¹ Sambalaatɛ gə́ nyɛ̀ɛ̀ bə̀ nə́ n'ê lwì byílí yə́, ń lyim j'a zɛ̃̀, rə̀ n'ê yì dɛ̃́dɛ̃́. Ń mɔ̀n Zhwifubá ² n súlí n zɔ̀m bə̀ shò kwã nɛ́ ń da-byǎ bɛ́ ǹdə́ Samarɛ shə̀dɛ́ɛ́sɛ́ yé né n wɔ̀: «Bə̀kɔ́n Zhwifubá byɛ̀bɛ́ èta bə̀ bə yé-shò zhe mó n'ê wɛ̀rhɛ́? Nə́ m'ǎ yẽ̌ be bə twĩ̀ bə̀ tum rí bə zhɛ̀? Bə̀ m'a ŋwɛ̀nɛ́ bə zwə́l vwə̃̀? Bə̀ m'a zhɛ̀ zà? Bə̀ m'a k'a vùr nə́kuulí shó w kùr w bə ce rə zə jàn, e jà rə̀ jú myǐn? ³ Amɔ̃ lyì bal Tɔbya yà ń wɔ ń yala nɛ, ńmyɛ súlí n wɔ̀: «Bə̀ n'ê lwì! Má zúl cìcì myɛ gə jìl bə̀ nə́kulə byílí y yó è m'a wǔr e ló tɛ̃́!» ⁴ Cili, nə́ Yi, nyǐ bə̀ n'ê fulsi nə́ba. Ce bə̀ tùùrhí k'a nyɔ̀ bə̀ yó wə, sə́ ce bə fulsi bə̀myɛ yómə́-jè né. ⁵ Bə̀k'á pə bə̀ dóó sǔbri yé, sə bə̀ yə̀-bəlɔ̀lɔ́ w bə̀k'á jé ǹ yé né yé, bə̀ bə̀ gwar lùrnə̀ bé. ⁶ Nə́ j'á zɛ̃̀ nə́ lù byílí y gakó e yí è bùbõ̌ wə. Lyì bí gakó y'à n'ê twĩ̀ ǹdə́ bə̀ wun gakó. ⁷ Sǝ Sambala ǹdǝ́ Tɔbyǝja ǹdǝ́ Arabɛ ǹdǝ́ Amɔnɛtɛbá ǹdǝ́ Asǝdǝnǝnyɛbá lyimǝ j'a zɛ̃̀ dɛ̃́dɛ̃́ bǝ̀ gǝ́ nyɛ̀ɛ̀ bǝ̀ nyǐ byílí y kɔrhɔ mɔ́ n'ê zhǝ̀l mó yilǝ, è bɔ̀là bɛ́ n'ê shĩ, ⁸ bǝ̀ gakó zɛ̃̀ bǝ ce nyí dwã w bǝ bǝ̀ bǝ̀ la bú ǹdǝ́ Zhǝrǝzalɛm sǝ bǝ cɔ̀ cɔ wá. ⁹ Nǝ̀ zɛ̃̀ nǝ́ ce nǝ́ Yi rí, nǝ́ kwè lyì nǝ́ cĩ́ ní bǝ̀ n'ê yìlì cǝcɛ̃ ǹdǝ́ nǝ̀nyɔ́nɔ́, bǝ̀ la bú ǹdǝ́ bɛ bǝ m'e cǝ̀r nǝ́ yé né. ¹⁰ Sə Zhəda lyì bí y'à n'ê wə̀lə̀: «Zhinnə bé jàn rɛ́ n'ê gɛ, Jì-bwə̀ə̀ré j'a lyɛ̃ cɛ nɛ! Nə́ zɛ̃̀ nə́ t'á la ŋwɔ̀nɔ́ Nə́ lù byílí y yé!» ¹¹ Nə́ zwə̀ bé y'à n'ê wə̀lə̀: «Bə̀ t'â la lwar bə̀ súlí bə̀ t'â la kaka myɛ nɔ è gə də̀ nə́ gə́ m'ǎ yí bə̀ cəcəl w yi ní dúdú. Nə́ m'ǎ zɛ̃̀ nə́ gu bí, nə́ súlí nə́ ce tum rí zhì.» Neemyi pɔ búlə́ wẽ̀ tùntùnnə bé ne ¹² Zhwifubá byɛ̀bɛ́ bə̀ y'à wɔ nə́ zwə̀ bé yala nɛ mɔ́ gə túwə́, bə̀ y'à n'ê wə̀l nə́ba kɔn yí twər shíyə́: «bə̀ j'â n'ê bwí ǹdə́ nə́ba, jààsɛ́ shɛ̀bɛ́ gakó á shí sə̀ wẽ́ á kwɛ̃̀ á bàn mɔ́!» ¹³ Rə̀myɛ́ ce a zɛ̃̀ a vùr dwí rí lyì jì jì ǹdə́ bə̀ búlə́ shìmì ǹdə́ bə̀ swə́ e súlí bə̀ twərh a cĩ́ byílí y kwã y kùr wə, cɛ y gə́ zul má ǹdə́ cə-yà y wa. ¹⁴ À gə́ byɛ́lɛ́ jààsɛ́ bə̀ y'à zhǐ sə̀ wẽ́ mó a zhɛ̀, à wə̀l lyì-fwààlɛ́ ǹdə́ bù-kárna bɛ́ e súlí lyì bí dwã bɛ́ nɛ: «Á Bə̀k'á dùr bə̀ ywẽ yé! Lyǐrh-nə Yó-cə́bal mɔ̀bɔ́ ń zhe jàn e jà bə̀ súlí bə̀ n'ê nyàm mɔ mɔ́ yò, sə á bú á da-byǎ bɛ́ ǹd'á byǎ bɛ́ ǹd'á bə̀kwá bɛ́ ǹd'á kana bɛ́ ǹdá kǎlsɛ́ yilə.» ¹⁵ Nə́ zwə̀ bé gə́ tú bə nyɛ̀ɛ̀ bə̀ nə́ lwar tɛ̀bɛ́ bə̀ y'à n'ê tɛnɛ mɔ́, bə púrí myɛ bə̀ Yi ce kɔn dɛ̀bɛ́ bə̀ y'à la wɔ̀rhɔ́ mɔ́ lyɛ̃̀ kùrə̀, rə̀myɛ́ yi ní, nə́ gakó k'á kwɛ̃̀ nə́ vò byílí y yó, lò gakó ń tum jàà y wa. ¹⁶ Sə kɔn zhì dɛ̃ rɛ́ rə̀myɛ́ mɔ́, à tùntùnnə bé kə̀kàlà y èdù y'à n'ê twĩ̀, ǹdə́ kə̀kàlà y dõ mó y'à zhe swə́ ǹdə́ nə̀kwə̀r ǹdə́ twərh bə̀ jɔ̃̀ w ǹdə́ cɔ̀bɔ́ kàmə̀zǔrh. Náncɛsɛ́ y'à ŋwɛ́nɛ́ Zhəda lyì bí gakó kwã nɛ́. ¹⁷ Byɛ̀bɛ́ bə̀ y'à n'ê lwì byílí y ǹdə́ byɛ̀bɛ́ bə̀ y'à n'ê zhĩ wẽ̀ ré e súlí byɛ̀bɛ́ bə̀ y'à n'ê zhĩ bi zhĩĩ rí mú y'à n'ê twĩ̀ ǹdə́ jɛ̃̀ èdù, jɛ̃̀ y dõ mó zɛ̃̀ è zhe búlə́ ku. ¹⁸ È gə wɔ́ byɛ̀bɛ́ bə̀ y'à n'ê lwì mú yilə, bə̀ mə̀dù gakó yà ń nə́ ń lwì ǹdə́ búlə́ shù ń cã̌ nɛ. Pɔ́lá y wúlnə mó yà ń wɔ à nyí ni. ¹⁹ À wə̀l lyì-fwààlɛ́ ǹdə́ bù-kárna bɛ́ e súlí lyì bí dwã bɛ́ nɛ: «Tum rí dùm rə j'à já, e jà nə́myɛ̌ zɛ̃̀ nə́ làà dwã nɛ byílí y yó, nə́ nyɛ ǹdə́ dwã. ²⁰ Jàà y kɛ̀bɛ́ á nyɛ̀ɛ̀ pɔ́lá y cəl ré né, sə á bə̀ dwã yó nə́ yala nɛ. Nə́ Yi rí m'a ce nyí nə́ kwã nɛ́ rə sɛ̃ nə́ba rə bú.» ²¹ Nə́ y'ǎ n'é twĩ̀ tum rí, nə́ kə̀kàlà y zhe swə́ nə́ jɔ̃̀ wa, kɔn zhì cɛ-lár nɛ e m'e yí cǎmsɔ̌rh du» ²² Wɔ́ rə̀myɛ́ yi rí w myɛ, à wə̀l dwí rí ni: «Lò gakó mà n zɔ̃̀ Zhərəzalɛm nɛ́ ǹdə́ ń tùntùnnə mó; bə̀ m'a yə̀ dɛ̀nna nə́ yilə cəcɛ̃ nɛ, sə bə twĩ̀ nə̀nyɛ́nɛ́ nɛ!» ²³ Lò mə̀dù ga myɛ, àmyɛ́ ráá à da-byǎ bɛ́ ráá à tùntùnnə bé ráá dɛ̀nna bɛ́ byɛ̀bɛ́ bə̀ y'à ŋwɛ́nɛ́ ǹdə́ nɛ mɔ́, nə́myɛ̌ mə̀dù ga yà ń tá ń lwə̌r ń gàndɛ́ yé. Lò gakó yà ń zhe ń búlə́ ku w ń jə̀-jĩ́ y wə, e súlí nɛ̃̌.