¹ Yezu kǝ́ n wɔ̀ bɛ: «Zhǝ̀nà, à n'â wǝ̀l ába: lyì bí byɛ̀bɛ́ bǝ̀ zhǐ nyɔ̀nɔ̀ mɔ́ jàlà t'â la cú ǹdǝ́ bǝ̀ yírhǝ́ yǝ̀ Yi pyɛ̀lɛ̀ rɛ́ nɛ rǝ̀ bàn ǹdǝ́ jàn yé.» ² Dwã nyǝ̀ldù rǝ̀myɛ́ kwã nɛ́, Yezu zǝ Pyɛɛrɛ ǹdǝ́ Zhakɛ ǹdǝ́ Zhã n mǝ n jì pyɔ̀ dɛ̃̌ dɛ̃̌ yó bǝ̀ dúdú. ³ N lyǝ́r bǝ̀ yírhǝ́ né wǝ. Ń gàndɛ́ jǐrh námpwẽ̀ pwɛ̃́pwɛ̃́, rǝ̀ n'ê jǝ́jɛ̀mɛ́. Cɛ yó lò wàr gɔ̀nɔ̀ ń la pòlò o jǐrh námpõ̀ èta yé. 4 Bǝ pwírí Elyi ǹdǝ́ Muyiisi bǝ̀ zhǐ bǝ̀ n'ê zɔ̀m ǹdǝ́ mɔ. ⁴ Bǝ pwírí Elyi ǹdǝ́ Muyiisi bǝ̀ zhǐ bǝ̀ n'ê zɔ̀m ǹdǝ́ mɔ. ⁵ Pyɛɛrɛ zɛ̃̀ n wɔ̀ mɔ̀: «Yó-cǝ́bal, kɔn mǝ̌ bǝ̀ nǝ́ mɛ̃ nyɔ̀nɔ̀. Nǝ́ m'ǎ pú kwǝ̀ǝ́rhe rǝ̀tɔ̀; ń jí òdù, Muyiisi jí òdù, Elyi jí òdù.» ⁶ Ń yà ń yǝ̀l ń gǝ́ mà n zɔ̀m nɛ́ yé. Ywẽ y'à zhe ńmyɛ̌ ǹdǝ́ ń tó-dwã bɛ́ dɛ̃́dɛ̃́. ⁷ Ébɔ̃ bǝ̀ o zhì bǝ̀ yó wǝ, ò ywǝ́l mó pyi bi. Bǝ nyɛ̀ɛ̀ cǝl rǝ̀ zɔ̀m ébɔ̃ w wẽ́ rǝ wɔ̀: «Mɔ̀bɔ́ wɔ́ àmyɛ́ Byǐ. À só mo dɛ̃́dɛ̃́. Cili-nǝ ń zɔ̀mà nɛ́.» ⁸ Yezu kwã-lyì bí j'a yǝ̀ làlà bǝ pyìrhí bǝ nyǐ jààsɛ́ gakó, sǝ bǝ̀ yǝ̀ lò dõ nɛ yé. Wɔ́ Yezu dúdú ń tó be ń zhǐ. ⁹ Bə̀ gə́ tú bə zhǐr bə̀ nʼê swé pyɔ̀ wá, Yezu pə bə nyí, bə̀ bə̀kʼa cĩ́ kɔn rɛ́ tɛ̀bɛ́ bə̀ yírhə́ nɔ mɔ́ lò lò nè yé, kɔn mʼe yí Numbyíní Byǐ gə ká ń bwìrhì n zɛ̃̀ n du cùùrì wẽ́. ¹⁰ Sə bə̀ zwẽ zɔ̀mɛ̀ rɛ́ rə̀myɛ́, bə̀ mʼê nʼê bwə̀rh dwã bə̀ nʼê pyà bùrhù e du cùùrì wẽ́ mó kùrə̀. ¹¹ Bǝ zɛ̃̀ bǝ bwǝ̀rh mò bǝ wɔ̀: «E nǝ wɔ́ byè yil Muyiisi nyǝ́ né byilnǝ bé n'ê wǝ̀l bǝ̀ Elyi mà n tó yé n bà?» ¹² N wɔ̀ bɛ: «Zhǝ̀nà, Elyi mà n tó yé n bǝ̀ n kwɛrhɛ kɔn gakó n cĩ́ rǝ̀ jàà wà. Sǝ wɔ́ byè yil bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ̀ wɔ́ nyɔ́ɔ́ sǝ Numbyíní Byǐ nwɛ̀nɛ̀ dɛ̃́dɛ̃́, bǝ fulsi mu? ¹³ Sǝ à n'â wǝ̀l ába: Elyi túwǝ́, sǝ lyì bí wɛ̀rhɛ́ mɔ ǹdǝ bǝ̀ gǝ́ n'ê yǎl nɛ́. Wɔ́ èta bǝ̀ y'à kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né ń shò-kwã nɛ́.» ¹⁴ Yezu ǹdǝ́ Pyɛɛrɛ ǹdǝ́ Zhakɛ ǹdǝ́ Zhã gǝ́ tú bǝ yí ń kwã-lyì bí dwã bɛ́ sõ, bǝ̀ nɔ lyì-zhǎ ǹdǝ́ Muyiisi nyǝ́ né byilnǝ bé jàlà bǝ̀ kǝ́kɛ́lɛ́ bɛ bǝ ce cǝcǝl w bǝ̀ n'ê mà nyǝ̀-pǎr ǹdǝ́ bɛ. ¹⁵ Lyì-zhǎ bɛ́ gǝ́ nɔ Yezu ń bànà, kɔn jàr bǝ̀ gakó, bǝ dùr bǝ vò bǝ̀ n'ê ce mo. ¹⁶ Yezu zɛ̃̀ n bwǝ̀rh bè n wɔ̀: «Bǝ̀kɔ́n nyǝ̀-pǎr á n'á mà ǹdǝ́ bɛ?» ¹⁷ Bal mǝ̀dù zɛ̃̀ n zhì lyì-zhǎ bɛ́ wẽ́, n wɔ̀ mɔ̀: «Yó-cǝ́bal, à zǝ à byǐ a bǝ̀ ǹ sono. Nǝ̀cílí námmǝlwɛ̀lɛ́ zhe mo, e ce ń kǝ́ ń wàr ń nǝ́ ń zɔ̀m yé. ¹⁸ È gǝ kwè mò mǝ̀gã̌ mǝ̀gã̌, è y'a ji mu tɛ̃́, ń tǝ̀tǝ̀-pùnú du, ń nǝ́ ń dɔ̀m ń yǝ́lǝ́ dwã nɛ, n cì sáám. À lwǝ̀l ǹ kwã-lyì bí ni bǝ̀ bǝ̀ jǐ y, sǝ bǝ̀ yǝ̀ y ŋwɛ̀nɛ́ bǝ jì yé.» ¹⁹ Yezu zɛ̃̀ n wɔ̀ bɛ: «Ámyɛ̌ lũ w kɔ̀bɔ́ lyì bí yǝ̀ Yi ni zhí yé. À gwẽ̌ b'a yǝ̀ nɛ́ ǹd'ába kɔn m'e yí dǒ? À gwẽ̌ b'a pyɛ́nɛ́ a yǝ̀ nɛ́ ǹd'ába kɔn m'e yí dǒ? Zǝ-na bǝ̀sɔ́bwɛ̀lɛ́ y á bǝ̀ nyɔ̀nɔ̀.» ²⁰ Bǝ zɛ̃̀ bǝ zǝ bǝ̀sɔ́bwɛ̀lɛ́ y bǝ m'e bà. Nǝ̀cílí y gǝ́ nɔ Yezu, e j'a vúvǔ bǝ̀sɔ́bwɛ̀lɛ́ y e tu tɛ̃́ è n'ê byíbyílí, è tǝ̀tǝ̀-pùnú n'ô dwi. ²¹ Yezu zɛ̃̀ n bwǝ̀rh byǐ mú da mɔ́ n wɔ̀: «Dǒ è ju kùr è zhe mo?» Da mɔ́ wɔ̀ mɔ̀: «Ń bǝ̀swɛ́nɛ́ yi ní ga. ²² È y'a ji mu myǐn wǝ, e ji mu nɛ̃̌ wẽ́ twǝr nánzhǝzhɔ̌, è n'ê yǎl e gu mu. Ǹdǝ́ ǹ gǝ wɔ̌, sǝ́ dùr nǝ́ nɔ̀nɔ̀, ń sɛ̃ nǝ́ba.» ²³ Yezu zɛ̃̀ n wɔ̀ mɔ̀: «Bǝ̀kɔ́n yil ǹ nǝ́ ǹ wǝ̀l b'à gǝ wɔ̌? Lwar bǝ̀ lò mɔ̀bɔ́ ń zhí Yi ni, kɔn gakó wɔ̌ rǝ̀ wɛ̀rhɛ́ rǝ̀-ná-cí yilǝ.» ²⁴ Rǝ̀myɛ́ yó, da mɔ́ já n bya dɛ̃̌ dɛ̃̌ n wɔ̀: «À zhí Yi ni, sǝ sɛ̃ nɛ a kwɛrhɛ a zhí ri ǹdǝ́ à wu gakó.» ²⁵ Yezu gǝ́ nɔ lyì-zhǎ bɛ́ bǝ̀ n'ê dùr bǝ̀ bànà, n zɛ̃̀ n bú nǝ̀cílí y n wɔ̀: «Ǹmyɛ́ wɔ́ nǝ̀cílí kɛ̀bɛ́ è n'ê ce lò zhã̌ shĩ, e ce ń kǝ́ ń wàr ń nǝ́ ń zɔ̀m yé, à n'â pɛ mɔ́ nyí bǝ̀ ǹ du bǝ̀sɔ́bwɛ̀lɛ́ y kɛ̀bɛ́ wẽ́, sǝ ǹ bǝ̀ká kǝ́ zù è wẽ́ gaga yé.» ²⁶ Nǝ̀cílí y zɛ̃̀ e wǔrh, e vúvǔ bǝ̀sɔ́bwɛ̀lɛ́ y e ji tɛ̃́ è n'ê vɔ́vwǎ, e zɛ̃̀ e shǝ́r. Bǝ̀sɔ́bwɛ̀lɛ́ y jǐrh ǹdǝ cùù ta. Lyì nánzhǝzhɔ̌ y'à n'ê wǝ̀l bǝ̀ ń cùwǝ̀. ²⁷ Yezu zɛ̃̀ n zǝ ń jɛ̃̀ nɛ̀ n zhẽ̌ mo n ce n zhì dɛ̃̌. ²⁸ Yezu gə́ ká n bə̀ kɛ̀lɛ́ w yó né, è yʼà wɔ́ ńmyɛ̌ ǹdə́ ń kwã-lyì bí dúdú. Bə zɛ̃̀ bə bwə̀rh mò bə wɔ̀: “Bə̀kɔ́n yil nə́myɛ̌ yə̀ nə̀cílí y èmyɛ́ ŋwɛ̀nɛ́ nə́ jì?” ²⁹ N wɔ̀ bɛ: “Wɔ́ Yi lwǝ̌l dúdú è wɔ̌ è mʼa jì nə̀cílí y kɛ̀bɛ́ dwí rí.” ³⁰ Yezu ǹdǝ́ ń kwã-lyì bí zhǐr bǝ tó Gǝlile bǝ lyɛ̃, sǝ ń yà ń tá ń yǎl bǝ̀ lyì-zhǎ bɛ́ lwar ń shò yé. ³¹ Ń yà ń nǝ́ ń cèrhè kàrmɔ̀ ń kwã-lyì bí ni, ń nǝ́ ń wǝ̀lǝ̀: «Bǝ̀ m'a zǝ Numbyíní Byǐ bǝ pǝ numbyínsi ni, bǝ gu mu, sǝ ń mà n ká n bwìrhì ń dwã nǝ̀tɔ̀ yùwǝ̀.» ³² Ń kwã-lyì bí y'à bǝ zɔ̀mɛ̀ rɛ́ rǝ̀myɛ́ mɔ́ kùr nyɛ̌ yé, e jà bǝ̀ y'à kwàl sǝ bǝ bwǝ̀rh mò myɛ yé. ³³ Bǝ yí Kapɛrnaɔm, bǝ zù jù wǝ̀. Yezu zɛ̃̀ n bwǝ̀rh bè n wɔ̀: «Bǝ̀kɔ́n nyǝ̀-pǎr á y'ǎ n'á mà sɔ́má y yó?» ³⁴ Bǝ̀ zhǐ bǝ̀ nyí cám, bǝ̀ bǝ̀ y'à n'ê mà nyǝ̀-pǎr ǹdǝ́ dwã sɔ́má y yó, bǝ̀ m'ê pyà lò mɔ̌ yil ń mà n yǝ̀ bǝ̀ yé né. ³⁵ N zɛ̃̀ n jòm tɛ̃́, n byẽ̀ ń kwã-lyì bí shí ǹdǝ́ bǝ̀lyè y, n wɔ̀ bɛ: «Lò mɔ̀bɔ́ ń ŋwɛ́nɛ́ á wẽ́ ń nǝ́ ń yǎl n yǝ̀ á yé né cǝ́bal, sǝ n lwǝl ń cìn tɛ̃́ n yǝ̀ á gakó tùntùnnǝ̀ n twĩ̀ n pǝ ába.» ³⁶ N zɛ̃̀ n zə bə̀sɔ́bwɛ̀lɛ́ námpɔ́lɛ́ èdù, n ce e zhì bə̀ yé né, n zə ń jɛ̀rh n kwə̀ə̀lè yə̀, n wɔ̀ bɛ: ³⁷ “Lò mɔ̀bɔ́ ǹ shɛ̀nɛ́ ń zwẽ bə̀sɔ́ná bɛ́ bə̀myɛ́ mə̀dù zhəəle àmyɛ́ yilə, wɔ́ àmyɛ́ cìcì zhəəle ǹ zwẽ. Sə lò mɔ̀bɔ́ ǹ zwẽ àmyɛ́ zhəəle, è də̀ àmyɛ́ dúdú zhəəle ǹ zwẽ yé. Wɔ́ ǹdə́ mɔ̀bɔ́ ń twĩ̀ nì mú ga zhəəle ǹ zwẽ.” ³⁸ Zhã zɛ̃̀ n wɔ̀ Yezu ni: «Yó-cǝ́bal, nǝ́ nɔ bal mǝ̀dù ń nǝ́ ń jì nǝ̀cílsi námmǝlwǎlsɛ ǹmyɛ́ yil yilǝ, sǝ nǝ́ y'ǎ n'é yǎl nǝ́ cǝ̀r mò, ń gǝ́ tá ń tó nǝ́ba mó yilǝ.» ³⁹ Yezu zɛ̃̀ n wɔ̀: «Lò wàr ń mà n wɛ̀rhɛ́ màmyɔ àmyɛ́ yil yilǝ, n zɛ̃̀ n ká n zhízhílí n zhìlì à yil yé. Á bǝ̀k'á cǝ̀r mò yé. ⁴⁰ Lwar-na bə̀ lò mɔ̀bɔ́ ń tá ń pyà nə́ yò zhìlù, rə̀ ná-cí wɔ́ nə́myɛ̌ lò. ⁴¹ Zhə̀nà, à nʼâ wə̀l ába: lò mɔ̀bɔ́ ń pɔ ába nɛ̃̌ zɔ̌-bwɛ̀lɛ́ myɛ cìcì á nyɔ̀ á gə́ wɔ́ Kristə kwã-lyì yilə, rə̀ ná-cí mà n nə kwǎndɛ zhə̀n zhə̀nà.” ⁴² Yezu súlí n wɔ̀: “Lò mɔ̀bɔ́ bə̀ gə lyẽ nə́kul-põ nánfɔ̀lɔ̀ ń byã nɛ bə cìrh mò bə ji mwə̃́ w cɔ̃̀ ń gə cìrh byɛ̀bɛ́ bə̀ yə̀ yírh swí bə jʼa zhí àmyɛ́ nɛ mɔ́ mə̀dù cìcì ń ce lwɛlɛ wa. ⁴³ “Ǹ jɛ̃̀ gə nʼê ce ǹ wɛ̀rhɛ́ lwɛlɛ, sə́ gõ yə̀. Ǹ gə zù nyǔ mə̀ tʼâ la zhɔ̌ wẽ́ ǹdə́ jɛ̃̀ èdù cɔ̃̀ ǹ gə zù myǐn mə̀ tʼâ cì gaga wẽ́ ǹdə́ jɛ̀rh sə̀lyè. [ ⁴⁴ Gàà mɔ́ zə̀zɔ̀mɛ́ nɛ́ tʼâ cì yé, myǐn mú myɛ tʼâ cì yé.] ⁴⁵ Ǹ nà gə nʼê ce ǹ wɛ̀rhɛ́ lwɛlɛ, sə́ gõ yə̀. Ǹ gə zù nyǔ mə̀ tʼâ la zhɔ̌ wẽ́ ǹdə́ nà èdù cɔ̃̀ ǹ gə zù myǐn-jù w ǹdə́ nə̀rh sə̀lyè. [ ⁴⁶ Gàà mɔ́ zə̀zɔ̀mɛ́ nɛ́ tʼâ cì yé, myǐn mú myɛ tʼâ cì yé.] ⁴⁷ Ǹ yírh gə nʼê ce ǹ wɛ̀rhɛ́ lwɛlɛ, sə́ jàrh rɛ̀ ń dwĩ̀. Ǹ gə zù Yi tənà y wa ǹdə́ yírh rə̀dù cɔ̃̀ ǹ gə zù myǐn-jù w ǹdə́ yírhə́ nə̀lyè. ⁴⁸ Gàà mɔ́ zə̀zɔ̀mɛ́ nɛ́ tʼâ cì yé, myǐn mú myɛ tʼâ cì yé. ⁴⁹ “Bə̀ mʼa zə myǐn bə ce lò gakó jǐrh wárhgáá, ǹdə nə̀kwə̃̌ gə́ nʼê wɛ̀rhɛ́ nɛ́. ⁵⁰ Nə̀kwə̃̌ nyɛ̀, sə è gə tárh, etər è mʼa tó né e kʼe zə nyí? Yál-na ǹdə nə̀kwə̃̌ ta, sʼá jòm ǹdə́ dwã ǹdə́ yə̀-zùlə́.”