¹ Yezu zhǐr gàà, n vò Zhide tǝnà y wa, n lyɛ̃ n vò Zhɔrdɛ̃ bwǐ y èpákɛ̀. Lyì nánzhǝzhɔ̌ k'e bǝ̀ ń sono, n zɛ̃̀ n kǝ́ ń nǝ́ ń cèrhè bè kàrmɔ̀ ǹdǝ ń gǝ́ ya n cèrhè bè né gaga mɔ́. ² Farɛzhɛ̃ɛ̃bá jàlà y'à n'ê yǎl bǝ zhẽ̀ mò. Bǝ zɛ̃̀ bǝ yí ń nyí ni, bǝ bwǝ̀rh mò bǝ wɔ̀: «Sɔ́má ŋwɛ́nɛ́ bǝ̀ bal zhɛ̃́ ń kɛ̃ n vùr mò?» ³ N zɛ̃̀ n bwǝ̀rh bè n wɔ̀: «Muyiisi pɔ ába nyí bǝ̀ byè?» ⁴ Bǝ wɔ̀ mɔ̀: «Muyiisi pɔ sɔ́má bǝ̀ bal wɔ̌ ń kɛ̃ zhɔ̃́ sɛ́bɛ́, n zɛ̃̀ n zhɛ̃̀ ń kɛ̃ n vùr mò.» ⁵ N zɛ̃̀ n wɔ̀ bɛ: “Wɔ́ á yó-kùùlí rə̀ ce Muyiisi kɛ̃ nyí rí rə̀myɛ́ sɛ́bɛ́ rɛ́ wẽ́ n pə ába. ⁶ Sə lũ w kùr-ju yi ní, ‘Yi wɛ̀rhɛ́ numbyínsí, bal ǹdə́ kɛ̃.’ ⁷ ‘Rə̀myɛ́ yilə, bal mɔ́ mà n yẽ̌ ń da ǹdə́ ń ná nɛ, n jòm ǹdə́ ń kɛ̃ mɔ́, ⁸ sə bə̀myɛ́ bə̀lyè y ga bʼa mù dwã nɛ bə jǐrh kɔn rə̀dù.’ ” Yezu zɛ̃̀ n súlí n wɔ̀ bɛ: “Èta, bə̀ kʼê tʼâ la lyì bə̀lyè yál yé. Bə̀ mù dwã nɛ bə jǐrh kɔn rə̀dù. ⁹ Kɔn dɛ̀bɛ́ Yi co dwã nɛ, sə numbyíní bə̀ká pɔr rɛ yé.” ¹⁰ Bə̀ gə́ yú kɛ̀lɛ́ wa, ń kwã-lyì bí kʼe bwə̀rh mò zɔ̀mɛ̀ rɛ́ rə̀myɛ́ mɔ́ shò-kwã nɛ́. ¹¹ N zɛ̃̀ n wɔ̀ bɛ: “Bal gə zhɔ̃̀ ǹ kɛ̃ ń vùr mò, ń zɛ̃̀ ń jí ń dõ, wɔ́ fwə́l ǹ nə́ ǹ fwǝ̌l ǹdə́ mɔ̀bɔ́ ǹ tà-kwã ń jí mú. ¹² Wɔ́ èta ǹdə́ kɛ̃ myɛ. Ǹ gə shə́r ǹ yẽ̌ ǹ byal nɛ, ń vò ń jí bal dõ, wɔ́ fwə́l ǹ nə́ ǹ fwǝ̌l ǹdə́ bal mɔ́ ńmyɛ̌ mɔ́.” ¹³ Lyì y'à n'ê zǝ bǝ̀sɔ́ná námpɔ́lsɛ bǝ̀ twí Yezu sono, mùnì ga n dwǝ̀rh bè. Ń kwã-lyì bí zɛ̃̀ bǝ̀ n'ê ji bi búlǝ́. ¹⁴ Yezu gǝ́ nɔ rǝ̀myɛ́, ń wu zhìlì, n zɛ̃̀ n wɔ̀ ń kwã-lyì bí ni: «Yẽ̌-nǝ bǝ̀sɔ́ná bɛ́ nɛ bǝ bǝ̀ à sono, s'á bǝ̀k'á cǝ̀r bè yé, bǝ̀ Yi tǝnà y wɔ́ lyì byɛ̀bɛ́ bǝ̀ nyɛ̌ ǹdǝ bǝ̀myɛ́ ta mɔ́ nyǎ. ¹⁵ Zhə̀nà, à nʼâ wə̀l ába: lò mɔ̀bɔ́ ǹ gə yə̀ Yi pyɛ̀lɛ̀ rɛ́ yò shɛ̀nɛ́ ǹdə bə̀sɔ́bwɛ̀lɛ́ ta, ǹ tá ǹ la rə̀ tənà y wẽ́ zú gaga yé.” ¹⁶ N zɛ̃̀ n kwə̀ə̀lè bè, n cĩ́ jɛ̃̀ mə̀dù mə̀dù gakó yó, n cĩ́ bwəl bə̀ yó. Nə̀cɛ̀nà Yi tənà y wẽ́ zú mʼa yə̀ zwini ¹⁷ Yezu gǝ́ du n kwè sɔ́má yá, lò mǝ̀dù dùr n jòm ń nǝ̀dwǝ́nǝ́ yó ń yé né, n bwǝ̀rh mò n wɔ̀: «Yó-cǝ́bal nántwǝ̌, byè à mǝ̌ s'a wɛ̀rhɛ́ mùnì a nǝ nyǔ mǝ̀ t'â la zhɔ̌?» ¹⁸ Yezu zɛ̃̀ n wɔ̀ mɔ̀: «Byè yil ǹ nǝ́ ǹ byẽ̀ nè bǝ̀ lyì-twǝ̌? Lò tɛ̀nɛ́ ń wɔ́ lyì-twǝ̌ ǹdǝ́ è gǝ dǝ̀ Yi dúdú yé. ¹⁹ Ǹ yě nyǝ́ né gǝ́ n'ê byili ní. Nǝ̀ n'ê byili èta: ‹Bǝ̀ká gu lò yé; bǝ̀ká fwǝ̌l yé; bǝ̀ká ŋwɔ̀ yé; bǝ̀ká gõ̀ kɔma ń ce ǹ dõ nyí ni bùrsì jàà w yé; bǝ̀ká myìnì ǹ dõ yé; nyám ǹ da ǹdǝ́ ǹ ná.›» ²⁰ Bal mɔ́ wɔ̀ mɔ̀: “Yó-cə́bal, à zwẽ nyə́ né nə̀myɛ́ gakó à bə̀swɛ́nɛ́ ga kɔn mʼe yí zà.” ²¹ Yezu zɛ̃̀ n nyǐ mu, n swéné mo. N zɛ̃̀ n wɔ̀ mɔ̀: “Kɔn rə̀dù rə̀ mwìrì mú: zhəl ń kwè kɔn dɛ̀bɛ́ ǹ zhe mó gakó ń yè, ń pə rə̀ wársɛ́ nə̀mwà nɛ̀, sə́ ká kwɛ̃̀ ń bə̀ ń tó ne, sə́ yẽ̌ bə̀ ǹ mʼǎ nə nə̀cɛ̀ndɛ̀ dɛ̃̌ Arəzana wa.” ²² Bal mɔ́ gə́ nyɛ̀ɛ̀ zɔ̀mɛ̀ rɛ́ rə̀myɛ́, ń wu kwẽ ń wẽ́, n zhǐr ń la jè ǹdə́ wu-zhìlù, bə̀ ń yà ń wɔ́ nə̀cɛ̀m-bal nánfɔ̀lɔ̀. ²³ Yezu zɛ̃̀ n pyìrhí n wɔ̀ ń kwã-lyì bí ni: «Nǝ̀cɛ̀nà bɛ́ Yi tǝnà y wẽ́ zú m'a yǝ̀ zwini tã̀!» ²⁴ Ń gǝ́ zɔ̀m èta, ń kwã-lyì bí wun zɛ̃̀. N kǝ́ n wɔ̀: «À bǝ̀sɔ́ná, lwar-na bǝ̀ Yi tǝnà y wẽ́ zú m'a yǝ̀ zwini tã̀! ²⁵ Yómó gǝ la gã̀-mǝshǐm bɔ̀l wẽ́ tó o lyɛ̃ k'â wɔ́ nàná du nǝ̀cɛ̀m-bal gǝ la Yi tǝnà y wẽ́ zú.» ²⁶ Bə̀ wun kʼe kwɛrhɛ nə zɛ̃̀. Bə zɛ̃̀ bə̀ nʼê bwə̀rh dwã bə̀ zhe: “È gə wɔ́ èta, wɔ́ mɔ̌ lò ń nə wɔ̌ ń mà n nə ń cìn vwârh?” ²⁷ Yezu zɛ̃̀ n nyǐ bi n wɔ̀: “Rə̀myɛ́ du numbyínə́ bé jàn, sə rə̀ bə Yi jàn du yé, bə̀ Yi wɔ̌ kɔn gakó.” ²⁸ Pyɛɛrɛ zɛ̃̀ n wɔ̀ mɔ̀: “Nyǐ nə́myɛ̌, nə́ yẽ̌ kɔn gakó ne nə́ tó mó.” ²⁹ Yezu wɔ̀ mɔ̀: «Zhǝ̀nà, à n'â wǝ̀l ába: lò mɔ̀bɔ́ ǹ yẽ̌ ǹ kɛ̀lɛ́ y ǹdǝ́ ǹ da-byǎ, ǹdǝ́ ǹ nǝkwá, ǹdǝ́ ǹ da ǹdǝ́ ǹ ná, ǹdǝ́ ǹ bǝ̀sɔ́ná ǹdǝ́ ǹ kálsɛ nɛ àmyɛ́ ǹdǝ́ yò-ècɔ̀nɔ̀ nyí rí yilǝ, ³⁰ ǹ m'ǎ k'á nǝ rǝ̀myɛ́ gakó twǝr zɔ̌m èlǎsɛ̃́ lũ w kɔ̀bɔ́ wẽ́. Ǹ m'ǎ nǝ kǎlsɛ ǹdǝ́ da-byǎ ǹdǝ́ nǝkwá ǹdǝ́ ná ǹdǝ́ bǝ̀sɔ́ná ǹdǝ́ kálsɛ. Ń jà ǹ m'ǎ nǝ nɔ̀nɔ̀ myɛ. Sǝ ǹ m'ǎ nǝ nyǔ mǝ̀ t'â la zhɔ̌ lũ w kɔ̀bɔ́ ò bàn mɔ́ wa. ³¹ Byɛ̀bɛ́ bǝ̀ wɔ́ nã́yǝ́ǝ́ bé mó nánzhǝzhɔ̌ m'a jǐrh nánkwaá, sǝ byɛ̀bɛ́ bǝ̀ wɔ́ nánkwaá bɛ́ mɔ́ nánzhǝzhɔ̌ m'a jǐrh nã́yǝ́ǝ́.» ³² Yezu ǹdə́ ń kwã-lyì bí yʼà kwè sɔ́má y bə̀ la Zhərəzalɛm. Sə ń yà ń ŋwɛ́nɛ́ bə̀ yé né, sə bə̀ wun yʼà nʼê zɛ̃̀ bə̀ mʼê ŋwɛ́nɛ́ ń kwã nɛ́. Ywẽ yʼà zhe byɛ̀bɛ́ bə̀ yʼà nʼê tó be mó. N zɛ̃̀ n kə́ n zə ń kwã-lyì bí shí ǹdə́ bə̀lyè y n vò kwã, ń nə́ ń byili bi kɔn dɛ̀bɛ́ rə̀ la mɔ wɔ̀rhɔ́. Ń yà ń zhe: ³³ “Nyǐ-nə nə́ la Zhərəzalɛm, sə bə̀ mʼa zə Numbyíní Byǐ bə pə Yi jì y vwĩ̀-zwə́lnə bé yé né cìnə́ bé ǹdə́ Muyiisi nyə́ né byilnə bé ne, bə kə́ ń bùrsì ǹdə́ cu. Bə mʼa pɔ̃ lyì byɛ̀bɛ́ bə̀ də̀ Zhwifubá ne, ³⁴ bə fulsi mu, bə pùrh tə̀tàr ń yó, bə zə dànə̀shàárɛ bə mà mɔ̀, bə zɛ̃̀ bə gu mu. Sə ń mà n bwìrhì ń dwã nə̀tɔ̀ yùwə̀.” ³⁵ Zebede byǎ bɛ́ Zhakɛ ǹdǝ́ Zhã zɛ̃̀ bǝ yí Yezu nyí ní, bǝ wɔ̀ mɔ̀: «Yó-cǝ́bal, kɔn dɛ̀bɛ́ nǝ́ la mɔ́ lwǝ̌l mó, nǝ́ r'é yǎl bǝ̀ ǹ wɛ̀rhɛ́ rɛ ń pǝ nǝ́ba.» ³⁶ N bwǝ̀rh bè n wɔ̀: «Bǝ̀kɔ́n á n'á yǎl b'à wɛ̀rhɛ́ a pǝ ába?» ³⁷ Bǝ wɔ̀ mɔ̀: «Nǝ́ r'é lwǝ̀l mó bǝ̀ ǹ ce nǝ́ mǝ̀dù jòm ǹ jǝ̀jĩ́ ni, mǝ̀dù jòm ǹ jǝ̀gwã̀ nɛ̀ ǹ pyɛ̀lɛ̀ rɛ́ jàà wà.» ³⁸ N wɔ̀ bɛ: «Á yǝ̀l kɔn dɛ̌ ná-dwí yil á n'á lwǝ̀l yé. Á m'ǎ shɛ̀nɛ́ á nwɛ̀nɛ̀ nɔ̀nɔ̀ w kɔ̀bɔ́ àmyɛ́ la nɔ̀nɔ̀ mɔ́? Á m'ǎ shɛ̀nɛ́ á mɔ́lɛ́ nɔ̀nɔ̀ nɛ̃̌-mɔ́lɔ́ mɔ́ à la mɔ́lɔ́ mɔ́?» ³⁹ Bǝ wɔ̀ mɔ̀: «Nǝ́ m'ǎ shɛ̀nɛ́.» N wɔ̀ bɛ: «Zhǝ̀nà, á m'ǎ nwɛ̀nɛ̀ nɔ̀nɔ̀ w kɔ̀bɔ́ àmyɛ́ la nɔ̀nɔ̀ mɔ́. Á m'ǎ mɔ́lɛ́ nɔ̀nɔ̀ nɛ̃̌-mɔ́lɔ́ mɔ́ à la mɔ́lɔ́ mɔ́. ⁴⁰ Sǝ è gǝ wɔ́ à jǝ̀jĩ́ ni ǹdǝ́ à jǝ̀gwã̀ nɛ̀ jǒm mó, è dǝ̀ àmyɛ́ à la rǝ̀myɛ́ nyí pɔ yé. Jààsɛ́ sǝ̀myɛ́ ŋwɛ́nɛ́ byɛ̀bɛ́ à Da tɛnɛ sɛ bǝ̀ yil mó yilǝ.» ⁴¹ Ń kwã-lyì bí shí y dwã bɛ́ gǝ́ nyɛ̀ɛ̀ rǝ̀myɛ́, bǝ̀ lyimǝ zɛ̃̀ nǝ̀ n'ê yì ǹdǝ́ Zhakɛ ǹdǝ́ Zhã. ⁴² Yezu zɛ̃̀ n byẽ̀ bǝ̀ gakó n wɔ̀ bɛ: «Á yě bǝ̀ byɛ̀bɛ́ lyì bí n'ê nyǐ ǹdǝ tǝnǝ̀rh pyǎ ta mɔ́ n'ê jí pyɛ̀lɛ̀ bǝ̀ lyì bí yó. E jà lyì-fwààlɛ́ myɛ ŋwɛ́nɛ́ bǝ̀ n'ê wɛ̀rhɛ́ jàn lyì bí ni. ⁴³ Sǝ ámyɛ̌ bǝ̀k'á wɛ̀rhɛ́ èta yé. Lò mɔ̀bɔ́ ń ŋwɛ́nɛ́ á wẽ́ ń nǝ́ ń yǎl n yǝ̀ á gakó lyì-fɔ̀lɔ̀, sǝ n yǝ̀ á tùntùnnǝ̀ n twĩ̀ n pǝ ába. ⁴⁴ Lò mɔ̀bɔ́ ń nǝ́ ń yǎl n yǝ̀ á yé né cǝ́bal, sǝ n yǝ̀ á gakó yǝ-bal. ⁴⁵ Wɔ́ èta ǹdǝ́ Numbyíní Byǐ myɛ. Ń yǝ̀ twí mùnì ga lò twĩ̀ n pɔ̃ yé. Ń túwǝ́, ń la tũ̌ n pǝ lyì bí ni, sǝ n pǝ ń myǝ̌l ré lyì nánzhǝzhɔ̌ zõ yilǝ.» ⁴⁶ Yezu ǹdə́ ń kwã-lyì bí zɛ̃̀ bə yí Zheriko. Bə̀ gə́ tú bə̀ nʼê dwi cɔ w wa, lyì nánzhəzhɔ̌ yʼà tó be. E jà lyìlyǒ òdù yʼà jě sɔ́má y vɔ̃̀ nɛ̀ ò nʼô lwə̀lə̀. È yʼà wɔ́ Time byǐ, ń yíl Bərtime. ⁴⁷ N nyɛ̀ɛ̀ bə̀ wɔ́ Nazarɛtɛ lyì bal Yezu ń bànà, n zɛ̃̀ n ji kùr ń nə́ ń búbwéé ń zhe: “Dəvyidi Byǐ Yezu, dǔr à nɔ̀nɔ̀.” ⁴⁸ Lyì-zhǎ bɛ́ zɛ̃̀ bə̀ nʼê ji mu búlə́ bə̀ ń yẽ̌ ń sɔ̀ w nɛ. N kwɛrhɛ n búbwéé dwini shãã ga n wɔ̀: “Dəvyidi Byǐ, dǔr à nɔ̀nɔ̀.” ⁴⁹ Yezu swə́rh n zhì, n wɔ̀: “Byẽ̌-nə mo n bà.” Bə zɛ̃̀ bə byẽ̀ lyìlyǒ w bə wɔ̀: “Kám ǹ wu ń zɛ̃̀. Nyǐ ń nə́ ń byẽ̀ mó.” ⁵⁰ O dul ò gɔ̀nɔ̀ w tɛ̃́, o zɛ̃̀ o dùr o bə̀ Yezu sono. ⁵¹ Yezu bwə̀rh mò n wɔ̀: “Bə̀kɔ́n ǹ nə́ ǹ yǎl bʼà wɛ̀rhɛ́ ǹ yilə?” Lyìlyǒ w wɔ̀ mɔ̀: “Yó-cə́bal, à nʼâ lwə̀l mó bə̀ ǹ púr à yírhə́ né.” ⁵² Yezu zɛ̃̀ n wɔ̀: “Zhəl, ǹ gə́ zhí ni mú ce ǹ nɔ ǹ cìnə̀.” Ò yírhə́ né jʼa púr, o zhǐr o tó Yezu ni ò la.