¹ Vwĩ̀-zwə́lnə náncɛ y Elyəshiibi já n zɛ̃̀, ńmyɛ̌ ǹdə́ ń da-byǎ vwĩ̀-zwə́lnə bé, bə lù Pyììsí bwə̀rə̀ yə́. Bə kwè y bə pə Yi ni bə zɛ̃̀ bə ce è bwə̀ə̀lé né. Rə̀myɛ́ kwã nɛ́, bə̀ lù byílí y bə yí nunə Zɔ̌m jì-fwɛ̀lɛ̀ nánjíjíní y è lù e vò dɛ̃̌dɛ̃̌ bə̀ m'ê yìlì cɔ w mɔ́, bə zɛ̃̀ bə pɛ y Yi ni; bə zɛ̃̀ bə lyɛ̃ bə lù byílí y bə m'e yí Ananəyɛl jì-fwɛ̀lɛ̀ nánjíjíní y è lù e vò dɛ̃̌dɛ̃̌ mɔ́ nɛ. ² Zheriko lyì bí yele be bə lù, Yəməri byǐ Zəkuuri zɛ̃̀ n yele bə̀myɛ nɛ n lù. ³ Wɔ́ Émɔ̌rh bwə̀rə̀ y Sənaa byǎ bɛ́ lùwə̀, bə súlí bə cĩ́ è dǎr rɛ́ nɛ́, bə ce è bwə̀ə̀lé né, ǹdə́ rə̀ cǎbrɛ́ e súlí rə̀ dǎr rɛ́ wẽ̀ ré bə̀ m'ê pyi ri mú. ⁴ Urəyə byǐ Mərəmɔɔtɛ, Akɔɔsɛ nɔ̃̌ wá, yele be n mə n twĩ̀. Bərəca byǐ Məshəlam, Məshəzabɛl nɔ̃̌ wá, zɛ̃̀ n yele mo n mə n twĩ̀. Baana byǐ Sadɔɔkɛ zɛ̃̀ n yele mo n mə n twĩ̀; ⁵ Təkɔwa lyì bí zɛ̃̀ bə yele mo bə m'e twĩ̀, sə bə̀ lyì-fwààlɛ́ yə̀ shɛ̀nɛ́ bə zwẽ tumə né yó-cìnə́ bé nyí ni bə twĩ̀ yé. ⁶ Wɔ́ Yəshana bwə̀rə̀ y tum rí Pasəya byǐ Yɔyada ǹdə́ Bəsɔja byǐ Məshəlam twĩ̀; wɔ́ bə̀myɛ́ bə̀ cĩ́ è dǎr rɛ́ nɛ́ bə súlí bə ce è bwə̀ə̀lé né, ǹdə́ rə̀ cǎbrɛ́ e súlí rə̀ dǎr rɛ́ wẽ̀ ré bə̀ m'ê pyi ri mú. ⁷ Byɛ̀bɛ́ bə̀ yele be bə m'e twĩ̀ mú wɔ́ Gabaɔ̃ lyì bal Məlaca ǹdə́ Mərənɔɔtɛ lyì bal Yadɔn e súlí Babawɔ̃ ǹdə́ Myəsəpa lyì dwã, Efəraatɛ bù-fwɛ̀lɛ̀ y yi-zùr sõ nyí rí yó-cə́bal mɔ́ pyɛ̀lɛ̀ jì y yala nɛ. ⁸ Araya byǐ Uzhəə, cì-byǔr lùrnə̀ mó, yele mo n mə n twĩ̀. Ananya, wẽ̀ rə̀ lwẽ́ nã́nyə̀nyɛ̀lɛ́ tanna mɔ́, zɛ̃̀ n yele mo n mə n twĩ̀. Bə zhǐr Zhərəzalɛm nɛ́ ǹdə́ bə̀ lù bə yí Byílí Nã́wowòrhó wə́. ⁹ Uuri byǐ Erəfaya, Zhərəzalɛm dǔwúlí y kə̀kàlà èdù yó-cə́bal, yele be n mə n twĩ̀. ¹⁰ Arəmaafɛ byǐ Yədaya yele be n mə n twĩ̀ kɔn zǎ ń kɛ̀lɛ́ y yé y wə. Ashabənəya byǐ Atuushi zɛ̃̀ n yele ńmyɛ̌ nɛ n mə n twĩ̀. ¹¹ Wɔ́ nyí dõ w Arim byǐ Maləca ǹdə́ Paatɛ-Mɔwaabɛ byǐ Ashuubi twĩ̀ ní, e súlí e ce Myǐn shə́mɛ́nɛ́ jì-fwɛ̀lɛ̀ nánjíjíní y è lù e vò dɛ̃̌dɛ̃̌ mɔ́ nɛ́. ¹² Aa-Lɔwɛɛshɛ byǐ Shəlum, Zhərəzalɛm dǔwúlí y kə̀kàlà èdù cə́bal, ńmyɛ̌ ǹdə́ ń bə̀kwá bɛ́, yele mo bə twĩ̀. ¹³ Wɔ́ Anuuni, ń twĩ̀ Vɔlɔ bwə̀rə̀ y tum rí, ńmyɛ̌ ǹdə́ Zanɔwa lyì bí. Wɔ́ bə̀myɛ́ bə̀ lù yə, bə ce è bwə̀ə̀lé ǹdə́ rə̀ cǎbrɛ́ e súlí rə̀ dǎr wẽ̀ ré bə̀ m'ê pyi ri mú ní. Bə̀ súlí bə lù byílí jə̀-tórhó yírhə́ mɔ̀rhɔ̀ bə m'e yí Pùlú w bwə̀rə̀ yə́. ¹⁴ Wɔ́ Pùlú w bwə̀rə̀ y tum rí Erəkaabɛ byǐ Maləca, Bɛtɛ-Kərɛm dǔwúlí y cə́bal mɔ́ twĩ̀; wɔ́ ńmyɛ̌ ń lù yə, n ce è bwə̀ə̀lé ǹdə́ rə̀ cǎbrɛ́ e súlí rə̀ dǎr wẽ̀ ré bə̀ m'ê pyi ri mú ní. ¹⁵ Wɔ́ Nə̀-bùlì bwə̀rə̀ y tum rí Kolə-Ozé byǐ Shəlum, Myəsəpa dǔwúlí y cə́bal mɔ́ twĩ̀; wɔ́ ńmyɛ̌ ń lù yə, n ce è bwə̀ə̀lé ǹdə́ rə̀ cǎbrɛ́ e súlí rə̀ dǎr wẽ̀ ré bə̀ m'ê pyi ri mú ní; e súlí byílí y è wɔ Syilowe póló w yala nɛ, pyɔ̌ bɔ́ɔ́ w ǹdə́ sɔ́má y è n'ê shí Dəvyidi Pyə̀-cɔ w è swé mó bwə̌l mó w mó. ¹⁶ Ńmyɛ̌ kwã nɛ́ Azəbuuki byǐ Neemyi, Bɛtɛ-Shuuri dǔwúlí kə̀kàlà y cə́bal mɔ́, lù byílí y n mə n yí Dəvyidi lú-bɔ̀là bɛ́, n lyɛ̃ n yí póló w bə̀ kù mú e súlí Kàndar rɛ́ jì yə́. ¹⁷ Ńmyɛ̌ kwã nɛ́, Levyi dwí rí lyì bí pú bə twĩ̀: Bəni byǐ Erəwum ǹdə́ Ashabya, Kəyilə dǔwúlí kə̀kàlà y cə́bal mɔ́ yele mo n mə n twĩ̀ ń sə̀pwà dǔwúlí y wə. ¹⁸ Ńmyɛ̌ kwã nɛ́, bə̀ da-byǎ bɛ́ pú bə twĩ̀: Enadaadɛ byǐ Byinəwi, Kəyilə dǔwúlí kə̀kàlà y cə́bal mɔ́, ¹⁹ ǹdə́ Zhozwe byǐ Ezɛɛrɛ, Myəsəpa yó-cə́bal mɔ́, ń yele mo n mə n twĩ̀ nyí dõ wə, kɔn zhì jàà y è zǎ búlə́ wẽ̀ ré jì y sə-jìlə́ yé y wə, byílí y nèsé gə́ jəl dwã wẽ́ jàà y wa. ²⁰ Ńmyɛ̌ kwã nɛ́, Zəbəyi byǐ Bəruuki pú n twĩ̀ ǹdə́ yé-lumi nyí rí rə̀ y'à pú mú wẽ́, kɔn zhì byílí y nèsé gə́ y'à jəl dwã wẽ́ jàà y w mɔ́ e m'e yí vwĩ̀-zwə́lnə náncɛ y Elyəshiibi kɛ̀lɛ́ y bwə̀rə̀ y ne. ²¹ Ńmyɛ̌ kwã nɛ́, Urəyə byǐ Mərəmɔɔtɛ, Akɔɔsɛ nɔ̃̌ wá, pú n twĩ̀ nyí dõ wə, kɔn zhì Elyəshiibi kɛ̀lɛ́ y bwə̀rə̀ y ne e m'e yí Elyəshiibi kɛ̀lɛ́ y yó-gurə́ yə́. ²² Ńmyɛ̌ kwã nɛ́, vwĩ̀-zwə́lnə bé bə̀ y'à n'ê shí jààsɛ́ shɛ̀bɛ́ sə̀ bwə́l Zhərəzalɛm nɛ mɔ́ pú bə twĩ̀. ²³ Bə̀myɛ́ kwã nɛ́, Bɛ̃zhamɛ ǹdə́ Ashuubi pú bə twĩ̀ bə̀ kǎlsɛ́ yé y wə. Bə̀myɛ́ kwã nɛ́, Maasəya byǐ Azarəya, pú n twĩ̀ ń kɛ̀lɛ́ y yé y wə. ²⁴ Ńmyɛ̌ kwã nɛ́, Enadaabɛ byǐ Byinəwi pú n twĩ̀ nyí rí rə̀ pú mú wẽ́, kɔn zhì Azarəya kɛ̀lɛ́ y nɛ e m'e yí byílí y nèsé gə́ jəl dwã wẽ́ jàà y w mɔ́ nɛ e lyɛ̃ e m'e yí è nə̀gúl ré ne. ²⁵ Ńmyɛ̌ kwã nɛ́ è yàl Uzəyi byǐ Palaalɛ ń pú n twĩ̀ kɔn zhì byílí y nèsé gə́ jəl dwã wẽ́ mə̀gã̌ mɔ́ n mə n yí jì-fwɛ̀lɛ̀ nánjíjíní y è lù e vò dɛ̃̌dɛ̃̌ dɛ̃́dɛ̃́, è sarh rɛ́ du byílí y ni, è wɔ pyɔ̌-kɛ̀lɛ́ yé y wə, Byə̀nə́-jì kɛ̀lɛ́ y yala nɛ mɔ́. Ńmyɛ̌ kwã nɛ́, Parɔɔshɛ byǐ Pədaya, ²⁶ ǹdə́ Yi jì y tùntùnnə bé sanna bɛ́, bə̀ y'à wɔ Ofɛl dǔwúlí w mú, pú mu bə twĩ̀ bə m'e yí jì-fwɛ̀lɛ̀ nánjíjíní y è lù e vò dɛ̃̌dɛ̃̌ è sarh rɛ́ du byílí y ni, è wɔ Nàná bɛ́ bwə̀rə̀ y yi-zùr sõ mó ne. ²⁷ Bə̀myɛ́ kwã nɛ́, Təkɔwa lyì bí pú bi bə twĩ̀ nyí rí rə̀ pú mú wẽ́, kɔn zhì jàà y kɛ̀bɛ́ è zǎ jì-fwɛ̀lɛ̀ nánjíjíní dɛ̃̌dɛ̃̌ dɛ̃́dɛ̃́, è sarh rɛ́ du byílí y ni, è wɔ pyɔ̌-kɛ̀lɛ́ yé y w mó bə m'e yí Ofɛl byílí y ni. ²⁸ Kɔn zhì Eshesé bwə̀rə̀ y yə́-pɛ̀lɛ́ w mɔ́ è m'ê la, vwĩ̀-zwə́lnə bé twĩ̀, lò gakó ń kɛ̀lɛ́ y yé y wə. ²⁹ Bə̀myɛ́ kwã nɛ́, Yəmɛɛrɛ byǐ Sadɔɔkɛ pú bi n twĩ̀ ń kɛ̀lɛ́ y yé y wə. Ńmyɛ̌ kwã nɛ́, Shəkanya byǐ Shəmaya, Yi-púrhí-sõ bwə̀rə̀ y dɛ̀nna mɔ́, pú n twĩ̀. ³⁰ Ńmyɛ̌ kwã nɛ́, Shələmya byǐ Ananya, pú n twĩ̀ ǹdə́ Salaafɛ byǐ Anuuni, bwə̀ldù nyǎn mɔ́, nyí rí rə̀ pú mú wẽ́. Ńmyɛ̌ kwã nɛ́ Bərəca byǐ Məshəlam, pú n twĩ̀ kɔn zǎ ń jì-zɔ̃̀rà y yé y wə. ³¹ Ńmyɛ̌ kwã nɛ́ cì-byù-lùrnə Maləca pú n lù kɔn m'e yí Yi jì tùntùnnə bé sanna bɛ́ ǹdə́ dɔ̌lna bɛ́ jì y ǹdə́ Myəfəkaadɛ bwə̀rə̀ y yé y wə, kɔn súlí e lyɛ̃ e yí byílí y nə̀gúl ré dɛ̃̌-yó-jì yə́. ³² Cì-byǔr-lùrnə̀ bé ǹdə́ dɔ̌lna bɛ́ twĩ̀ byílí nə̀gúl ré dɛ̃̌-yó-jì y ǹdə́ Pyììsí bwə̀rə̀ y bwə̌l mó wə.