¹ Bə ce Sambalaatɛ ǹdə́ Tɔbya ǹdə́ Gəshɛm, Araabɛ mɔ́ e súlí nə́ zwə̀ bé dwã bɛ́ nyɛ̀ɛ̀ b'à y'à k'a lù byílí yə́, sə bɔ̀l y'à k'ê tɛ̀nɛ́ è yala nɛ yé. Rə̀myɛ́ yi ní, à y'à gwẽ̌ yə̀ bwə̀ə̀lé né ce yé. ² Sambalaatɛ ǹdə́ Gəshɛm twĩ̀ bə wɔ̀ nɛ: «Bə̀ nə́ jəl dwã nə́ zhərh Kəfirim ní, Ono jə́ y wə. Bə̀ y'à n'ê yǎl bə wɛ̀rhɛ́ nɛ lwɛlɛ. ³ À twĩ̀ lyì bə vò bə wɔ̀ bɛ: «Tum rí tɛ̀bɛ́ à n'â twĩ̀ mú wɔ́ tum nánfɔ̀lɔ̀, rə̀myɛ́ ce à wàr à m'a só a b'ǎ sõ yé. Byè yil tum rí nə m'a zhì à gə́ la rɛ yõ̌ a só a b'ǎ sõ yi ní mú?» ⁴ Bə twĩ̀ lò mó ńmyɛ̌ mə̀dù y twər rə̀na à sõ, sə à lyár bɛ kɔn rɛ́ rə̀myɛ́ rə̀dù yə́. ⁵ Sambalaatɛ kə́ n twĩ̀ ń tùntùnnə mó à sõ twər rə̀nu nyǎn rɛ́ yó w ǹdə́ sɛ́bɛ́ à yil ǹdə́ cəl rə̀myɛ́ rə̀dù yə́. ⁶ Rə̀ y'à kɛ̃ rə̀ wẽ́: «Bə̀ n'ê wə̀l dwə́ né dwã bɛ́ sõ bə̀ ǹmyɛ́ ǹdə́ Zhwifubá, á n'á yǎl á vùr á twə́r pyɔ̌ kwã nɛ́, sə Gəshəmu myɛ nə́ ń wə̀l re. Wɔ́ rə̀myɛ́ rə̀ ce ń zɛ̃̀ ǹ nə́ ń lwì byílí y mùnì ga ń jǐrh bə̀ pyɔ̌ ǹdə bə̀ gə́ n'ê wə̀l né. ⁷ Ǹ gaga mɔ́ vùr nyì-zwennə bə̀ la bwə̀l ǹ shò kwã nɛ́ Zhərəzalɛm nɛ́ bə wɔ̀: Pyɔ̌ ŋwɛ́nɛ́ Zhəda né! Sə èlǎsɛ̃́, bə̀ m'a ce nyí rə̀myɛ́ mɔ́ yí pyɔ̌. Rə̀myɛ́ ce, bə̀ nə́ zhərh ǹdə́ dwã.» ⁸ Rə̀myɛ́ yi ní, à twĩ̀ bə wɔ̀ mɔ: «Kaka tɛ̀nɛ́ rə̀ nyɛrhɛ zɔ̀mà nɛ́ nyɛ̀bɛ́ ǹ nə́ ń cĩ́ mú ni yé; wɔ́ ǹmyɛ́ ǹ nə́ ǹ lùl ni!» ⁹ Nyǐ, bə̀myɛ́ gakó mó y'à wɔ́ ywẽ bə̀ y'à n'ê yǎl bə ce nə́ba bə̀ m'ê wə̀lə̀: «Bə̀ m'a lyɛ̀ɛ̀ bə yẽ̌ tum rí ni, rə̀ t'â la tũ̌ gaga yé.» Rə̀myɛ́ ce, súlí à jàn rɛ́ Cinu Yi!» ¹⁰ Dɛ̃ rə̀dù a zɛ̃̀ a vò Dəlaya byǐ Shəmaya, Mətabəyɛl nɔ̃̌ w dǒ-sõ, bə̀ cə̌r y'à ŋwɛ́nɛ́ ń yilə, ń yə̀ ŋwɛ̀nɛ́ n b'à sõ yé. À gə́ yú ń sõ yi ní ń wə̀l ne: «Bə̀ nə́ jəl dwã Yi jì y wə, Yi dúdú jì y wə, sə nə́ pyi è bwə̀ə̀lé, nyǐ bə̀ bàn mɔ́ gu; sə è wɔ́ cəcɛ̃ nɛ bə̀ n'ê yǎl bə tó né bə m'e b'e gu mú.» ¹¹ À lyár mɔ a wɔ̀: «Àmyɛ́ bal mɔ́ dwí rí dõ m'a dùr? E súlí myɛ wɔ́ numbyíní kɛ̌ ǹdə àmyɛ́ ta è m'a ŋwɛ̀nɛ́ e zù Yi dúdú jì y wẽ́ sə e gwẽ̌ zə myə̌la? À t'â la è wẽ́ zú yé!» ¹² Sə à tú a lwar b'è də̀ Yi rə̀ y'à twĩ̀ mu yé; má ń gə yà ń zɔ̀m ǹdə nyì-zwennə ta à shò kwã nɛ́ myɛ, wɔ́ Tɔbya ǹdə́ Sambalaatɛ gə́ y'à kɔ̀n mɔ ǹdə́ wársɛ mɔ́ yilə. ¹³ È nə wɔ́ byè yil bə̀ y'à kɔ̀n mɔ èta? Wɔ́ sə n mə n ce ne ywẽ, a zɛ̃̀ a wɛ̀rhɛ́ kɔn dɛ̀bɛ́ ń byili ni mú, s'a m'a dó. Èta bə̀ y'à m'a tó rə̀myɛ́ dɛnnɛ bə cɔ̀ à yil ré sə bə cĩ́ dóó à yó wə. ¹⁴ Rə̀myɛ́ ce, à Yi, lyǐrh Tɔbya ǹdə́ Sambalaatɛ yò, kɔn dɛ̀bɛ́ bə̀ wɛ̀rhɛ́ mɔ́ yilə; sə́ súlí ń lyǐrh Nɔwaja, kɛ̃ mɔ́ mɔ̀bɔ́ ń wɔ́ nyì-zwennə mó yò ǹdə́ nyì-zwennə bé dwã bɛ́ byɛ̀bɛ́ bə̀ y'à n'ê yǎl bə ce ne ywẽ mó yò. ¹⁵ Byílí y lù dwã shí-ènu ǹdə́ nə̀lyè wẽ́, sə è zhɛ̀ Eluuli cànà y dwã shí-èlyè ǹdə́ nə̀nu yù wə. ¹⁶ Nə́ zwə̀ bé gakó gə́ nyɛ̀ɛ̀ rɛ, ywẽ zə dwə́ né nyɛ̀bɛ́ gakó nə̀ y'à kə́kɛ́lɛ́ nə́ba mɔ́, cìzhìl k'a zə bə̀ cìcì mú. Bə zɛ̃̀ bə lwar bə̀ tum rí tɛ̀bɛ́ tũ̌ rə zhɛ̀ mɔ́ yàl nə́ Yi rí pùbùlə̀. ¹⁷ Wɔ́ rə̀myɛ́ yi ní myɛ Zhəda lyì-fwààlɛ̀ y'à kɛ̃ sábá nánzhəzhɔ̌ bə pə Tɔbya nɛ, Tɔbya myɛ yà ń nə́ ń kɛ̃ sábá ń pɛ bɛ. ¹⁸ Bə̀ wɔ́ cɔ̀nɔ̀ ò y'à lyẽ Zhəda lyì nánzhəzhɔ̌ ǹdə́ Tɔbya dwã nɛ. Tɔbya yà ń wɔ́ Ara byǐ Shəkanya cə́m-bal; ń byǐ Yɔwanã myɛ zɛ̃̀ ń yà ń jú Bərəca byǐ Məshəlam bə̀kɔ́. ¹⁹ Bə̀ y'à n'ê cèrhé mo à yé né, bə̀ n'ê kwè à nyì-zɔ̀mà nɛ́ bə̀ zhə̀l bə̀ cĩ́ mu. Tɔbya yà ń pɔ sábá nə bà, ń la mə n ce ne ywẽ.