے کو دُور کرتا ہَے پر کرخت بات غضب انگیز ہوتی ہَے۔ ² ۔ دانِشمندوں کی زُبان سے حِکمَت ٹپکتی ہَے پر جاہلوں کا مُنہ حماقت اُگلتا ہَے۔ ³ ۔ خُداوند کی آنکھیں ہر جگہ ہَیں ۔اَور نیکوں اَور بَدوں کی نِگران ہَیں ۔ ⁴ ۔زُبان کی نرمی زِندگی کا درخت ہَےمگر زُبان کا بگڑنا رُوح کی شِکستگی ہَے۔ ⁵ ۔اَحمق اپنے باپ کی تادِیب کی حقارت کرتا ہَے پر جو تنبیہہ کو مانتا ہَے وہ عقلمندی سے کام کرتا ہَے۔ ⁶ ۔ صادِق کے گھر میں بڑی دولت ہَے پر شریروں کی آمدنی میں پریشانی ہَے۔ ⁷ ۔ دانِشمندوں کے لب عِلم بوتے ہَیں مگر جاہلوں کے دِل ایسے نہیں۔ ⁸ ۔ شریروں کی قربانی خُداوند کے سامنے مکُروہ ہَے مگر راست کاروں کی دُعا اُس کی خُوشنوُدی ہَے۔ ⁹ ۔ شریروں کی راہ خُداوند کے نزدیک مکرُوہ ہَے مگر صداقت کے مُقلّد کو وہ پیار کرتا ہَے۔ ¹⁰ ۔ راہ سے بھٹکنے والے کے لیے سخت تعلیم ہَے۔ اَور جو تنبیہہ سے نفرت کرتا ہَے وہ مَر جائے گا ۔ ¹¹ ۔ جب پاتال اور جہنم خُداوند کےآگے کھُلے رہتے ہَیں تو کِتنے زیادہ بنی آدم کے دِل ۔ ¹² ۔ ٹھٹھّے باز تنبیہہ کو پیار نہیں کرتا اَور دانِشمندوں کے ساتھ نہیں چلتا ۔ ¹³ ۔شادمان دِل چہرے کو خُوش بناتا ہَے پر دِل کی غمگینی سے رُوح کی شِکستگی ہوتی ہَے۔ ¹⁴ ۔ عقلمند کا دِل عِلم کی تلاش کرتا ہَے پر جاہِلوں کا مُنہ حماقت چَرتا ہَے۔ ¹⁵ ۔ مُصیبت زَدہ کے سب دِن غمناک ہَیں مگر خُوش دِلی ہمیشہ کا جشن ہَے۔ ¹⁶ ۔ پریشانی کے ساتھ بہت دولت رکھنے کی نَسبت خُداوند کے خوف کے ساتھ کم رکھنا بہتر ہَے ۔ ¹⁷ ۔ عداوت رکھ کر پالا ہُؤا بیل کھانے کی نِسبت مُحبّت کے ساتھ سبزی کا کھانا بہتر ہَے۔ ¹⁸ ۔ غُصّہ ور اِنسان جھگڑے بَرپا کرتا ہَے مگر صابر شخص جھگڑا مِٹاتا ہَے۔ ¹⁹ ۔کاہِل مَرد کی راہ کانٹوں کی باڑ ہَے پر محِنتیوں کا رستہ شاہراہ ہَے ۔ ²⁰ ۔دانِشمند بیٹا اپنے باپ کو خوُش کرتا ہَے مگر جاہِل آدمی اپنی ماں کی حقارت کرتا ہَے۔ ²¹ ۔ حماقت بے عقل کے لئے خُوشی ہَے پر صاحبِ فہم کی راہ سِیدھی ہَے۔ ²² ۔ مشورت کے بغیر سب منصُوبے ٹُوٹ جاتے ہَیں اَور مشورت کی کثرت قائم رہتےَ ہیں ۔ ²³ ۔ اپنے مُنہ کے جَواب سے اِنسان خُوش ہوتا ہَے اَور بات جو اپنے وقت میں کہی جائے کیسی عُمدہ ہَے۔ ²⁴ ۔ عقلمند کے لئے زِندگی کا رستہ اُوپر کی طرف ہَےتاکہ پاتال سے بچ جائے۔ ²⁵ ۔ خُداوند مغرُوروں کے گھر کو ڈھادے گا اَور بیوہ کی حد کو قائم کرے گا۔ ²⁶ ۔ شریروں کے خیالات خُداوند کے نزدِیک مکُروہ ہَیں پر پاک لوگوں کی باتیں پسندیدہ ہَیں۔ ²⁷ ۔ ہر ایک جو نا جائز نفع کا لالچی ہَے وہ اپنے گھر کو برباد کرتا ہَے۔ اَور جو رشوَت سے نفرت کرتا ہَے وہ زندہ رہے گا۔ ²⁸ ۔ صادِق کا دِل جَواب دینے میں غور کرتا ہَے پر شریروں کے مُنہ بُری باتوں سے بھرے رہتے ہَیں ۔ ²⁹ ۔خُداوند شریروں سے دُور ہَے پر وہ صادِقوں کی دُعا کا سُننے والا ہَے۔ ³⁰ ۔ خُوش نظر جان کو خُوش کرتی ہَے۔ اَور خُوش خبر ہَڈیوں کو تازہ کرتی ہَے ۔ ³¹ ۔جو کان زِندگی کی تنبیہہ سُنتا ہَے وہ دانِشمندوں کے درمیان سکون پائے گا۔ ³² ۔ جوتا دِیب سے اِنکار کرتا ہَے وہ اپنی جان کی تحقیر کرتاہَے۔ جو تنبیہہ کو سُنتا ہَے وہ اپنے دِل کا مالک ہَے۔ ³³ ۔ خُداوند کا خوف حِکمَت کی تادیب ہَے اَور سرفرازی سے پہلے فروتنی ہَے۔