¹ ۔ جو کوئی نظم و ضبط کو پیار کرتا ہَے وہ عِلم کو پیار کرتا ہَے ۔جو نصیحت سے نفرت کرتا ہَے وہ حیوان ہَے ۔ ² ۔ نیک مَرد خُداوند کی خُوشنُودی حاصِل کرتاہَے۔ پر دھوکہ باز انِسان مُجرم ٹھہرایا جائے گا۔ ³ ۔ شرارت سے کوئی اِنسان قائم نہیں رہتا پر صادِقوں کی جَڑ کو جُنبش نہ ہوگی۔ ⁴ ۔ نیک عورت اپنے شوہر کے لئے تاج ہَے مگر بدکار اُس کی ہَڈّیوں میں بیماری کی مانند ہَے۔ ⁵ ۔ صادِقوں کے خیالات راست ہَیں اَور شریروں کی مصلحت فریب ہَے۔ ⁶ ۔ شریروں کی باتیں یہی ہَیں کہ خون کرنے کےلئے تاک میں بیٹھیں لیکن راستکاروں کا مُنہ اُنہیں رِہائی دے گا۔ ⁷ ۔ شریر گِرا دیئے جاتے ہَیں اَور نیست ہو جاتے ہَیں پر صادِقوں کا گھر قائم رہتا ہَے۔ ⁸ ۔ آدمی کی اُس کی عقلمندی کے مطابق تعریف کی جاتی ہَے۔پرٹیڑھے مزاج کی حقارت کی جائے گی۔ ⁹ شیخی مار کر روٹی کا مُحتاج ہونے کی نِسبت فروتن ہوکر نوکر رہنا بہتر ہَے۔ ¹⁰ ۔ صادِق آدمی اپنے چوپائے کی جان کی خبر رکھتا ہَے لیکن شریروں کا باطِن بے رحم ہَے۔ ¹¹ ۔ جو اپنی زمین پر کاشتکاری کرتا ہَے وہ روٹی سے سیر ہوگا پر جو کاہِلوں کی تقلید کرتا ہَے۔ وہ بھُوکا رہے گا۔ ¹² ۔ شرارت بَدیوں کا جَال ہَے۔پر صادِقوں کی جَڑ پھَل دار ہَے۔ ¹³ ۔ شریر اپنے لبوں کی خطاکاری میں پھنستا ہَے پر صادق مُصیبتوں سے بچ جاتا ہَے۔ ¹⁴ ۔اِنسان اپنے مُنہ کے پھَل کے ذریعے سے سیر ہوگا اَور آدمی کے ہاتھوں کے کام کا بدلہ اُسے دِیا جائے گا۔ ¹⁵ ۔احمق کی راہ اُس کی اپنی نِگاہ میں سِیدھی ہَے مگر دانِشمند آدمی مشورت کو سُنتا ہَے۔ ¹⁶ ۔بے وقُوف کا غصہّ فی الفور معلُوم ہوجاتا ہَے مگر صاحبِ عقل رُسوائی کو ڈھانپ دیتا ہَے۔ ¹⁷ ۔سچ بولنے والا راستی ظاہر کرتا ہَے پر جھُوٹا گواہ فریب دیتا ہَے۔ ¹⁸ ۔ایک وہ بھی ہَے جو تلوار کی مار کی طرح فضول بات کرتا ہَے پر دانِشمند کی زُبان شِفا بخش ہَے۔ ¹⁹ ۔ صداقت کا ہونٹ اَبد تک ثابِت رہے گا مگر فریب کی زُبان صِرف لمحہ بھر کی ہَے۔ ²⁰ ۔ جو شرارت کا منصوبہ باندھتے ہَیں اُن کے دِل میں فریب ہَے مگر صُلح کی مشورت دینے والوں کے لئےخُوشی ہَے۔ ²¹ ۔صادِق پر کوئی آفت نہیں آئے گی پر شریر مصیبت میں مبتلا ہوں گے۔ ²² ۔ جھُوٹ بولنے والے ہونٹ خُداوند کے نزدِیک مکرُوہ ہَیں اَور راستی سے کام کرنے والنے اُس کی خُوشنُودی ہَیں ۔ ²³ ۔ صاحبِ فہم اپنے عِلم کو چھُپاتا ہَے۔ پر جاہل اپنی حماقت کی مُنادی کرتا ہَے۔ ²⁴ ۔ محِنتی کا ہاتھ حُکمرانی کرے گا پر کاہِل کا ہاتھ مُشقت کرنے والا بنے گا۔ ²⁵ ۔ اِنسان کے دِل کا غم اُسے افسُردہ کر دیتا ہَے پر اچھّا کلمہ اُسے خُوش کرتا ہَے۔ ²⁶ ۔ صادِق اپنے ہمسائے پر سبقت لے جاتا ہَے پر شریروں کی رَوش اُنہیں گُمراہ کردیتی ہَے۔ ²⁷ ۔کاہِل مَرد اپنے شکار کا کباب نہیں کرتا پر مِحنتی آدمی کی دولت بیش بہا ہَے۔ ²⁸ ۔ صداقت کے رستے میں زِندگی ہَے اَور اُس میں ہرگز ہلاکت نہیں ہَے۔