¹ Dɛ̃ rə̀dù, dwí rí lyì jàlà ǹdə́ bə̀ kana bɛ́ zɛ̃̀ bə̀ n'ê ŋwɔ́ŋwɔ̌ dɛ̃́dɛ̃́ ǹdə́ bə̀ da-byǎ Zhwifubá. ² Bə̀ jàlà y'à zhe: «Nə́myɛ̌ cìcì mú ǹdə́ nə́ bala-byǎ bɛ́ e súlí nə́ kana-byǎ bɛ́ já. Nə́ só sə nə́ nə bə̀lɛ́ nə́ jí mùnì ga nə́ zə myə̌l!» ³ Bə̀ dwã y'à zhe: «Nə́ n'é pyi nə́ cɛsɛ́ ǹdə́ nə́ də̀vɛ̃́-cèmé né cɛsɛ́ e súlí nə́ kǎlsɛ́ lyì ni mùnì ga nə́ nə bə̀lɛ́ nɔrh mɔ́ yi ní.» ⁴ Bə̀ dwã myɛ y'à súlí bə̀ n'ê wə̀lə̀: «Nə́ n'é jìmì wársɛ nə́ cɛsɛ́ ǹdə́ nə́ də̀vɛ̃́-cèmé cɛsɛ́ yó nə́ m'é ŋwɛ́ɛ́ pyɔ̌ kwǎndɛ́. ⁵ E jà, nə́ wɔ́ dwí rə̀dù. Nə́ byǎ bɛ́ myɛ wɔ́ kɔn rə̀dù. Ǹdə́ rə̀myɛ́ ga kɔn wɔ́ nyɔ́ɔ́ bə̀ nə́ ce nə́ bala-byǎ bɛ́ ǹdə́ nə́ kana byǎ bɛ́ yómde wə. Nə́ kana-byǎ jàlà gaga mɔ́ dámǎ bə̀ wɔ rə̀ wẽ́; nə́ bə rə̀ jàn zhe yé; nə́ kálsɛ́ ǹdə́ nə́ də̀vɛ̃́-cèmé né cɛsɛ́ wɔ́ lyì dwã bə̀ cǐ si. ⁶ À gə́ nyɛ̀ɛ̀ ŋwɔ́ŋwɔ̌ mə̀myɛ́ ǹdə́ zɔ̀mà nə̀myɛ́, à lyim j'a zɛ̃̀ rə̀ n'ê yì dɛ̃́dɛ̃́. ⁷ A j'a gu à wẽ́ b'à la lyì-fwààlɛ́ ǹdə́ bù-kárna bɛ́ búlə́ ju, a zɛ̃̀ a wɔ̀ bɛ: «Nyǐ wɔ́ zhĩĩ rə̀ dùm á n'â zhĩ dwã nɛ!» Rə̀myɛ́ kwã nɛ́ à byẽ̀ be kúlí nánfwɛ̀lɛ̀ jǒm yilə. ⁸ À wə̀l be: «Nə́myɛ̌ cìcì mú wɛ̀rhɛ́ ǹdə nə́ jàn gə́ wɔ̌ nɛ́ nə́ k'á zwẽ nə́ da-byǎ Zhwifubá, bə̀ y'à yè ǹdə́ dwə́ né dwã bɛ́ mɔ́ nə́ yè; Sə ámyɛ̌ cìcì mú zɛ̃̀ á k'á n'á yè á da-byǎ bɛ́ ǹdə́ nə́ cìcì lyì bí! Bə j'a shĩ̌ bə̀ nyə́, bə̀ yə̀ zɔ̀mɛ̀ də́-byǐ nɛ bə lyár yé. ⁹ A súlí a wɔ̀: «Kɔn rɛ́ tɛ̀bɛ́ á n'á wɛ̀rhɛ́ mɔ́ bə càn yé. È də̀ nə́ Yi rí nyɔ̀mɔ̀ wẽ́ á mə̌ sə á vò né mùnì á cə̀r dwə́ né dwã bɛ́ nə̀ wɔ́ nə́ zwə̀ mó yé ne, bə̀ nə̀ bə̀ nə́ba cìzhìl ce nà? ¹⁰ Àmyɛ cìcì ǹd'â da-byǎ bɛ́ ǹdə́ à tùntùnnə bé, nə́ jìmì bi wɛ́rɛ́ ǹdə́ bə̀lɛ́. Nə́ m'ǎ yẽ̌ jim rí rə̀myɛ́ mɔ́ nɛ. ¹¹ Cǎrh-na bɛ, zà cìcì, bə̀ kálsɛ́, bə̀ də̀vɛ̃́-cèmé né, bə̀ olyivyə́ə́ré ǹdə́ bə̀ kǎlsɛ́ e súlí kɔn rɛ́ tɛ̀bɛ́ rə̀ pyɛ̀lɛ́ bə̀lɛ́ y kɛ̀bɛ́ ǹdə́ də̀vɛ̃́ nándwə̃̀ y ǹdə́ nwə̃̌ y á jìmì bi mú yó wə.» ¹² Bə zɛ̃̀ bə wɔ̀: «Nə́ b'ǎ càrh rɛ bɛ sə nə́ t'á la bɛ kaka yò bwə̌rh yé. Nə́ m'ǎ wɛ̀rhɛ́ ǹdə ǹ gə́ nə́ ń wə̀l né.» À byẽ̀ vwĩ̀-zwə́lnə bé bə bà, a zɛ̃̀ a ce jìmnə bé bwəl nyí bə̀ yé né bə̀ bə̀ b'a wɛ̀rhɛ́ ǹdə bə̀ gə́ y'à wò né. ¹³ A zɛ̃̀ a vɔvwa á kàmə̀zù-fwɛ̀lɛ̀ y nyí-byǐ rí tɛ̃́a à m'â wə̀lə̀: «Wɔ́ èta Yi m'a vɔvwa lò mɔ̀bɔ́ gakó ń tá ń la ń zɔ̀mɛ̀ rɛ́ pyǐrh mú ní, jàà y kɛ̀bɛ́ è nyɛ ǹdə́ ń kɛ̀lɛ́ y e súlí è nyɛ ǹdə́ ń jɛ̃̀-kɔn rɛ́ mɔ́ wẽ́! Wɔ́ èta rə̀ m'a vɔvwa mɔ nɛ́ rə súlí rə yẽ̌ mo ǹdə́ jə̀-fwə̀r! Lyì bí gakó wɔ̀: «Amɛ̀n!», bə̀ zɛ̃̀ bə cèrhé Cinu Yi. Sə dwí rí wɛ̀rhɛ́ kɔn dɛ̀bɛ́ rə̀ y'à byili mú. ¹⁴ Kɔn zhì dɛ̃ rɛ́ tɛ̀bɛ́ bə̀ ce à jǐrh Zhəda tənà y nyí rí yó-cə́bal byinə shí ǹdə́ nə̀lyè, pyɔ̌ Artazɛrzɛɛsɛ pyɛ̀lɛ̀ rɛ́ jú byinə shí-èlyè byin rí e m'e yí rə̀ byinə shə́-ètɔ̀ ǹdə́ nə̀lyè byin rí, àmyɛ́ ǹd'â da-byǎ bɛ́ yə̀ yó-cə́bal kwǎndɛ́ zwẽ yé. ¹⁵ Tənà y yó-cìnə́ bé byɛ̀bɛ́ bə̀ jɛ̀nɛ̀ àmyɛ mɔ́ y'à n'ê wɛ̀rhɛ́ jàn lyì bí ni dɛ̃́dɛ̃́, bə̀ y'à n'ê zwẽ kùjú ǹdə́ də̀vɛ̃́ e súlí wár-kùlsì shə́-èna bə̀ sõ. Bə̀ tùntùnnə bé myɛ y'à n'ê byili bə̀ bə̀ zhe ŋwɔ̀nɔ́ dwí rí yó wə. Sə àmyɛ́ cìcì mú yə̀ èta wɛ̀rhɛ́ yé, à gə́ y'à n'â nyàm Yi yilə. ¹⁶ À súlí a ce byílí y kɛ̀bɛ́ lú tum rí yə̀ à yó-lyẽẽ́ tum, rə̀myɛ́ ce nə́ yə̀ cɛ yè yé, e súlí myɛ à tùntùnnə bé gakó y'à wɔ dwã yó nyɔ̀nɔ̀ bə̀ n'ê twĩ̀. ¹⁷ E jà Zhwifubá ǹdə́ bù-kárna bɛ́ byɛ̀bɛ́ bə̀ y'à n'ê tó ne bə̀ jí mú y'à wɔ́ nunə zɔ̌m ǹdə́ shí-ènu, e súlí lyì bí byɛ̀bɛ́ bə̀ y'à n'ê shí dwə́ né nyɛ̀bɛ́ nə̀ nə̀kə́kɛ́lɛ́ nə́ba wẽ́ bə̀ twí nə́ sõ mó. ¹⁸ Dɛ̃ gakó kɔn dɛ̀bɛ́ rə̀ y'à n'ê shí à sõ, bə̀ y'à n'ê tɛnɛ mɔ́ y'à wɔ́ nə̀-bya èdù ǹdə́ pyììsì shə̀ldù ǹdə́ jè-vɔ̀mɛ̀ wẽ̀; sə dwã shí gakó də̀vɛ̃́ y y'a pyẽ̀ tɛ̃́. E jà ǹdə́ rə̀myɛ́ ga, à yə̀ wə̀l bə̀ bə̀ pɛ̃ kɔn dɛ̀bɛ́ bə̀ y'à mə̌ sə bə pə yó-cə́bal nɛ yé, bə̀ tum rí y'à dùm tənà y lyì bí yó wə. ¹⁹ À Yi, lyǐrh kɔn dɛ̀bɛ́ gakó à wɛ̀rhɛ́ dwí rí tɛ̀bɛ́ yil mú yò, sə́ wɛ̀rhɛ́ nɛ cɛ̀nɛ̀.