¹ ۔ اَمثَال ِسُلیمؔان دانِش مند بیٹا اپنے باپ کے لئے خوُشی کا سبب ہَے۔ اَور جاہِل بیٹا اپنی ماں کے لئے دُکھ کا باعِث ہَے ۔ ² ۔ شرارت کے خزانے کُچھ فائدہ نہیں دیتے مگر صداقت مَوت سے چُھڑاتی ہَے۔ ³ ۔ خُداوند صادِق کی جان کو بھُوکا رہنے نہ دے گا پر شریروں کی خواہش کر رَدّ کرتاہَے۔ ⁴ ۔ جو ڈِھیلے ہاتھ سے کام کرے وہ کنگال ہوجائے گا۔پر محنُتی کا ہاتھ دولت مند بنا دیتا ہَے۔ ⁵ ۔ جو موسم گرما میں جمع کرتا ہَے وہ دانا بیٹا ہَے ۔جو فصل کے وقت سوتا ہَےوہ ذلت کا فرزند ہَے ⁶ ۔ صادق کے سر پر برکتیں ہَیں اَور شریروں کے مُنہ ظُلم کو چُھپاتے ہَیں۔ ⁷ ۔صادِق کا ذِکر مُبارّک ہَے ۔اَور شریروں کا نام لعنتی ہَے۔ ⁸ ۔ جس کا دِل دانِش ور ہَے وہ حُکموں کا مانتا ہَے۔ پر بکوُاسی اَحمق گِر پڑے گا۔ ⁹ ۔جو راستی سے چلتا ہَے وہ سلامتی سے جائے گا پر جس کی راہیں ٹیڑھی ہیں وہ ظاہر کِیا جائے گا۔ ¹⁰ ۔چشم پوشی کرنے والا دُکھ کا باعِث ہوتا ہَے۔ اَور صاف نصیحت دینے والا سلامتی پیدا کرتا ہَے۔ ¹¹ ۔صادِق کا مُنہ زِندگی کا چشمہ ہَے ۔اَور شریروں کا مُنہ ظُلم کو چھُپاتا ہَے۔ ¹² ۔نفرت جھگڑے بَرپا کرتی ہَے ۔اَور مُحبّت سب گُناہوں کو ڈھانپتی ہَے۔ ¹³ ۔ دانِش مند کے مُنہ میں حِکمَت پائی جاتی ہَے۔ جو بے عقل کی پُشت کے لئے چھڑی ہَے۔ ¹⁴ ۔ عقل مند آدمی کو سنبھال رکھتے ہیں ۔ اَور جاہِل کا مُنہ قریب کی ہلاکت ہَے۔ ¹⁵ ۔ مال دار آدمی کی دولت اُس کا مُستحکم شہر ہَے۔ اَور مِسکینوں کا کنگال پن اُن کی بربادی ہَے۔ ¹⁶ ۔صادِق کی کمائی زِندگی کے لیے ہَے اَور شریر کی پیداوار گُناہ کے لئے۔ ¹⁷ ۔ جو تادِیب کا لحاظ کرتا ہَے وہ زِندگی کی راہ میں ہَے اَور جو تنبیہہ کو ترک کرتا ہَے وہ گُمراہ ہو جاتا ہَے۔ ¹⁸ ۔جھُوٹے ہونٹ نفرت کو چھُپاتے ہَیں۔تُہمت پھیلانے والا جاہل ہَے۔ ¹⁹ ۔ کلام کی کثرت گُناہ سے خالی نہیں اَور جو اپنے لبوں کو روکے رکھتا ہَے وہ عقلمند ہَے۔ ²⁰ ۔ صادِق کی زُبان صاف شُدہ چاندی ہَے اَور شریروں کے دِل بے قدر ہَیں ۔ ²¹ ۔ صاِدق کے ہونٹ بُہتیروں کو سِکھاتے ہَیں اَور نادان عقل کے نہ ہونے کے سبب مَرتے ہَیں۔ ²² - خُداوند کی برکت دولتمند کرتی ہَے اَور مُشقت اُس پر کُچھ نہیں بڑھاتی۔ ²³ ۔ بَدی کاکام جاہِل کے نزدِیک اَور حِکمَت کاکام دانِشمند کے نزدِیک کھیل ہَے۔ ²⁴ ۔شریر کا خوف اُسی پر آپڑے گا۔اَور صادقوں کی خواہش اُنہیں عطا کی جائے گی۔ ²⁵ ۔جِیسے بگُولا جاتا رہا ہَے ۔ ویسے ہی شریر جاتا رہَے گا۔ مگر صادِق اَبدی بُنیاد کی طرح ہَے۔ ²⁶ ۔ جیسا کہ سرکہ دانتوں کے لیے اَور دُھواں آنکھوں کے لیے نقصان دہ ہوتا ہے ویسا ہی سست آدمی اپنے بھیجنے والے کے لئے ہے۔ ²⁷ ۔ خُداوند کا خوف ایّام کو بڑھاتا ہَے مگر شریروں کے برس گھٹائے جائیں گے۔ ²⁸ ۔ صادِقوں کا اِنتظار خُوشی ہَے۔ اَور شریروں کی اُمید فنا ہو جائے گی۔ ²⁹ ۔ سِیدھی راہ چلنے والوں کے لئے خُدا وند جائےِ پناہ ہَے۔ پر بَد کرداروں کے لئے ہلاکت کا باعث ہَے۔ ³⁰ ۔ صادِق کبھی جُنبش نہ کھائے گا مگر شریر زمین پر آباد نہ رہیں گے۔ ³¹ ۔صادق کے ہونٹ حِکمَت کا پھل دیتے ہَیں۔ اَور دغابازوں کی زُبان کاٹ ڈالی جائے گی۔ ³² ۔ صادِق کے ہونٹ پسندیدہ بات کو جانتے ہیں مگر شریروں کے مُنہ فریبوں سے واقِف ہیں ۔