¹ Pyɔ̌ Artazɛrzɛɛsɛ pyɛ̀lɛ̀ rɛ́ jú byinə shí-èlyè byǐn rí, Nəsã cànà y wa, dɛ̃ rə̀dù, də̃̀vɛ̃́ y y'à zhǐ pyɔ̌ mɔ́ yé né, a zɛ̃̀ a kwè y a twərh a pɔ̃. À yé y gə́ y'à gwẽ̌ yə̀ gurhi ń yé né èta mɔ́ ce, ² pyɔ̌ mɔ́ bwə̀rh ne n wɔ̀: «Byè yil ǹ yé y gurhi èta mɔ́? Ǹ bə jɛ̀ nà? Bə̀kɔ́n wu-zhùlù ò zhe mo?» Ywẽ nánfɔ̀lɔ̀ j'a zə nɛ. ³ A zɛ̃̀ a wɔ̀ pyɔ̌ nɛ: «Yi m'a pə myè-èdɔ̀lɔ̀ pyɔ̌ nɛ! Etər à yé y m'a tó né e cẽ gurhu e jà cɔ w kɔ̀bɔ́ à dabá lú-bɔ̀là bɛ́ ŋwɛ́nɛ́ ò wẽ́ mó cɔ̀ kókó, ò bwə̀ə̀lé myɛ súlí rə jí myǐn lyə́m lyə́m? ⁴ Pyɔ̌ mɔ́ zɛ̃̀ n bwə̀rh ne n wɔ̀: «Bə̀kɔ́n ǹ nə nə́ ń yǎl b'à pɔ̃́?» À co dɛ̃̌ Yi rí, ⁵ a zɛ̃̀ a wɔ̀ pyɔ̌ mɔ́ nɛ: Rə̀ gə càn pyɔ̌ yírh wə, ǹ wu myɛ j'à nyɛ̀ ǹ tùntùnnə mó yilə, sə́ twĩ̀ ni Zhəda nyí rí wẽ́, à nàmbala bɛ́ lú-bɔ̀là bɛ́ cɔ w wa, mùnì a vò a lù w a cĩ́ dɛ̃̌.» ⁶ Pyɔ̌ mɔ́ zɛ̃̀ n bwə̀rh ne ǹdə́ pyə̀-kɛ̃ mɔ́ yà ń jě ń yala nɛ n wɔ̀: «Ǹ sɔ́má zhəl mó m'a dɛnɛ mə yí dǒ? Sə wɔ́ dǒ yi ní ǹ nə m'ǎ kwɛ̃̀ ń bà? Pyɔ̌ swéné à zhəl mó. A zɛ̃̀ a byili mu à kwã̀ɔ̃̀ mɔ́ dɛ̃ rɛ́. ⁷ A zɛ̃̀ a k'a wɔ̀ pyɔ̌ mɔ́ nɛ: «Pyɔ̌ gə só, sə bə pɛ̃ sábá Efəraatɛ bù-fwɛ̀lɛ̀ y yi-zùr sõ nyí rí yó-cìnə́ bé yilə, mùnì ga bə yẽ̌ ne a lyɛ̃ a yí Zhəda. ⁸ Sə bə súlí bə pɛ̃ sɛ́bɛ́ dõ pyɔ̌ tú w yó-cə́bal Asaafɛ yilə, mùnì ga n pɛ̃ dǎr pyɔ̌-dǒ w ò bwə́l Yi jì y yala nɛ mɔ́ bwə̀ə̀lé ǹdə́ cɔ w byílsí e súlí jì y kɛ̀bɛ́ à la è wẽ́ yál mɔ́ yilə. À Yi rí gə́ y'à n'ê nyǐ à yò náàcɛ̀nɛ́ mɔ́ ce, pyɔ̌ mɔ́ pɔ nɛ sábá nɛ́ nə̀myɛ́ mɔ́. ⁹ A zɛ̃̀ a vò Efəraatɛ bù-fwɛ̀lɛ̀ y yi-zùr sõ tənà y cǐnnə bé sõ a pə bɛ pyɔ̌ mɔ́ sábá nɛ́. Pyɔ̌ mɔ́ yà ń ce shə̀dɛ́ɛ́sɛ yó-cìnə́ ǹdə́ eshə-jòmnə tó ne. ¹⁰ Orɔ̃ lyì bal Sambalaatɛ ǹdə́ Tɔbya, Amɔ̃ byǎ bɛ́ lò, ń yà ń wɔ́ tùntùnnə nyɛ̀ɛ̀ rɛ, sə bə̀ yə̀ re swéné gaga yé, bə̀ gə́ lwar bə̀ lò tú ń nə́ ń nyǐ kɔn rɛ́ tɛ̀bɛ́ rə̀ y'à càn Esərayɛl lyì byǎ bɛ́ yil mú, ǹdə yò ta mɔ́ yilə. ¹¹ À gə́ yú Zhərəzalɛm à mɛ̃ gàà dwã nə̀tɔ̀. ¹² Rə̀myɛ́ kwã nɛ́, à tó cəcɛ̃ nɛ a zɛ̃̀ a kwè sɔ́má ǹdə́ lyì màngɛlɛ́ à kwã. Sə rə̀myɛ́ yi ní, à y'à gwẽ̌ yə̀ kɔn rɛ́ tɛ̀bɛ́ à Yi rí y'à co à wẽ́ b'à wɛ̀rhɛ́ Zhərəzalɛm yil mú lò mə̀dù ga nɛ byili yé. Rə̀myɛ́ yó myɛ, à yə̀ vwǎm dõ zal è gə də̀ mɔ̀bɔ́ à y'à jě mó dúdú. ¹³ A tó Vɔlɔ w bwə̀rə̀ y a du cəcɛ̃ nɛ a zɛ̃̀ a zə à yé a zǎ Dɔm mɔ́ nə̀-bùlì y ǹdə́ Pùlú w bwə̀rə̀ y səta. À y'à n'â byɛ́lɛ́ Zhərəzalɛm byílsí sə̀ y'à j'a jǐrh bɔ̀là dúdú ǹd'ô bwə̀ə̀lé rə̀ y'à jú myǐn kókó mó. ¹⁴ À tó Nə̀-bùlì y bwə̀rə̀ y ǹdə́ pyɔ̌ nɛ̃̌-póló w səta, sə vwǎm mɔ́ à y'à jě mó k'ê yə̀ bwə̌l nɛ mə̀ la tó né mə lyɛ̃ yé. ¹⁵ Rə̀myɛ́ ce a k'a tó Sədərɔ̃ nə̀-gɔ̀lɔ̀ w w cəcɛ̃ y wẽ́, a jì a byɛ́lɛ́ byílsí náàcɛ̀nɛ́ kókó, a zɛ̃̀ a k'a tó Vɔlɔ bwə̀rə̀ y a kwɛ̃̀, e j'a yə̀ à byɔ́lɔ́ mɔ́ ga èta. ¹⁶ Bù-kárna bɛ́ y'à yə̀l à gə́ y'à zhə̀l má ǹdə́ kɔn rɛ́ tɛ̀bɛ́ à wɛ̀rhɛ́ mɔ́ yé; rə̀myɛ́ yi ní, à y'à gwẽ̌ yə̀ kaka Zhwifubá ǹdə́ vwĩ̀-zwə́lnə bé ǹdə́ lyì-fwààlɛ́ ǹdə́ bù-kárna bɛ́ ǹdə́ byɛ̀bɛ́ dwã bɛ́ bə̀ y'à n'ê nyǐ tumə né yò mó myɛ nɛ kɔn rə̀dù ga byili yé. 17 ¹⁷ À gə́ byɛ́lɛ́ byílsí a zhɛ̀ kwã nɛ́, a zɛ̃̀ a wɔ̀ bɛ: «Á nə zúzúnú w kɔ̀bɔ́ nə́ wɔ ò wẽ́ mó, Zhərəzalɛm cɔ w gə́ jǐrh jì-bwə̀r ò bwə̀ə̀lé myɛ jí myǐn mú yilə. Bà-na nə́ lù Zhərəzalɛm byílí yə́, nə́ vùr cìzhìl ré. ¹⁸ A byili bi à Yi rí gə́ y'à cèlè rə̀ wu-bɔ̀nɔ̀ jɛ̃̀ y à yó w rə̀ n'ê yìlì ni ní, e súlí pyɔ̌ mɔ́ gə́ yà ń zɔ̀m ǹdə́ nɛ nɛ́. Bə zɛ̃̀ bə wɔ̀: «Zɛ̃̀-na dɛ̃̌, nə́ ji lú mú kùrə̀!»; sə bə̀ co jàn nɛ́ ǹdə́ sãɔ̃ tũ̀-fɔ̀lɔ̀ w òmyɛ́ mɔ́ yilə. ¹⁹ Orɔ̃ lyì bal Sambalaatɛ ǹdə́ tùntùnnə Tɔbya, Amɔ̃ lyì bal mɔ́ e súlí Gəshɛm, Araabɛ mɔ́, gə́ nyɛ̀ɛ̀ rɛ mɔ́ bə̀ mɔ̀n nə́ba bə súlí bə fulsi nə́ba. Bə̀ yòwə̀: «Bə̀kɔ́n á nə la wɔ̀rhɔ́ èta mɔ́? Á n'á yǎl á wɔ̀ b'ǎ twə́r k'ê tɛ̀nɛ́ ǹdə́ pyɔ̌ mɔ́ nà?» ²⁰ À twĩ̀ bə vò bə lyár bɛ bə wɔ̀: «Wɔ́ dɛ̃̌ Yi rí cìcì rə m'a ce nə́ tum rí zə kùrə̀. Nə́myɛ̌ ń tùntùnnə bé, nə́ m'ǎ zɛ̃̀ nə́ ji lú mú kùrə̀. Sə ámyɛ̌ t'á la cəl zal, á t'á la kaka cìnú, bə̀ t'â la á yò myɛ lyǐrh Zhərəzalɛm nɛ́ yé.»